ମୁମ୍ବାଇ ..- ପାକିସ୍ତାନରୁ ଭାରତ ଆସି ବିଭିନ୍ନ କଳାକାର ଚଳଚ୍ଚିତ୍ରରେ ଅଭିନୟ କରି ଓ ଗୀତ ଗାଇ କୋଟି କୋଟି ଟଙ୍କା ରୋଜଗାର କରୁଥିଲେ । ପୁଲଓ୍ୱାମାରେ ଆତଙ୍କବାଦୀ ଆକ୍ରମଣପରେ ପାକିସ୍ତାନର ସମସ୍ତ କଳାକାରଙ୍କୁ ଭାରତୀୟ ସିନେମାରେ ଅଭିନୟ ଓ ସଙ୍ଗୀତ ପରିବେଷଣ ନିଷେଧ କରିବା ପାଇଁ ପଶ୍ଚିମ ଭାରତ ଚଳଚ୍ଚିତ୍ର କର୍ମଚାରୀ ସଂଘ ନିଷ୍ପତ୍ତି ନେଇଛି । ଏହାର ମୁଖ୍ୟ ପରାମର୍ଶଦାତା ଅଶୋକ ପଣ୍ଡିତ ଏହି ସୂଚନା ଦେଇଛନ୍ତି ।
ପାକିସ୍ତାନର ସମସ୍ତ କଳାକାରମାନଙ୍କୁ ସମ୍ପୂର୍ଣ୍ଣ ଭାବେ ନିଷେଧ କରାଯାଇଥିବା ପଣ୍ଡିତ କହିଛନ୍ତି । କୌଣସି ପ୍ରଯୋଜକ କିମ୍ବା ନିର୍ଦେଶକ ପାକିସ୍ତାନ କଳାକାରଙ୍କୁ ତାଙ୍କ ଚଳଚ୍ଚିତ୍ରରେ କାମ କରିବା ପାଇଁ ସୁଯୋଗ ଦେଲେ ଏଫ୍ଡବ୍ଲୁଆଇସିଇ ଏହାକୁ ବିରୋଧ କରିବା ସହ ତାଙ୍କୁ କୌଣସି ପ୍ରକାର ସହଯୋଗ ଯୋଗାଇ ଦେବାନାହିଁ ବୋଲି କହିଛି । କିଛି ସଙ୍ଗୀତ ପ୍ରସ୍ତୁତକାରୀ କମ୍ପାନୀ ପାକିସ୍ତାନୀ କଳାକାରମାନଙ୍କ ସହ କାମ କରିବା ପାଇଁ ଆଗ୍ରହ ଦେଖାଉଥିବା ଅଶୋକ କହିଛନ୍ତି । ଏହି କମ୍ପାନୀମାନଙ୍କୁ କୌଣସି ଲଜ୍ୟା ଲାଗୁ ନଥିବା ବେଳେ ଏଫ୍ଡବ୍ଲୁଆଇସିଇ ସେମାନଙ୍କୁ କୌଣସି ପ୍ରକାରେ ସହଯୋଗ କରିବ ନାହିଁ ବୋଲି ସେ କହିଛନ୍ତି ।