ଚେନ୍ନାଇ: ସାମୁଦ୍ରିକ ଝଡ଼ ‘ଗଜ’ ମହାବାତ୍ୟାର ରୂପ ନେବା ପରେ ତାମିଲନାଡ଼ୁ ଉପକୂଳରେ ସ୍ଥଳଭାଗ ଛୁଇଁଛି। ‘ଗଜ’ ତାଣ୍ଡବରେ ଏ ପର୍ଯ୍ୟନ୍ତ ୧୩ ଜଣଙ୍କ ମୃତ୍ୟୁ ଘଟିଛି। ୮୧ ହଜାର ଲୋକଙ୍କ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରାଯାଇଛି। ତେବେ ସେଭଳି କୌଣସି ବ୍ୟାପକ ଧନ ହାନି ହୋଇନଥିବା ଜଣାପଡ଼ିଛି।
ଶୁକ୍ରବାର ସକାଳେ ଚେନ୍ନାଇଠାରୁ ୩୦୦ କିମି ଦୂର ନାଗପଟ୍ଟିନମ୍ଠାରେ ଚେନ୍ନାଇ ଅତିକ୍ରମ କରିବା ବେଳେ ପବନର ବେଗ ଘଣ୍ଟାକୁ ୧୨୦ କିମି ରହିଥିଲା। ଆସନ୍ତା ୬ ଘଣ୍ଟା ମଧ୍ୟରେ ‘ଗଜ’ ପଶ୍ଚିମ ଦିଗକୁ ଗତି କରିବା ସହିତ ଦୁର୍ବଳ ହେବ ବୋଲି ପାଣିପାଗ ବିଭାଗ ଅନୁମାନ କରିଛି। ତଥାପି କ୍ଷୟକ୍ଷତି ଘଟାଇବାର ଆଶଙ୍କା ଥିବାରୁ ଲୋକମାନଙ୍କୁ ସ୍ଥାନାନ୍ତର କରାଯାଉଛି। ୬ଟି ଜିଲାରେ ପ୍ରାୟ ୩୦୦ଟି ଆଶ୍ରୟସ୍ଥଳୀ ଖୋଲାଯାଇଛି। ଏନ୍ଡିଆରଏଫ୍ ଓ ଅନ୍ୟ ଉଦ୍ଧାରକାରୀ ଟିମ୍କୁ ମୁତୟନ କରାଯାଇଛି। ଦୁଇଟି ନୌସେନା ପୋତ, ହେଲିକପ୍ଟର ଓ ବୋଟ୍ ପ୍ରସ୍ତୁତ ରଖାଯାଇଛି। ତାମିଲନାଡ଼ୁ ଉପକୂଳ ଜିଲା କୁଡ୍ଡାଲୋର, ନାଗପଟ୍ଟିନାମ୍, ଥୋଣ୍ଡି, ପାମ୍ବାନ୍ ଓ ପୁଡୁଚେରୀର କାରାକାଲ୍ରେ ବର୍ଷା ଲାଗି ରହିଛି। ୪ଟି ଏକ୍ସପ୍ରେସ ଟ୍ରେନ୍ ସହିତ ୭ଟି ଟ୍ରେନକୁ ବାତିଲ୍ କରାଯାଇଛି। ସ୍କଲ୍ କଲେଜ୍ ବନ୍ଦ ରହିବା ସହିତ ପରୀକ୍ଷା ବାତିଲ୍ କରି ଦିଆଯାଇଛି।
