ନୂଆଦିଲ୍ଲୀ : ୨୦୨୦ ଏପ୍ରଲ ୧ରୁ ଦେଶରେ ବିଏସ୍-୪ (ଭାରତ ଷ୍ଟେଜ୍-୪) ଗାଡ଼ିର ବିକ୍ରି ଏବଂ ପଞ୍ଜିକରଣ ହେବନାହିଁ। ସୁପ୍ରିମକୋର୍ଟ ବୁଧବାର ଏହି ରାୟ ଦେଇଛନ୍ତି। ସୁପ୍ରିମକୋର୍ଟ ଗତ ଅଗଷ୍ଟ ୨୭ରେ ଏହି ମାମଲାର ରାୟ ସଂରକ୍ଷିତ ରଖିଥିଲେ। ବୁଧବାର ଏହି ମାମଲାର ରାୟ ଶୁଣାଇବା ପୂର୍ବକ ସୁପ୍ରିମକୋର୍ଟ ବିଏସ୍-୪ ଗାଡ଼ି ବିକିବା ପାଇଁ ୨୦୨୦ ଏପ୍ରିଲ-୧ ପର୍ଯ୍ୟନ୍ତ ସମୟ ଦେଇଛନ୍ତି । ଏହି ସମୟ ପରେ ଦେଶ ବ୍ୟାପୀ ବିଏସ୍-୪ ଗାଡ଼ି ବିକ୍ରି ଓ ପଞ୍ଜିକରଣ ବନ୍ଦ ହୋଇଯିବ।
ବିଏସ୍-୪ ପ୍ରଦୂଷଣ ନିଷ୍କାସନର ମାନକ ଅଟେ। ଉଲ୍ଲେଖଯୋଗ୍ୟ ଯେ ୨୦୨୦ ବେଳକୁ ବିଏସ୍-୫ ମାନକରୁ ଆଗକୁ ବଢି ବିଏସ୍-୬ ମାନକ ଲାଗୁ କରାଯିବ ବୋଲି କେନ୍ଦ୍ର ସରକାର ୨୦୧୬ରେ ଘୋଷଣା କରିଥିଲେ। ବିଏସ୍-୬ ଇନ୍ଧନରେ ବିଏସ୍-୪ ତୁଳନାରେ ବହୁ କମ ମାତ୍ରାରେ ଗାନ୍ଧକ (ସଲ୍ଫର) ଥାଏ। ଏହାଦ୍ୱାର ପ୍ରଦୂଷଣ ମାତ୍ରା କମିଥାଏ। ଉଚ୍ଚ ବିଏସ୍ ମାନକ ବିଶିଷ୍ଟ ଗାଡ଼ିରୁ କମ ପ୍ରଦୂଷଣ ହୋଇଥାଏ। ସୂଚନା ଅନୁସାରେ ସରକାରୀ ତେଲ କମ୍ପାନୀଗୁଡ଼ିକ ବିଏସ୍-୬ ଇନ୍ଧନ ଯୋଗାଣ ପାଇଁ ବିଶୋଧନାଗାରରେ ୨୮,୦୦୦ କୋଟି ଟଙ୍କା ବିନିଯୋଗ କରିବେ।
ଅଟୋ ମୋବାଇଲ କମ୍ପାନୀଗୁଡ଼ିକୁ ମହଜୁଦ୍ ପୁରୁଣା ଗାଡ଼ି ବିକିବା ପାଇଁ ଜୁନ୍ ୩୦ ପର୍ଯ୍ୟନ୍ତ ସମୟ ସୀମା ଦେବାକୁ ସରକାର ଚାହୁଁଥିଲେ। କିନ୍ତୁ ସୁପ୍ରିମକୋର୍ଟ ଆମିକସ୍ କ୍ୟୁରି ଅପରାଜିତା ସିଂହ ଏହାର ବିରୋଧରେ ଥିଲେ। ଏପରିକି ବିଏସ୍-୬ ମାନକ ବିଶିଷ୍ଟ ଭାରୀଯାନ ବିକିବା ପାଇଁ ୨୦୨୦ ସେପ୍ଟେମ୍ବର ୩୦ ପର୍ଯ୍ୟନ୍ତ ସମୟ ଦେବାର ପ୍ରସ୍ତାବକୁ ମଧ୍ୟ ସେ ବିରୋଧ କରିଥିଲେ।
ପ୍ରକାଶଯୋଗ୍ୟ ଯେ ବିଏସ୍-୪ ଇନ୍ଧନରେ ସଲ୍ଫର ମାତ୍ରା ୫୦ ପିପିଏମ୍ ରହିଥିବାବେଳେ ବିଏସ୍-୬ରେ ଏହି ମାତ୍ରା ୮୦% ହ୍ରାସ ପାଇ ମାତ୍ର ୧୦ ପିପିଏମ ହୋଇଯିବ। ଏହାଦ୍ୱାରା ଗାଡ଼ିମଟର ଦ୍ୱାରା ହେଉଥିବା ବାୟୁ ପ୍ରଦୂଷଣ ବହୁ ମାତ୍ରାରେ କମିଯିବ।