ଯାତ୍ରୀବାହୀ ବସ୍‍-କାର୍‍ ଧକ୍କା, ଅଳ୍ପକେ ବର୍ତ୍ତିଲେ ଯାତ୍ରୀ

0
315

ପିପିଲି : ଭୁବନେଶ୍ୱର-ପୁରୀ ଜାତୀୟ ରାଜପଥର ଦାଣ୍ଡମୁକୁନ୍ଦପୁର ବାଇପାସ୍‍ ରାସ୍ତାରେ ଗୁରୁବାର ପୂର୍ବାହ୍ନରେ ଏକ ଘରୋଇ ଯାତ୍ରୀବାହୀ ବସ୍‍ ସହ ଅନ୍ୟ ଏକ କାର୍‍ର ଧକ୍କା ଲାଗିଥିବା ବେଳେ ଏଥିରେ ୫୦ରୁ ଉର୍ଦ୍ଧ ଯାତ୍ରୀ ଅଳ୍ପକେ ବିପଦରୁ ବର୍ତ୍ତି ଯାଇଥିବା ସୂଚନା ମିଳିଛି।
ଖବରଅନୁସାରେ ପୁରୀରୁ ଭୁବନେଶ୍ୱର ଅଭିମୁଖେ ଏକ କାର୍‍ ଯାଉଥିବା ବେଳେ ଦାଣ୍ଡମୁକୁନ୍ଦପୁର ବାଇପାସ ରାସ୍ତାରେ ଉକ୍ତ କାର୍‍ର ଡାହାଣ ପାର୍ଶ୍ବରୁ ଅନ୍ୟଏକ ଘରୋଇ ଯାତ୍ରୀବାହୀ ବସ୍‍ (ଶ୍ରୀଦୁର୍ଗା) ପଛରୁ ଅତିକ୍ରମ କରିବା ସମୟରେ ଦୁର୍ଘଟଣାର ସମ୍ମୁଖିନ ହୋଇଥିଲା। ବସ୍‍ଟିର ବାମପାର୍ଶ୍ବ ସମ୍ମୁଖ ଭାଗ ସହ କାର୍‍ର ଡାହାଣ ପାର୍ଶ୍ବ ସମ୍ମୁଖ ଭାଗ ଧକ୍କା ଲାଗିବା ଫଳରେ ବସ୍‍ଟିର ଚାଳକ ଗାଡିକୁ ଡାହାଣ ପଟକୁ କାଟି ଦେଇଥିଲା। ବସ୍‍ର ଚକା ରାସ୍ତାର କଂକ୍ରିଟ୍‍ ଡିଭାଇଡର ଉପରେ ଚଢିଯାଇଥିବା ବେଳେ ସୌଭାଗ୍ୟବସତଃ ଉଭୟ ଗାଡିର ଚାଳକ ବ୍ରେକ୍‍ମାରି ଗାଡିକୁ ଅଟକାଇବାରେ ସଫଳ ହୋଇଥିଲେ। ଫଳରେ ଏକ ବଡଧରଣର ବିପଦରୁ ଉଭୟ କାର୍‍ ଓ ବସ୍‍ର ଯାତ୍ରୀମାନେ ଅଳ୍ପକେ ବର୍ତ୍ତି ଯାଇଥିବା ସୂଚନା ମିଳିଛି। ଖବର ପାଇ ପିପିଲି ପୁଲିସ ଘଟଣାସ୍ଥଳରେ ପହଞ୍ଚି ଦୁଇଟିଯାକ ଗାଡିକୁ ଜବତ କରି ଘଟଣାର ତଦନ୍ତ ଚଳାଇଥିବା ସୂଚନା ମିଳିଛି।