ସାଉଦିଆରବକୁ ଟ୍ରମ୍ପଙ୍କ ଧମକ

0

ୱାଶିଂଟନ : ୱାଶିଂଟନ ପୋଷ୍ଟର ସାମ୍ବାଦିକ ଜମାଲ ଖାସୋଗିଙ୍କ ହତ୍ୟା ଘଟଣାକୁ ନେଇ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ସାଉଦି ଆରବକୁ ଧମକ ଦେଇଛନ୍ତି। ଶୁକ୍ରବାର ଟ୍ରମ୍ପ କହିଛନ୍ତି ଯେ ଜମାଲଙ୍କ ନିଖୋଜ କିମ୍ବା ହତ୍ୟା ପଛରେ ଯଦି ସାଉଦି ଆରବର ସମ୍ପୃକ୍ତି ପ୍ରମାଣିତ ହୁଏ ତେବେ ଏହାକୁ କଠୋର ଦଣ୍ଡ ଦିଆଯିବ। ସିବିଏସ୍‍ ନ୍ୟୁଜ୍‍କୁ ଏକ ସାକ୍ଷାତକାର ଦେବା ଅବସରରେ ଟ୍ରମ୍ପ ସାଉଦି ଆରବକୁ ଏପରି ଧମକ ଦେଇଛନ୍ତି। ଜମାଲ ଜଣେ ସାଉଦି ଆରବ ନାଗରିକ। ସେ ଆତ୍ମନିର୍ବାସନ ପୂର୍ବକ ଆମେରିକାରେ ରହିଆସୁଥିଲେ। ଅକ୍ଟୋବର ୨ ତାରିଖରେ ସେ ଇସ୍ତାନବୁଲସ୍ଥିତ ସାଉଦି ଆରବର ଦୂତାବାସ ଯାଇଥିବାବେଳେ ନିଖୋଜ ହୋଇଯାଇଥିଲେ। ସାଉଦି ଆରବ ଦୂତାବାସରେ ତାଙ୍କୁ ହତ୍ୟା କରାଯାଇଥିବା କୁହାଯାଇଛି। ତୁର୍କୀର ତଦନ୍ତକାରୀ ଅଧିକାରୀମାନେ ଏହି ଦାବି କରିଥିବାବେଳେ ସାଉଦି ଆରବ ଏହାକୁ ଖଣ୍ଡନ କରିଛି। ଜମାଲଙ୍କ ନିଖୋଜ ଓ ମୃତ୍ୟୁ ଘଟଣାକୁ ନେଇ ବିଶ୍ୱବ୍ୟାପୀ ଚର୍ଚ୍ଚା ଚାଲିଛି। ତେବେ ଜମାଲଙ୍କ ହତ୍ୟା ପଛରେ କାହାର ସମ୍ପୃକ୍ତି ରହିଛି ତାହା ସ୍ପଷ୍ଟ ହୋଇନାହିଁ। ଆମେରିକା ପକ୍ଷରୁ ଏହା ଉପରେ ଅଧିକ ତଦନ୍ତ ଚାଲିଛି।

Comments
Loading...