ଜାକର୍ତ୍ତା : ଇଣ୍ଡୋନେସିଆର ଜାକର୍ତ୍ତାଠାରେ ସୋମବାର ସକାଳେ ଏକ ବଡ଼ ଧରଣର ବିମାନ ଦୁର୍ଘଟଣା ଘଟିଛି। ସୂଚନା ଅନୁସାରେ, ଲାୟନ ଏୟାରର ଏହି ବିମାନଟି ଜାକର୍ତ୍ତାରୁ ଉଡ଼ାଣ ଆରମ୍ଭ କରିବାର ୧୩ ମିନଟ୍ ପରେ ହିଁ ଦୁର୍ଘଟଣାଗ୍ରସ୍ତ ହୋଇଥିଲା। ଏଥିରେ ବିମାନ କର୍ମଚାରୀଙ୍କ ସମେତ ମୋଟ୍ ୧୮୮ ଜଣ ଯାତ୍ରୀ ଥିଲେ। ସେମାନଙ୍କ ମଧ୍ୟରେ ୧୭୮ ଜଣ ଲୋକଙ୍କ ବ୍ୟତୀତ ୩ ଶିଶୁ, ୨ ପାଇଲଟ୍ ଓ ୫ କ୍ୟାବିନ୍ ମେମ୍ବର ଥିଲେ। ବିମାନଟି ଦୁର୍ଘଟଣା ଗ୍ରସ୍ତ ହୋଇ ସମୁଦ୍ରରେ ଖସି ପଡ଼ିଥିବା ନେଇ ଇଣ୍ଡୋନେସିଆର ସର୍ଚ୍ଚ ଆଣ୍ଡ୍ ରେସ୍କ୍ୟୁ ଏଜେନ୍ସୀର ମୁଖପାତ୍ର ୟୁସୁଫ୍ ଲତିଫ୍ ସ୍ପଷ୍ଟ କରିଛନ୍ତି।
ମିଳିଥିବା ସୂଚନା ଅନୁସାରେ, ଜାକର୍ତ୍ତାରୁ ସୁମାତ୍ରାର ପଙ୍ଗକଲ୍ ପିନାଙ୍ଗ୍ ଯାଉଥିବା ଜେଟି୬୧୦ ବିମାନ ସକାଳ ୬ଟା ୨୦ ମିନିଟରେ ଜାକର୍ତ୍ତାରୁ ଉଡ଼ାଣ ଆରମ୍ଭ କରିଥିଲା। ଏକ ଘଣ୍ଟା ପରେ ଏହା ୭ଟା ୨୦ ମିନିଟରେ ଗନ୍ତବ୍ୟ ସ୍ଥଳରେ ଅବତରଣ କରିବାର ଥିଲା। ହେଲେ ଉଡ଼ାଣ ଆରମ୍ଭର ୧୩ ମିନିଟ୍ ଅର୍ଥାତ୍ ୬ଟା ୩୩ ମିନିଟ ପରେ ଏହା ସହ ଯୋଗାଯୋଗ ବିଚ୍ଛିନ୍ନ ହୋଇଯାଇଥିଲା। ଏହାପରେ ଅନୁସନ୍ଧାନ ଅଭିଯାନ ଆରମ୍ଭ ହୋଇଥିଲା। ତେବେ ବର୍ତ୍ତମାନ ସୁଦ୍ଧା ଗଣମାଧ୍ୟମକୁ ମିଳିଥିବା ଖବର ଅନୁସାରେ ଏହି ବିମାନ ଦୁର୍ଘଟଣା ଗ୍ରସ୍ତ ହୋଇଛି କି ନାହିଁ ତାହା ସରକାରୀ ଭାବେ ଘୋଷଣା ହୋଇନାହିଁ।
ଅନ୍ୟ ପକ୍ଷରେ ଅନୁସନ୍ଧାନ କରିବା ପରେ ସମୁଦ୍ରରୁ ବିମାନର ଭଗ୍ନାବଶେଷ ମିଳିଥିବା ଜଣାପଡ଼ିଛି।