କୋଣାର୍କ : ଵୁଧବାର ଦିବା ୨ଘଟିକା ସମୟରେ ନେପାଳର ରାଷ୍ଟ୍ରଦୂତ ମଦନ ଭଟ୍ଟରାୟ ସପରିବାର ବିଶ୍ୱ ଐତିହ୍ୟ କୋଣାର୍କ ସୂର୍ଯ୍ୟ ମନ୍ଦିର ପରିଦର୍ଶନ କରିଥିବା ଜଣାପଡିଛି। କୋଣାର୍କ ସୂର୍ଯ୍ୟ ମନ୍ଦିରରର ମୁଖ୍ୟ ଫାଟକ ସମ୍ମୁଖରେ କୋଣାର୍କ ପର୍ଯ୍ୟଟନ ଅଧିକାରୀ ସରୋଜ କାନ୍ତ ପ୍ରଧାନ ନେପାଳର ରାଷ୍ଟ୍ରଦୂତ ଶ୍ରୀ ଭଟ୍ଟରାୟ ସପରିବାରଙ୍କୁ ସ୍ଥାନୀୟ ପର୍ଯ୍ୟଟନ ବିଭାଗ ପକ୍ଷରୁ ସ୍ବାଗତ ସମ୍ବର୍ଦ୍ଧନା ଜ୍ଞାପନ କରିଥିଲେ। ପରେ ପରେ ରାଷ୍ଟ୍ରଦୂତ ଶ୍ରୀ ଭଟ୍ଟରାୟ ସପରିବାର ବିଶ୍ୱ ଐତିହ୍ୟ କୋଣାର୍କର ସୂର୍ଯ୍ୟ ମନ୍ଦିର ପରିଦର୍ଶନ କରିଥିଲେ। ସରକାରୀ ସ୍ଵୀକୃତିପ୍ରାପ୍ତ ଗାଇଡ ଆଭାସ ଚରଣ ମହାନ୍ତି ରାଷ୍ଟ୍ରଦୂତ ଶ୍ରୀ ଭଟ୍ଟରାୟ ସପରିବାରଙ୍କୁ ସୂର୍ଯ୍ୟ ମନ୍ଦିରର ଐତିହ୍ୟ, କଳା, ସଂସ୍କୃତି ଓ ଏହାର ଇତିହାସ ଓ ଗାଥା ସମ୍ବନ୍ଧରେ ଵିଶଦ ଭାଵରେ ଅବଗତ କରାଇଥିଲେ। ପରେ ପରେ ରାଷ୍ଟ୍ରଦୂତ ସପରିବାର ଇଣ୍ଡିଆନ ଅଏଲ ଫାଉଣ୍ଡେସନ ପକ୍ଷରୁ ନିର୍ମିତ ଇଣ୍ଟରପିଟେସନ କେନ୍ଦ୍ର ବୁଲି ଦେଖିବା ସହ ମନ୍ଦିର ସମ୍ପର୍କରେ ସବିଶେଷ ତଥ୍ୟ ଆଧାରିତ ତଥ୍ୟ ଭିତିକ ଫିଲ୍ମକୁ ଉପଭୋଗ କରିଥିଲେ। ଏହି ଗସ୍ତ ସମୟରେ କୋଣାର୍କ ଥାନା ଏସ., ଆଇ ପ୍ରଫୁଲ୍ଲ ନାୟକ, କୋଣାର୍କ ପର୍ଯ୍ୟଟନ ଅଧିକାରୀ ସରୋଜ କାନ୍ତ ପ୍ରଧାନ, କୋଣାର୍କ ମନ୍ଦିର ଦାୟିତ୍ବ ରେ ଥିବା ଏଏସଆଇ ଅଧିକାରୀ ଚିତ୍ତ ରଞ୍ଜନ ଦାଶ ପ୍ରମୁଖ ଉପସ୍ଥିତ ଥିଲେ।
