ନୂଆଦିଲ୍ଲୀ : ଭାରତୀୟ ନିର୍ବାଚନ ଆୟୋଗ (ଇସି) ରାଜନୈତିକ ଦଳଗୁଡିକ ଉପରେ ନୂଆ କଟକଣା ଲାଗୁ କରିଛନ୍ତି। କଟକଣା ଅନୁଯାୟୀ ମତଦାନର ଶେଷ ୪୮ ଘଣ୍ଟା ମଧ୍ୟରେ କୌଣସି ରାଜନୈତିକ ଦଳ ସେମାନେ ତାଙ୍କର ଇସ୍ତାହାର ପ୍ରକାଶ କରିପାରିବେ ନାହିଁ। ନିର୍ବାଚନ ଯାହା ଇସ୍ତାହାର ପ୍ରକାଶ କରିବାକୁ ଥିବା ତାକୁ ମତଦାନର ୪୮ଘଣ୍ଟା ପୂର୍ବରୁ ପ୍ରକାଶ କରିବାକୁ ହେବ। ବର୍ତ୍ତମାନ ସମୟରେ ରାଜନୈତିକ ଦଳ ପାଇଁ ଇସ୍ତାହାର ପ୍ରକାଶର କୌଣସି ସମୟ ସୀମା ଧାର୍ଯ୍ୟ ହୋଇ ନାହିଁ। ସଂଶୋଧିତ ନିର୍ବାଚନ ଆଚରଣ ବିଧି ଅନୁଯାୟୀ ଆୟୋଗ ଏହି ନିର୍ଦେଶନାମା ଜାରି କରିଛନ୍ତି। ଜନ ପ୍ରତିନିଧି ଆଇନ ୧୯୫୧ର ଧାରା ୧୨୬ ଅନୁଯାୟୀ ସଂଶୋଧିତ ଆଚରଣ ବିଧି ଲାଗୁ କରାଯାଇଛି। ଧାରା ୧୨୬ରେ ‘ନିର୍ବାଚନ ନିରବତା’ ସମ୍ପର୍କରେ କୁହାଯାଇଛି। ଯେଉଁଥିରେ ମତଦାନର ୪୮ପୂର୍ବରୁ ପ୍ରଚାରକୁ ବନ୍ଦ କରାଯାଇଥାଏ। ୨୦୧୪ ଲୋକସଭା ନିର୍ବାଚନ ପ୍ରଥମ ପର୍ଯ୍ୟାୟ ମତଦାନ ଦିନ ବିଜେପି ତାର ଇସ୍ତାହାର ପ୍ରକାଶ କରିଥିଲା। କଂଗ୍ରେସ ସେତେବେଳେ ଏହାକୁ ନେଇ ଅଭିଯୋଗ କରିଥିଲା ମାତ୍ର ଆୟୋଗ କୌଣସି କାର୍ଯ୍ୟାନୁଷ୍ଠାନ ନେଇ ପାରି ନଥିଲେ। କାରଣ ନିର୍ବାଚନ ଆଚରଣ ବିଧିରେ ଏପରି କିଛି ନିୟମ ନଥିଲା। ଏହା ଉପରେ ତର୍ଜମା ପାଇଁ ଇସିଙ୍କ ଦ୍ବାରା ଏକ କମିଟି ନିଯୁକ୍ତ କରାଯାଇଥିଲା। କମିଟି ମତଦାନର ୭୨ ଘଣ୍ଟା ପୂର୍ବରୁ ଇସ୍ତାହାର ପ୍ରକାଶ ପାଇଁ ସୁପାରିସ କରିଥିଲେ। ତେବେ ବିଭିନ୍ନ ରାଜନୈତିକ ଦଳ ସହିତ ବିଚାରବିମର୍ଷ ପରେ ଏହାକୁ ୪୮ଘଣ୍ଟା ପୂର୍ବରୁ ପ୍ରକାଶ ଲାଗି ଧାର୍ଯ୍ୟ କରାଯାଇଛି।
