ନାବାଳିକା ବଳାତ୍କାରୀଙ୍କୁ ମୃତ୍ୟୁଦଣ୍ଡ

0

ଏନସିବିସିକୁ ସାମ୍ବିଧାନିକ ମାନ୍ୟତା

ନୂଆଦିଲ୍ଲୀ : ସଂସଦରେ ସୋମବାର ଦୁଇଟି ଗୁରୁତ୍ୱପୂର୍ଣ୍ଣ ବିଧେୟକ ଗୃହୀତ ହୋଇଛି। ଗୃହୀତ ବିଧେୟକ ଅନୁଯାୟୀ ୧୨ବର୍ଷରୁ କମ୍‍ ନାବାଳିକାଙ୍କୁ ବଳାତ୍କାର କ୍ଷେତ୍ରରେ ଦୋଷୀଙ୍କ ପାଇଁ ଏଣିକି ମୃତ୍ୟୁଦଣ୍ଡର ବ୍ୟବସ୍ଥା ରହିବ। ସେହିପରି ଜାତୀୟ ପଛୁଆ ବର୍ଗ ଆୟୋଗକୁ ସାମ୍ବିଧାନିକ ମାନ୍ୟତା ପ୍ରଦାନ କରାଯିବ। ନାବାଳିକା ବଳାତ୍କାରୀଙ୍କୁ ମୃତ୍ୟୁଦଣ୍ଡ ପାଇଁ ଆଗତ ଫୌଜଦାରୀ ଆଇନ (ସଂଶୋଧନ) ବିଧେୟକ ୨୦୧୮ ସୋମବାର ରାଜ୍ୟସଭାରେ ଗୃହୀତ ହୋଇଛି। ଏହି ବିଧେୟକ ଅନୁଯାୟୀ ମହିଳାଙ୍କୁ ବଳାତ୍କାର କ୍ଷେତ୍ରରେ ଦୋଷୀଙ୍କୁ ସର୍ବନିମ୍ନ ୧୦ବର୍ଷ ଜେଲ ଦଣ୍ଡାଦେଶ ହେବ। ଜୁଲାଇ ୩୦ରେ ଏହି ବିଧେୟକ ଲୋକସଭାରେ ଗୃହୀତ ହୋଇଥିଲା। ବିଧେୟକଟିକୁ ସିଲେକ୍ଟ କମିଟିକୁ ପଠାଇବା ଲାଗି ରାଜ୍ୟସଭା ସଦସ୍ୟମାନେ ଦାବି କରିଥିଲେ। ମାତ୍ର ସରକାର ଏହାକୁ ଗ୍ରହଣ କରି ନ ଥିଲେ। ଆଲୋଚନା କାଳରେ ସ୍ୱରାଷ୍ଟ୍ର ବିଭାଗ ରାଷ୍ଟ୍ରମନ୍ତ୍ରୀ କିରେନ ରିଜିଜୁ କହିଥିଲେ ଯେ ଏହି ବିଧେୟକ ଜାତୀୟ ସ୍ୱାର୍ଥ ପାଇଁ ଗୁରୁତ୍ୱପୂର୍ଣ୍ଣ। ଏହାଦ୍ୱାରା ନାବାଳିକାମାନଙ୍କୁ ସୁରକ୍ଷା ମିଳିିପାରିବ। ଶେଷରେ ଏହା ବାଚନିକ ଭୋଟରେ ଗୃହୀତ ହୋଇଥିଲା। ନାବାଳିକା ବଳାତ୍କାରୀଙ୍କୁ ମୃତ୍ୟୁଦଣ୍ଡ ଦେବା ଲାଗି ସରକାର ଏପ୍ରିଲ ୨୧ରେ ଆଧ୍ୟାଦେଶ ଆଣିଥିଲେ। ଜାମ୍ମୁ-କାଶ୍ମୀର କଠୁଆ ଓ ଉତ୍ତରପ୍ରଦେଶ ଉନ୍ନାଓ ଘଟଣା ପରେ ସରକାର ଏହି ଅଧ୍ୟାଦେଶ ଆଣିଥିଲେ।
ସୋମବାର ରାଜ୍ୟସଭାରେ ଗୃହୀତ ହୋଇଥିବା ଅନ୍ୟ ଏକ ବିଧେୟକ ହେଲା ସମ୍ବିଧାନ ସଂଶୋଧନ ବିଧେୟକ ୨୦୧୭। ପଛୁଆ ବର୍ଗଙ୍କ ପାଇଁ ଗଠନ ହୋଇଥିବା ଜାତୀୟ ଆୟୋଗ (ଏନସିବିସି)କୁ ସାମ୍ବିଧାନିକ ମାନ୍ୟତା ପ୍ରଦାନ ପାଇଁ ୧୨୩ତମ ସମ୍ବିଧାନ ସଂଶୋଧନ ଲାଗି ସରକାର ଏହି ବିଧେୟକ ଆଣିଛନ୍ତି। ଅଗଷ୍ଟ ୨ରେ ଏହି ବିଧେୟକ ଲୋକସଭାରେ ଗୃହୀତ ହୋଇଥିବାବେଳେ ଏବେ ରାଜ୍ୟସଭାରେ ଗୃହୀତ ହୋଇଛି। ଗୃହରେ ଉପସ୍ଥିତ ଦୁଇ ତୃତୀୟାଂଶ ସଭ୍ୟ ବିଧେୟକକୁ ସମର୍ଥନ କରିଥିଲେ। ସାମାଜିକ ନ୍ୟାୟ ଓ ସଶକ୍ତୀକରଣ ମନ୍ତ୍ରୀ ଥୱରଚାନ୍ଦ ଗେହଲଟ କହିଥିଲେ ଯେ ବିଧେୟକକୁ ରାଷ୍ଟ୍ରପତି ଅନୁମୋଦନ କରିବା ମାତ୍ରେ କମିସନ ଗଠନ କରାଯିବ।

Comments
Loading...