କଟକ : ଉତ୍କଳମଣି ପଣ୍ଡିତ ଗୋପବନ୍ଧୁ ଦାସଙ୍କ ଜୟନ୍ତୀ ଅବସରରେ ଆଜିଠାରୁ ‘ଗୋପବନ୍ଧୁ ଜ୍ୟୋତି’ ରାଜ୍ୟର ୩୦ଟି ଜିଲା ପରିକ୍ରମା କରିବ। ମଙ୍ଗଳବାର ସନ୍ଧ୍ୟା ୬ଟାରେ ବକ୍ସିବଜାର ଗୋପବନ୍ଧୁ ଭବନରେ ଏହି ଜ୍ୟୋତିରଥକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ପତାକା ଦେଖାଇ ଶୁଭାରମ୍ଭ କରିବେ। ଗୋପବନ୍ଧୁଙ୍କ ଜନ୍ମସ୍ଥାନ ପୁରୀ ଜିଲା ସୁଆଣ୍ଡୋରୁ ଗୋପବନ୍ଧୁଙ୍କ ଜ୍ୟୋତି ‘ସମାଜ’ କାର୍ଯ୍ୟାଳୟକୁ ଅଣାଯିବ। ସନ୍ଧ୍ୟାରେ ଏହି ଅବସରରେ ଆୟୋଜିତ ସଭାରେ ମୁଖ୍ୟମନ୍ତ୍ରୀ ଶ୍ରୀ ପଟ୍ଟନାୟକଙ୍କ ସହିତ ବରିଷ୍ଠ ସ୍ୱାଧୀନତା ସଂଗ୍ରାମୀ ପଦ୍ମଶ୍ରୀ ଭବାନୀଚରଣ ପଟ୍ଟନାୟକ, ଲୋକସେବକ ମଣ୍ଡଳର ରାଷ୍ଟ୍ରୀୟ ଅଧ୍ୟକ୍ଷ ତଥା ‘ସମାଜ’ ପରିଚାଳନା ମଣ୍ଡଳୀ ସଭାପତି ଦୀପକ ମାଲବ୍ୟ, କାର୍ଯ୍ୟନିର୍ବାହୀ ସମ୍ପାଦକ ଭୀମସେନ ଯାଦବ, ‘ସମାଜ’ର ମୁଦ୍ରାକର ଓ ପ୍ରକାଶକ ତଥା ଲୋକସେବକ ମଣ୍ଡଳର ରାଷ୍ଟ୍ରୀୟ ସମ୍ପାଦକ ନିରଞ୍ଜନ ରଥ ଯୋଗଦେବାର କାର୍ଯ୍ୟକ୍ରମ ରହିଛି। ଜ୍ୟୋତିରଥ ଗୋପବନ୍ଧୁ ଭବନରୁ ଏକ ବିଶାଳ ଶୋଭାଯାତ୍ରାରେ ଗଡଗଡିଆ ପର୍ଯ୍ୟନ୍ତ ନିଆଯିବ। ସେଠାରୁ ଜ୍ୟୋତିରଥ ଅନୁଗୋଳ ଜିଲା ଅଭିମୁଖେ ଯାତ୍ରା କରିବ। ପ୍ରକାଶ ଯେ, ୫ବର୍ଷ ଧରି ଗୋପବନ୍ଧୁଙ୍କ ଜୟନ୍ତୀ ଅବସରରେ ଏହି ଜ୍ୟୋତିରଥ ରାଜ୍ୟ ପରିକ୍ରମା କରୁଛି। ଜ୍ୟୋତି ଯାତ୍ରା ଅବସରରେ ବିଭିନ୍ନ କ୍ଷେତ୍ରରେ କୃତିତ୍ୱ ହାସଲ କରିଥିବା ସ୍ୱୟଂସହାୟକ ଗୋଷ୍ଠୀ, ସରପଞ୍ଚ, ସ୍ୱାଧୀନତା ସଂଗ୍ରାମୀ, ସହିଦ ଯବାନଙ୍କ ପରିବାର ଓ ସ୍ୱେଚ୍ଛାସେବୀଙ୍କୁ ସମ୍ବର୍ଦ୍ଧିତ କରାଯାଇଥିବାବେଳେ ଚଳିତବର୍ଷ କୃତୀ ଶିକ୍ଷକଙ୍କୁ ସମ୍ବର୍ଦ୍ଧିତ କରାଯିବାର କାର୍ଯ୍ୟକ୍ରମ ରହିଛି।
