ପୂର୍ଣ୍ଣାଙ୍ଗ ପ୍ରସ୍ତାବ ମିଳିନାହିଁ: କେନ୍ଦ୍ର ସରକାର

0

ନୂଆଦିଲ୍ଲୀ : ପଶ୍ଚିମ ଓ ଦକ୍ଷିଣ ଓଡ଼ିଶାରେ ଓଡ଼ିଶା ହାଇକୋର୍ଟର ଦୁଇଟି ବେଞ୍ଚ ସ୍ଥାପନ ପ୍ରସଙ୍ଗରେ ପୂର୍ଣ୍ଣାଙ୍ଗ ପ୍ରସ୍ତାବ ମିଳିନାହିଁ ବୋଲି କେନ୍ଦ୍ର ସରକାର ସଂସଦରେ ଜଣାଇଛନ୍ତି। ରାଜ୍ୟସଭା ସାଂସଦ ପ୍ରସନ୍ନ ଆଚାର୍ଯ୍ୟଙ୍କ ପ୍ରଶ୍ନର ଉତ୍ତରରେ କେନ୍ଦ୍ର ଆଇନ ରାଷ୍ଟ୍ରମନ୍ତ୍ରୀ ପି ପି ଚୌଧୁରୀ ଦର୍ଶାଇଛନ୍ତି ଯେ ଯଶବନ୍ତ ସିଂ କମିସନଙ୍କ ସୁପାରିସ ଓ ସୁପିମକୋର୍ଟଙ୍କ ପୂର୍ବ ନିର୍ଦେଶମତେ ରାଜ୍ୟ ସରକାର ପୂର୍ଣ୍ଣାଙ୍ଗ ପ୍ରସ୍ତାବ ପଠାଇଲେ କେନ୍ଦ୍ର ସରକାର ପରବର୍ତ୍ତୀ ପଦକ୍ଷେପ ନେବେ। ପ୍ରସ୍ତାବରେ ସଂପୃକ୍ତ ରାଜ୍ୟ ଉଚ୍ଚ ନ୍ୟାୟାଳୟର ମୁଖ୍ୟ ବିଚାରପତିଙ୍କ ସୁପାରିସ ପତ୍ର ସମେତ ରାଜ୍ୟପାଳଙ୍କ ଅନୁମତି ପତ୍ର ଆବଶ୍ୟକ। ହାଇକୋର୍ଟ ବେଞ୍ଚର ସମସ୍ତ ଖର୍ଚ୍ଚ ବହନ କରିବା ଏବଂ ଭିତ୍ତିଭୂମି ଯୋଗାଇ ଦେବା ପାଇଁ ରାଜ୍ୟ ସରକାର କେନ୍ଦ୍ରକୁ ଜଣାଇବେ। ଓଡ଼ିଶାର ପଶ୍ଚିମ ଓ ଦକ୍ଷିଣ ଭାଗରେ ଦୁଇଟି ହାଇକୋର୍ଟ ବେଞ୍ଚ ସ୍ଥାପନ ପାଇଁ ରାଜ୍ୟ ସରକାର ସେପ୍‌ଟେମ୍ବର ୨୦୧୩ରେ ପ୍ରସ୍ତାବ ଦେଇଥିଲେ। କେନ୍ଦ୍ର ସରକାର ଓଡ଼ିଶା ହାଇକୋର୍ଟ ମୁଖ୍ୟ ବିଚାରପତିଙ୍କ ନିକଟକୁ ଡିସେମ୍ବର ୨୦୧୩ରେ ପ୍ରସ୍ତାବ ପଠାଇ ଦେଇଛନ୍ତି ବୋଲି ଜଣାଇଛନ୍ତି। ରାଜ୍ୟର ରାଜ୍ୟପାଳ ଓ ହାଇକୋର୍ଟ ମୁଖ୍ୟ ବିଚାରପତିଙ୍କ ସୁପାରିସ ସମେତ ପୂର୍ଣ୍ଣାଙ୍ଗ ପ୍ରସ୍ତାବ ଆସିଲେ ପରେ ପରବର୍ତ୍ତୀ ପଦକ୍ଷେପ ନିଆଯିବ ବୋଲି କେନ୍ଦ୍ର ଆଇନ ରାଷ୍ଟ୍ରମନ୍ତ୍ରୀ ଶ୍ରୀ ଚୌଧୁରୀ ଜଣାଇଛନ୍ତି।

Comments
Loading...