ଋତୁ ବଦଳିବା ସହ ଆମ ଶରୀର ଅନେକ ପ୍ରକାର ରୋଗ ଶିକାର ହୋଇଥାଏ। ଶୀତଦିନେ ବିଶେଷ କରି ଥଣ୍ଡା, ଜ୍ବର, ଫ୍ଲୁ ଇତ୍ୟାଦି ହୋଇଥାଏ। ଥଣ୍ଡା, ଜ୍ବରକୁ ସମସ୍ତେ ସାମାନ୍ୟ ରୋଗ ଭାବି ଥାଆନ୍ତି। କିନ୍ତୁ ଏହା ଅଧିକ ଦିନ ଧରି ଲାଗି ରହିବା ଦ୍ବାରା ଅନ୍ୟ ରୋଗ ହେବାର ସମ୍ଭାବନା ବୃଦ୍ଧି ପାଇଥାଏ। ଶୀତଦିନେ ଥଣ୍ଡା, ଜ୍ବରରୁ ରକ୍ଷା ପାଇବା ପାଇଁ ପ୍ରାକୃତିକ ଉପଚାର କରିବା ଦରକାର। ପ୍ରାକୃତିକ ଉପଚାର କରିବା ଦ୍ବାରା ଶରୀରକୁ କୌଣସି କ୍ଷତି ହୋଇ ନଥାଏ। ଆସନ୍ତୁ ଜାଣିବା ସେସବୁ କ’ଣ ..
ସମସ୍ତେ ସାଧାରଣତଃ ଚା ପିଇବାକୁ ପସନ୍ଦ କରିଥାଆନ୍ତି। ଶୀତଦିନେ ନିଜକୁ ସୁସ୍ଥ ରଖିବା ପାଇଁ ମସଲା ଚା ପିଇବା ଉଚିତ। ଏହି ମସଲା ଚା ପ୍ରସ୍ତୁତ କରିବା ପାଇଁ ଲବଙ୍ଗ, ଅଦା, ଗୋଲମରିଚ, ଗୁଜୁରାତି, ତୁଳସୀ ପତ୍ର ଆବଶ୍ୟକ। ଏହାକୁ ବ୍ୟବହାର କରିବା ଦ୍ବାରା ଶରୀରକୁ ସୁସ୍ଥ ଓ ସତେଜ ଅନୁଭବ ହୋଇଥାଏ। ଏଥିରେ ରୋଗ ପ୍ରତିରୋଧକ ଶକ୍ତି ଥାଏ। ତେଣୁ ମସଲା ଚା ପ୍ରସ୍ତୁତ କରିବା ପାଇଁ ପ୍ରଥମେ ଗ୍ୟାସରେ ଏକ ପାତ୍ର ବସାଇ ସେଥିରେ ଏକ ଗ୍ଲାସ ପାଣି ନିଅନ୍ତୁ। ପାଣି ଫୁଟିଲା ପରେ ସେଥିରେ ଚା ପତି ପକାନ୍ତୁ। ସେଥିରେ ଲବଙ୍ଗ, ଅଦା, ଗୋଲମରିଚ, ଗୁଜୁରାତି, ତୁଳସୀ ପତ୍ର ଇତ୍ୟାଦିକୁ ପକାଇ ଦିଅନ୍ତୁ। ପାଣି ଅଧା ହେଲା ପର୍ଯ୍ୟନ୍ତ ତାକୁ ଫୁଟାନ୍ତୁ। ତାକୁ ଗ୍ୟାସରୁ ଓହ୍ଲାଇ କପକୁ ଢାଳନ୍ତୁ। ସେଥିରେ ଏକ ଚାମଚ ମହୁ ପକାଇ ପିଅନ୍ତୁ। ଆପଣ ଚାହିଁଲେ ଏଥିରେ କ୍ଷୀର ପକାଇ ମଧ୍ୟ ପ୍ରସ୍ତୁତ କରି ପାରିବେ।
ଏହି ଚା ରେ ଆଣ୍ଟି-ଅକ୍ସିଡାଣ୍ଟ ଗୁଣ ରହିଛି। ଏଥିରେ ପାଲିଫେନଲ ରହିଥିବାରୁ ତାହା ଶରୀରକୁ ଅନେକ ରୋଗ ସହ ଲଢିବାକୁ ସକ୍ଷମ କରିଥାଏ। ଶରୀରରେ ରହିଥିବା ଅନେକ କୋଷଗୁଡିକୁ କ୍ଷତି ହେବାରୁ ରକ୍ଷା କରିଥାଏ। ତେଣୁ ଏହା ଶୀତ ଦିନେ ଥଣ୍ଡା, ଜ୍ବରରୁ ରକ୍ଷା କରିଥାଏ।
ମସଲା ଚା ପିଇବା ଦ୍ବାରା ପାଚନ କ୍ରିୟା ଠିକ ଭାବେ ହୋଇଥାଏ। ଗୋଲମରିଚ ଦ୍ବାରା ହଜମ ପ୍ରକ୍ରିୟା ସଠିକ ଭାବେ ହୋଇଥାଏ। ଏହା ପାଚନ ତନ୍ତ୍ରକୁ ମଜଭୂତ ରଖିଥାଏ।
ମସଲା ଚାରେ ଅଦା ପଡିଥିବାରୁ ତାହା ଅଧିକ ସ୍ବାଦିଷ୍ଟ ଲାଗିଥାଏ। ଅଦାରେ ଅନେକ ଔଷଧୀୟ ଗୁଣ ରହିଛି। ଏଥିରେ ଥିବା ଔଷଧୀୟ ଗୁଣ ଶରୀରକୁ ଅନେକ ରୋଗ ଠାରୁ ଦୂରେଇ ରଖିଥାଏ।
ଲବଙ୍ଗ ଓ ଗୁଜୁରାତି ମଧ୍ୟ ଶରୀରକୁ ଅନେକ ରୋଗ ଠାରୁ ଦୂରେଇ ରଖିବାରେ ସହାୟକ ହୋଇଥାଏ।