ନୂଆଦିଲ୍ଲୀ : ସଂସଦର ଶୀତକାଳୀଣ ଅଧିବେଶନର ସୋମବାର ଲୋକସଭାରେ କିନ୍ନର ମାନଙ୍କ ପାଇଁ ବହୁ ଗୁରୁତ୍ୱପୁର୍ଣ୍ଣ ବିଲ ପାସ ହୋଇଛି। ଏହି ବିଲରେ କିନ୍ନର ମାନଙ୍କ ପାଇଁ ଭେଦଭାବ, ସମାଜରେ ସମ୍ମାନ ପରି ବହୁ ବିଷୟ ରହିଛି। ଗୃହରେ ଜୋରଦାର ହଟଗୋଳ ସମୟରେ ଏହି ବିଧେୟକରେ ମୋହର ଲାଗିଛି। ଏହି ବିଧେୟକରେ ଅଧିକ ସଂଶୋଧନର ଆବଶ୍ୟକ ରହିଥିବା ବିରୋଧୀ କହିଛନ୍ତି। ସଂସଦରେ ସାମାଜିକ ନ୍ୟାୟ ଏବଂ ଅଧିକାରିତା ମନ୍ତ୍ରୀ ଥାବରଚନ୍ଦ୍ର ଗହଲୋତଙ୍କ କହିବା ଅନୁସାରେ ଏହି ବିଲ ଦ୍ୱାରା କିନ୍ନର ମାନେ ଅଧିକ ଶସକ୍ତିକରଣ ହୋଇପାରିବେ। ଏହି ବିଷୟ ଉପରେ ବିଭିନ୍ନ ୱେବସାଇଟରେ ଲୋକମାନଙ୍କ ମତ ଗ୍ରହଣ କରାଯାଇଥିବା ମନ୍ତ୍ରୀ କହିଛନ୍ତି। କିନ୍ନର ମାନଙ୍କୁ ଭାରତରେ ଭେଦଭାବ, ଶିକ୍ଷାର ଅଭାବ, ବେକାରୀ, ଚିକିତ୍ସା ସୁବିଧା ଭଳି ଗୁରୁତ୍ୱପୁର୍ଣ୍ଣ ବିଷୟରେ ଦୃଷ୍ଟି ଦେବା ପାଇଁ ଏହି ବିଧେୟକ ଅଣାଯାଇଥିବା କୁହାଯାଉଛି। ଏହି ବିଧେୟକ ଅନୁସାରେ କିନ୍ନର ମାନଙ୍କ ସମସ୍ୟା ନେଇ ଏକ ଅଭିଯୋଗ କେନ୍ଦ୍ର ଅନଲାଇନ ଦ୍ୱାରା ଖୋଲାଯିବ। ବିଧେୟକ ନିୟମର ଉଲଙ୍ଘନ କରାଗଲେ ଦଣ୍ଡ ମଧ୍ୟ ଦିଆଯିବ।
