ନୂଆଦିଲ୍ଲୀ : ଏଣିକି ସେନା ପୁଲିସରେ ୨୦% ମହିଳାଙ୍କୁ ନିଯୁକ୍ତି ଦିଆଯିବ ବୋଲି ଶୁକ୍ରବାର ପ୍ରତିରକ୍ଷା ମନ୍ତ୍ରୀ ନିର୍ମଳା ସୀତାରମଣ ଘୋଷଣା କରିଛନ୍ତି। ସେ କହିଛନ୍ତି ଯେ ମହିଳାଙ୍କୁ ଅଧିକାରୀପାହ୍ୟାର ନିମ୍ନ କର୍ମଚାରୀ (ପର୍ସନାଲ ବିଲୋ ଅଫିସ୍ର ର୍ୟାଙ୍କ) ବା (ପିବିଓଆର) ଭାବେ ନିଯୁକ୍ତି ଦିଆଯିବ। ସରକାରଙ୍କ ଏହି ନିଷ୍ପତ୍ତି ଐତିହାସିକ ବୋଲି ନିର୍ମଳା କହିଛନ୍ତି। ସେନାରେ ମହିଳାଙ୍କ ପ୍ରତିନିଧିତ୍ୱ ବୃଦ୍ଧି ଉଦ୍ଦେଶ୍ୟରେ ଏହି ନିଷ୍ପତ୍ତି ନିଆଯାଇଛି ବୋଲି ନିର୍ମଳା ଟ୍ୱିଟ୍ କରି ସୂଚନା ଦେଇଛନ୍ତି।
ଏହାସହ ସେ ଲେଖିଛନ୍ତି ଯେ ପ୍ରଥମ ଥର ପିବିଓଆର ଭୂମିକାରେ ସେନା ପୁଲିସରେ ମହିଳାଙ୍କୁ ନିଯୁକ୍ତି ଦିଆଯିବ। ଏହା ପୂର୍ବରୁ ସେନା ମୁଖ୍ୟ ଜେନେରାଲ ବିପିନ ରାୱତ ସେନା ପୁଲିସ୍ରେ ମହିଳାଙ୍କୁ ଭର୍ତ୍ତି କରାଯିବ ବୋଲି କହିଥିଲେ। ବର୍ତ୍ତମାନ ସେନାର ମେଡିକାଲ, ଆଇନଗତ, ଶିକ୍ଷା, ଟ୍ରାଫିକ୍ ଏବଂ ଇଂଜିନିୟରିଂ ଭଳି ବିଭିନ୍ନ ବିଭାଗରେ ମହିଳାମାନେ କାର୍ଯ୍ୟ କରୁଛନ୍ତି। ସେନା ପୁଲିସ୍ରେ ନିଯୁକ୍ତି ପାଇବା ପରେ ମହିଳା ପିବିଓଆର ଅଧିକାରୀମାନେ ବଳାତ୍କାର, ଶୋଷଣ, ଚୋରି ଆଦି ମାମଲାର ତଦନ୍ତ ଭାର ନେବେ। ଏପରିକି ସେନା ଅଭିଯାନରେ ଆବଶ୍ୟକ ବେଳେ ସହଯୋଗ କରିବେ। ଏହାସହ ତଲାସୀ ଅଭିଯାନ, ଘେରାବନ୍ଦୀ ଅଭିଯାନ, ମହିଳା ଓ ପିଲା ସାମିଲ ଥିବା ଶରଣାର୍ଥୀଙ୍କ ଭିଡ଼ ନିୟନ୍ତ୍ରଣରେ ମହିଳା ସେନା ପୁଲିସ୍ଙ୍କୁ ମୁତୟନ କରାଯିବ।
