ମୋହନା: ଗଜପତି ଜିଲ୍ଲା ମୋହନା ଥାନା ଅନ୍ତର୍ଗତ ପୋଡାଶଙ୍ଖ ଗାଁ ନିକଟରେ ଜଣେ ମହିଳାକୁ ମରଣାନ୍ତକ ଆକ୍ରମଣ ହୋଇଥିବା ଥାନାରେ ଅଭିଯୋଗ ହୋଇଛି। ଆକ୍ରମଣର ଶିକାର ହୋଇଥିବା ମହିଳା ଜଣକ ହେଉଛନ୍ତି ସେହି ଗାଁର ପ୍ରିୟଙ୍କା ଭୁୟାଁ (୨୩)। ଏ ନେଇ ମୋହନା ଥାନାରେ ଅଭିଯୋଗ କରିଛନ୍ତି ପ୍ରିୟଙ୍କାଙ୍କ ସ୍ୱାମୀ ତ୍ରୀନାଥ ଶବର। ପୁଲିସ ଗୁରୁତର ଅବସ୍ଥାରେ ପ୍ରିୟଙ୍କାଙ୍କୁ ମୋହନା ମେଡିକାଲରେ ଭର୍ତ୍ତି କରିଥିବା ବେଳେ ପ୍ରାଥମିକ ଚିକିତ୍ସା ପରେ ତାଙ୍କୁ ବ୍ରହ୍ମପୁର ସ୍ଥାନାନ୍ତର କରାଯାଇଛି। ପୁଲିସ ସୁତ୍ରରୁ ମିଳିଥିବା ସୂଚନା ଅନୁଯାୟୀ ରବିବାର ଅପରାହ୍ନରେ ପୋଡାଶଙ୍ଖ ଗାଁର ପ୍ରିୟଙ୍କାଙ୍କ ସହ ବାଲିବାଡ ଗାଁରେ ଭଡାରେ ରହୁଥିବା ଶୁଭଲକ୍ଷ୍ମୀ ତ୍ରିପାଠୀଙ୍କ ମଧ୍ୟରେ କୌଣସି କାରଣକୁ ନେଇ ଝଗଡା ହୋଇଥିଲା। ଏହାପରେ ପ୍ରିୟଙ୍କା ଗୁରୁତର ଆହତ ହୋଇଥିଲେ। ଗ୍ରାମବାସୀ ଘଟଣା ସମ୍ପର୍କରେ ପୁଲିସକୁ ସୂଚନା ଦେବା ପରେ ପୁଲିସ ପହଞ୍ଚି ଗୁରୁତର ପ୍ରିୟଙ୍କାକୁ ଗ୍ରାମବାସୀଙ୍କ ସହାୟତାରେ ମୋହନା ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରକୁ ନେଇଥିଲେ। ଅବସ୍ଥା ସଙ୍କଟାପନ୍ନ ଥିବାରୁ ପ୍ରାଥମିକ ଚିକିତ୍ସା ପରେ ତାଙ୍କୁ ବ୍ରହ୍ମପୁର ସ୍ଥାନାନ୍ତର କରାଯାଇଛି। ଘଟଣା ସମ୍ପର୍କରେ ପୁଲିସ ଶୁଭଲକ୍ଷ୍ମୀଙ୍କୁ ପଚାରା ଉଚରା କରୁଛି। ଥାନା କେସ ନଂ ୩୩/୧୯ ରେ ମାମଲା ରୁଜୁ କରାଯାଇ ଘଟଣାର ତଦନ୍ତ ଚାଲିଥିବା ସବଇନିସପେକ୍ଟର ଆଲୋକ ଜଗଦଲା କହିଛନ୍ତି।
