ଦକ୍ଷିଣ-ଏସୀୟର ମିଠା ଭାବେ ପରିଚିତ ‘ଗୋଲାପ ଜାମୁ’ ଆଜିର ସମୟରେ ପୂରା ବିଶ୍ବରେ ପରିଚିତ। ଭାରତ, ନେପାଳ, ମିଆଁମାର୍, ପାକିସ୍ତାନ, ବାଂଲାଦେଶରେ ଏହି ମିଠାର ବିକ୍ରି ସର୍ବାଧିକ ହେଉଥିବାବେଳେ ଏବେ ବିଦେଶୀ ରାଇଜରେ ମଧ୍ୟ ଗୋଲାପ-ଜାମୁ ନିଜ ଆସ୍ଥାନ ଜମାଇ ବସିଲାଣି। ଏଇ କିଛିଦିନ ତଳେ ନ୍ୟୁୟର୍କର ଜଣେ ଶିଳ୍ପପତି ନିଜ ସୋସିଆଲ ଆକାଉଣ୍ଟରେ ‘ଗୋଲାପ-ଜାମୁ’ର ସୁଆଦ ବଖାଣିବା ସହ ଏହାର ନୂତନ ନାମ ‘ଫ୍ରାଏଡ୍ ଇଣ୍ଡିଆନ୍ ଡୋନଟସ୍’ ଦେଇଥିଲେ। ସ୍ଥାନୀୟ ଲୋକେ ମଧ୍ୟ ଗୋଲାପ-ଜାମୁକୁ ଏହି ନୂତନ ନାମରେ ଗ୍ରହଣ କରିନେଇଛନ୍ତି। ବିଦେଶୀ ରାଷ୍ଟ୍ର ଲଣ୍ଡନ, ଆମେରିକା, ଅଷ୍ଟ୍ରେଲିଆରେ ପିଲା ଠାରୁ ବଡ଼ ସମସ୍ତେ ଏଇ ଡୋନଟ୍ ମିଠା ଖାଇବାକୁ ପସନ୍ଦ କରନ୍ତି। ଏବର ସମୟରେ କିନ୍ତୁ ଅତ୍ୟାଧୁନିକ ସୁବିଧାରେ ବିଶ୍ବର ପ୍ରତ୍ୟେକ ପ୍ରାନ୍ତର ପାରମ୍ପରିକ ଖାଦ୍ୟ ବିଦେଶୀ ସ୍ଥାନରେ ମିଳୁଛି। ଗତ କିଛି ବର୍ଷ ମଧ୍ୟରେ ଭାରତ ବାହାରେ ମଧ୍ୟ ଭାରତୀୟ ରେସ୍ତୋରାଁ ଓ ବେକରୀମାନ ଖୋଲିଲାଣି। ଲଣ୍ଡନର ସାଉଥ୍ ହଲ୍ରେ ‘ହଳଦୀରାମ୍’ ମିଠା ଦୋକାନରେ ଦୈନିକ ହଜାରହଜାର ଟଙ୍କାର ଗୋଲାପ-ଜାମୁ ବ୍ୟବସାୟ ହେଉଥିବାର ପ୍ରକାଶ। ସବୁଠୁ ଆଶ୍ଚର୍ଯ୍ୟ ଓ ରୋଚକର ବିଷୟ ଯେ ବିଦେଶୀ ବେକରୀ ଦୋକାନରେ ଏବେ ଭାରତୀୟ ଗୋଲାପ-ଜାମୁର ବିକ୍ରି ଜୋରସୋର୍ରେ ହେଉଛି।
