ବେଙ୍ଗାଲୁରୁ : କର୍ଣ୍ଣାଟକ ବାଗାଲକୋଟ ଜିଲା ମୁଧୋଲସ୍ଥିତ ଏକ ଚିନି କଳରେ ରବିବାର ବିସ୍ଫୋରଣ ଘଟି ୬ ଜଣ ଶ୍ରମିକଙ୍କ ମୃତ୍ୟୁ ଘଟିଛି ଓ ୫ ଜଣ ଗୁରୁତର ଆହତ ହୋଇଛନ୍ତି। ଆହତଙ୍କୁ ସ୍ଥାନୀୟ ହସ୍ପିଟାଲରେ ଭର୍ତ୍ତି କରାଯାଇଛି।
ସୂଚନା ଅନୁସାରେ ଦୁର୍ଘଟଣାଗ୍ରସ୍ତ ଚିନି କଳର ମାଲିକ ହେଉଛନ୍ତି ବିଜେପି ବିଧାୟକ ମୁର୍ଗେଶ ନିରାନି ଓ ତାଙ୍କ ଭାଇ ସଂଗାମେଶ। ନିରାନିଙ୍କ କହିବା ଅନୁସାରେ ରବିବାର ଚିନି କଳରେ ୧୦୦୦ ଜଣ ଶ୍ରମିକ କାର୍ଯ୍ୟ କରୁଥିଲେ। ତେବେ ମଧ୍ୟାହ୍ନ ସମୟରେ ବଏଲରରେ ବିସ୍ଫୋରଣ ଘଟିଥିଲା। ସେଠାରେ ମାତ୍ର ୭ ଜଣ ଶ୍ରମିକ କାର୍ଯ୍ୟ କରୁଥିଲେ। ତେବେ ବିଶେଷ ସୂତ୍ରରୁ ମିଳିଥିବା ସୂଚନା ଅନୁସାରେ ବଏଲରରେ ୧୧ରୁ ଊର୍ଦ୍ଧ୍ବ ଶ୍ରିମକ କାର୍ଯ୍ୟ କରୁଥିଲେ। ବିସ୍ଫୋରଣରେ ୬ ଜଣ ପ୍ରାଣ ହରାଇଛନ୍ତି ଓ ୫ ଜଣ ଗୁରୁତର ଆହତ ହୋଇଛନ୍ତି। ପୁଲିସ୍ ଓ ଅଗ୍ନିଶମ ବାହିନୀ ଘଟଣାସ୍ଥଳରେ ପହଞ୍ଚିଛନ୍ତି। ଏନେଇ ମୁଧୋଲ ଥାନାରେ ଏକ ମାମଲା ରୁଜୁ ହୋଇଥିବା ଜଣାପଡିଛି।
