କର୍ଣ୍ଣାଟକ ସକଂଟ : ରିସର୍ଟରେ କଂଗ୍ରେସ ବିଧାୟକଙ୍କ ମଧ୍ୟରେ ପିଟାପିଟି, ଜଣେ ଆହତ
ବେଙ୍ଗାଲୁରୁ : କର୍ଣ୍ଣାଟକରେ ରାଜନୈତିକ ସଂକଟ ଆଉ ଏକ ନୂଆମୋଡ଼ ନେଇଛି। ନିଜ ଦଳର ବିଧାୟକ ମାନଙ୍କୁ ଏକାଠି କରିବା ନେଇ କଂଗ୍ରେସକୁ ପୁଣି ଧକ୍କା ଲାଗିଛି । ବେଙ୍ଗାଲୁରୁର ଇଗଲଟନ ରିସର୍ଟରେ ରହୁଥିବା କଂଗ୍ରେସ ବିଧାୟକଙ୍କ ମଧ୍ୟରେ ପିଟାପିଟି ଘଟଣା ସାମ୍ନାକୁ ଆସିଛି। ଜଣେ ଆହତ ବିଧାୟକ ଆନନ୍ଦ ସିଂହଙ୍କୁ ହସ୍ପିଟାଲରେ ଭର୍ତ୍ତି କରାଯାଇଛି।
ରିସର୍ଟରେ ବିଧାୟକ ଜେଏନ ଗଣେଶନ, ଆନନ୍ଦ ସିଂହଙ୍କ ମୁଣ୍ଡକୁ ବୋତଲରେ ଆକ୍ରମଣ କରିଥିବା ଜଣାପଡିଛି। ଏହା ପରେ ତାଙ୍କୁ ହସ୍ପିଟାଲରେ ଭର୍ତ୍ତି କରାଯାଇଛି। କିନ୍ତୁ କଂଗ୍ରେସ ଏହି ଖବରକୁ ଖଣ୍ଡନ କରିଛି। ଦଳର ନେତା ଡି.କେ. ସୁରେଶ ଏହି ଘଟଣାକୁ ସ୍ବୀକାର କରି। ସେ କହିଛନ୍ତି ଯେ, ବିଧାୟକ ଆନନ୍ଦ ସିଂହ ଓ ଜେ.ଏନ ଗଣେଶଙ୍କ ମଧ୍ୟରେ ମାରପିଟ୍ ଓ ହାତାହାତି ହୋଇଛନ୍ତି। କିନ୍ତୁ ଆହତ ଘଟଣାକୁ ସେ ଖଣ୍ଡନ କରି କହିଛନ୍ତି, ଆନନ୍ଦ ସିଂହଙ୍କ ଛାତିରେ ଯନ୍ତ୍ରଣା ହେବାରୁ ତାଙ୍କୁ ହସ୍ପିଟାଲରେ ଭର୍ତ୍ତି କରାଯାଇଛି।
ବିରୋଧୀ ଦଳ ବିଜେପି ଏହି ଘଟଣାକୁ ନେଇ କର୍ଣ୍ଣାଟକ ସରକାରଙ୍କୁ ସମାଲୋଚନା କରିଛି। କର୍ଣ୍ଣାଟକ ବିଜେପି ଟ୍ଵିଟ୍ କରି କହିଛି ଯେ କଂଗ୍ରେସ ଭିତରେ ଆଭ୍ୟନ୍ତରୀଣ କନ୍ଦଳ ଗୁରୁତର ରୂପ ନେଇଛି। ରିସର୍ଟରେ କଂଗ୍ରେସ ବିଧାୟକଙ୍କ ମଧ୍ୟରେ ମାରପିଟ୍ ହୋଇଛି, ଏଥିରେ ଆହତ ହୋଇଥିବା ଜଣେ ବିଧାୟକଙ୍କୁ ହସ୍ପିଟାଲରେ ଭର୍ତ୍ତି କରାଯାଇଛି। କିନ୍ତୁ ଦଳ ନିଜର ଭୁଲ ସ୍ଵୀକାର ନକରି ଓଲଟା ନିଜ ଦଳର ଆଭ୍ୟନ୍ତରୀଣ କନ୍ଦଳ ପାଇଁ ବିଜେପିକୁ ଦାୟୀ କରୁଛି।