ରୁକୀ .—ଆଇଆଇଟି ରୁକୀରେ ଏକ ପ୍ରକାରର ନୂତନ ଯନ୍ତ୍ର ବିକଶିତ କରାଯାଇଛି। ଏହି ଯନ୍ତ୍ରଟି ଭୂମିକମ୍ପର ଏକ ମିନିଟ ପୂର୍ବରୁ ଏହାର ସୂଚନା ଦେବ । ଭୂକମ୍ପର ସୂଚନା ପାଇଁ ବିକଶିତ କରାଯାଇଥିବା ଏହି ଯନ୍ତ୍ରଟି ଲୋକମାନଙ୍କୁ ଭୂମିକମ୍ପ ବିଷୟରେ ଚେତାବନୀ ଦେବ । ଏହାକୁ ବିକାଶ କରିଥିବା ବୈଜ୍ଞାନିକ ତଥା ଗବେଷକ ପ୍ରଫେସର ମୁକୁଟ ଲାଲ ଶର୍ମା ଏବିଷୟରେ ସୂଚନା ଦେଇଛନ୍ତି ।
ଏହି ଯନ୍ତ୍ରଟିରେ ଅନେକ ପ୍ରକାରର ଭୂକମ୍ପ ସୂଚକ ସେନସ୍ର ଲାଗିଛି । ଭୂଗର୍ଭର ବିଭିନ୍ନସ୍ତରରେ ଭମିକମ୍ପର ତରଙ୍ଗ ଆସିଲେ ଏହା ସହଜରେ ସେ ବିଷୟରେ ଜାଣି ପାରିବ । ୬.୦ ତୀବ୍ରତାର ଭୂମିକମ୍ପ ଆସିଲେ ଏହା ଭିତରେ ଥିବା ସ୍ୱଂୟକ୍ରିୟ ଭୂକମ୍ପ ସୂଚନା ପ୍ରଦାନକାରୀ ପଦ୍ଧତି କାମ କରିବା ଆରମ୍ଭ କରିବ । ଉତ୍ତରାଖଣ୍ଡର ବିଭିନ୍ନ ଭୂମିକମ୍ପ ସକ୍ରିୟ ଅଞ୍ଚଳରେ ଏହି ଚେତାବନୀ ପ୍ରଦାନକାରୀ ଯନ୍ତ୍ରକୁ ଲଗାଯାଇଛି । ଡେରାଡୁନ୍ରେ ଏହି ଯନ୍ତ୍ର ୧୧ ସେକେଣ୍ଡରୁ ଏକ ମିନିଟ ମଧ୍ୟରେ ଚେତାବନୀ ଦେଇ ପାରୁଥିବା ବେଳେ ଦିଲ୍ଲୀରେ ଥିବା ଯନ୍ତ୍ର ଏକ ମିନିଟ୍ ପୂର୍ବରୁ ସୂଚନା ଦେବ ।
ଏହି ଚେତାବନୀ ମିଳିଲେ ନ୍ୟୁକ୍ଲିୟର ପ୍ଲାଣ୍ଟ ବନ୍ଦ କରିହେବ , ମେଟ୍ରୋ ଟ୍ରେନ ଗୁଡିକ ବନ୍ଦ କରି ହେବ ଗ୍ୟାସ ସପ୍ଲାଇକୁ ମଧ୍ୟ ବନ୍ଦ କରାଯାଇ ପାରିବ ।
ଏହି ଚେତାବନୀ ଯନ୍ତ୍ରରେ କୋଠଘରୁ ବଞ୍ଚାଯାଇ ନ ପାରିଲେ ବି ଅନେକ ଜୀବନ ବଞ୍ଚେଇ ହେବ ବୋଲି ଏହାକୁ ବିକାଶ କରିଥିବା ଅଧିକାରୀମାନେ କହିଛନ୍ତି । ଆମେରିକାରୁ ଆସୁଥିବା ଭୂକମ୍ପ ଚେତାବନୀ ଯନ୍ତ୍ର ପାଇଁ ଦେଢ ଲକ୍ଷ ଟଙ୍କା ଖର୍ଚ୍ଚ କରାଯାଉଥିବା ବେଳେ ରୁକୀରେ ବିକଶିତ ଯନ୍ତ୍ର ୫୦ ହଜାର ଟଙ୍କାରେ ଉପଲବ୍ଧ ହେବ ।