କଳାପଥର(ବାଙ୍କୀ) : ବାଙ୍କୀ ବ୍ଳକ ଅଧିନସ୍ଥ ପୁଇଁଚା ପଞ୍ଚାୟତର ପଣ୍ଡାଳମ ଗ୍ରାମରେ ବିଜୁ ପକ୍କାଘର ବଣ୍ଟନରେ ବ୍ୟାପକ ଦୁର୍ନୀତି କରାଯାଇଥିିବା ସଂମ୍ପୃକ୍ତ ଗ୍ରାମର ଗ୍ରାମବାସୀମାନଙ୍କ ପକ୍ଷରୁ ଅଭିଯୋଗ କରାଯାଇଛି। ଗ୍ରାମ ମାନଙ୍କରେ ରହୁଥିବା ଗରିବ ତଥା ଅସହାୟ ଲୋକଙ୍କ ପାଇଁ ସରକାର ସ୍ଥାନିୟ ବିଧୟକଙ୍କ ଚିଠାରେ ୨୦୦ଟି ମାଗଣା ଘର ବାଣ୍ଟିବା ପାଇଁ କ୍ଷମତା ପ୍ରଦାନ କରିଥିବାବେଳ ବାଙ୍କୀରେ ଏହି ଘର ଗୁଡିକ ଧନୀ ଶ୍ରେଣୀର ଲୋକ, କୋଠା ବାଡି ଥିବା ଲୋକ ଓ ଚାକିରିଆ ପରିବାରକୁ ବଣ୍ଟନ କରାଯାଇଛି। ପଞ୍ଚାୟତ ଦାୟିତ୍ୱରେ ଥିବା ନିର୍ବାହି ଅଧିକାରିମାନେ ହାତ ଗୁଞ୍ଜା ନେଇ ଅଯୋଗ୍ୟ ବ୍ୟକ୍ତି ମାନଙ୍କ ନାମକୁ ଘର ପାଇବାକୁ ଯୋଗ୍ୟ ବୋଲି ଦର୍ଶାଇଥିବା ଅଭିଯୋଗ ହୋଇଛି। ଫଳରେ ସରକାରଙ୍କ ଏହି ମହତ ଯୋଜନା ଗ୍ରମାଞ୍ଚଳରେ ବିଫଳ ହୋଇଛି। ଖବରଅନୁସାରେ ପୁଇଁଚା ପଞ୍ଚାୟତ ପଣ୍ଡାଳମ ଗ୍ରାମର ଜଣେ ଧନୀ ଲୋକଙ୍କର କୋଠାଘର ଥିବାବେଳେ ତାଙ୍କର ନାମକୁ ବିଜୁ ପକ୍କାଘର ଯୋଜନାରେ ସାମିଲ କରାଯାଇଥିବା ଜଣାପଡିବା ପରେ ଅସନ୍ତୋଷ ପ୍ରକାଶ ପାଇଥିଲା। ଏପରିକି ସଂମ୍ପୃକ୍ତ ହିତାଧିକାରିଙ୍କର ପ୍ରାୟ ୪ ଏକର ସଂମ୍ପତି ରହିଥିବା ଜଣାପଡିଛି। ସେ ଉକ୍ତ ପଞ୍ଚାୟତର ସମିତି ସଭ୍ୟଙ୍କ ଭାଇ ବୋଲି କୁହାଯାଉଛି। ଏପରି ସ୍ଥଳେ ସେହି ନାମକୁ ବାଦ୍ ଦେବା ପାଇଁ ଗ୍ରାମର କେତେଜଣ ବିଜୁ ଜନତାଦଳ ସମର୍ଥକ ବାଙ୍କୀ ବିଡିଓ, ପଞ୍ଚାୟତ କାର୍ଯ୍ୟ ନିର୍ବାହି ଅଧିକାରୀଙ୍କୁ ଭେଟି ଆପତ୍ତି କରିଥିବା ବେଳେ ସୂଚନାଅଧିକାର ଆଇନରେ ତଥ୍ୟ ମାଗିଥିଲେ। ତେବେ ଏହି ତଥ୍ୟ ମାଗିବାର ପ୍ରାୟ ୨ମାସ ବିତି ଗଲାଣି। କିନ୍ତୁ ତଥ୍ୟ ଦିଆ ନଯାଇ ଗତ କିଛିଦିନ ତଳେ କୋଠାଘରେ ଥିବା ବ୍ୟକ୍ତିକୁ ହିତାଧିକାରୀ ଅନୁମତି ପତ୍ର ସହିତ ଆଗୁଆ ୨୦ ହଜାର ଟଙ୍କା ଦିଆଯାଇଛି। ଏହି ଘଟଣା ଜଣାପଡିବାପରେ କିଛି ବିଜେଡି ସମର୍ଥକ ଅସନ୍ତୋଷ ପ୍ରକାଶ କରିଥିଲେ। ଯାହାଦ୍ବାରା ଗ୍ରାମରେ ଦଳ ଦୁଇଭାଗ ହୋଇଯାଇଛି। ଏ ସମ୍ପର୍କରେ ପଞ୍ଚାୟତ କାର୍ଯ୍ୟନିର୍ବାହି ଅଧିକାରୀଙ୍କୁ ପଚାରିରୁ କାର୍ଯ୍ୟଦେଶକୁ ଖାରଜ କରାଯିବ ବୋଲି ସେ ପ୍ରକାଶ କରିଥିଲେ।
