ଫାଟିଲା ଗ୍ୟାସ ; ଅଳ୍ପକେ ବର୍ତ୍ତିଲେ ଗର୍ଭବତୀ ଓ ୨ ଶିଶୁ

0
318

ପାଲଲହଡା : ଅନୁଗୋଳ ପାଲଲହଡା ଅଞ୍ଚଳରେ ଭାୟାବହ ଅଗ୍ନିକାଣ୍ଡ ଘଟିଛି। ସୂଚନା ଅନୁସାରେ ସଇଡା ପଞ୍ଚାୟତ ଜୋକପାଣି ଗାଁରେ ଗ୍ୟାସ ଟାଙ୍କି ଫାଟି ଘର ଜଳିଯାଇଛି। ଏହି ଘଟଣାରେ ଜଣେ ଗର୍ଭବତୀ ମା’ଙ୍କ ସମେତ ଦୁଇ ଜଣ ଶିଶୁ ଅଳ୍ପକେ ବର୍ତ୍ତିଯାଇଛନ୍ତି। ଶନିବାର ଅପରାହ୍ନରେ, ଭାସ୍କର ମୁଣ୍ଡା କୌଣସି କାମରେ ବାହାରକୁ ଯାଇଥିବାବେଳେ ନିଜର ଗର୍ଭବତୀ ସ୍ତ୍ରୀ ସୁନାରୀ ମୁ୍ଣ୍ଡା ଘରେ ନିଜର ୫ ଓ ୩ ବର୍ଷର ଦୁଇ ଛୁଆକୁ ଶୁଆଇ ଦେଇ ଘର ପାଖ ନଳକୁଅକୁ ପାଣି ଆଣିବାକୁ ଯାଇଥିଲେ । ଏତିକିବେଳେ ଘର ଭିତରୁ ଜୋରରେ ଶବ୍ଦ ଶୁଭିଥିଲା। ଶବ୍ଦ ଶୁଣି ସୁନାରୀ ଘରକୁ ଦୌଡି ଆସି ଦେଖିଲାବେଳକୁ ଘରେ ନିଆଁ ଲାଗିଯାଇଥିଲା । ପାଟିତୁଣ୍ଡ ଶୁଣି ଗ୍ରାମବାସୀ ମାନେ ଦୌଡ଼ି ଆସି ଘରେ ଶୋଇଥିବା ଦୁଇ ଶିଶୁକୁ ଉଦ୍ଧାର କରିବାରେ ସକ୍ଷମ ହୋଇଥିଲେ । ହେଲେ ସଙ୍ଗେ ସଙ୍ଗେ ନିଆଁ ବ୍ୟାପି ତିନି ବଖରା ଘର ସମ୍ପୂର୍ଣ ଜଳିଯାଇଥିଲା। ପରେ ଦମକଳ ବାହିନୀ ଆସି ନିଆଁକୁ ଆୟତ କରିଥିଲେ। ଘରେ ଥିବା ରୋଷେଇ ଗ୍ୟାସ ଟାଙ୍କି ଫାଟି ଅଗ୍ନିକାଣ୍ଡ ଘଟିଥିବା ସନ୍ଦେହ କରାଯାଉଛି।