ଗଜପତି: ଗଜପତି ଜିଲା ରାୟଗଡ଼ ବ୍ଲକ୍ ଗଙ୍ଗାବାଡ଼ ପଞ୍ଚାୟତର ବାରିଘର ଗ୍ରାମରେ ବର୍ଷା ଯୋଗୁଁ ଏକ ବଡ଼ ଧରଣର ଅଘଟଣ ଘଟିଛି। ଶୁକ୍ରବାର ପାହାଡ଼ ଧସିବା ଫଳରେ ୧୨ଜଣ ଲୋକଙ୍କର ମୃତ୍ୟୁ ହୋଇଛି। ମୃତକଙ୍କ ମଧ୍ୟରେ ୫ଜଣ ଶିଶୁ ଥିବା ସୂଚନା ମିଳିଛି। ଅନ୍ୟ ୪ଜଣ ନିଖୋଜ ଅଛନ୍ତି।
ମୃତ ବ୍ୟକ୍ତି ମାନେ ହେଲେ ଦଣ୍ଡପାଣି ଭୂୟାଁ, ସୁମିତ୍ରା ଭୂୟାଁ, ସୋମନାଥ କାଥରେନ୍, ଜଗନ କାଠି, ମୀନାକ୍ଷୀ ଶବର, ଦିଲି ଶବର, ଗଙ୍ଗାଧର ବେହେରା, ଦିନେଶ ଭୂୟାଁ, ଲାଲୁ ବେହେରା, ଜୟଚନ୍ଦ୍ର ଭୁଟାନ, ସୁରମତୀ ଜାନି, ଚମ୍ପା ଭୁଟାନ। ୪ ଜଣ ନିଖୋଜମାନେ ହେଲେ କଟି ଭୂୟାଁ, ବାସନ୍ତୀ ଭୂୟାଁ, ବାସୁମତି ଭୂୟାଁ ଓ ବିଶମ୍ବର ଶବର।
ସୂଚନା ଅନୁଯାୟୀ, ତିତଲି ପ୍ରଭାବରେ ହେଉଥିବା ବର୍ଷାରୁ ରକ୍ଷା ପାଇବା ପାଇଁ ସମସ୍ତେ ଏକ ପାହାଡ ତଳେ ଆଶ୍ରୟ ନେଇଥିବା ବେଳେ ଅଘଟଣ ଘଟିଥିଲା। ପ୍ରବଳ ବର୍ଷା ଯୋଗୁଁ ପାହାଡ ଧସିଯିବାରୁ ଏହାର ଅତି ନିକଟରେ ଥିବା ବାରିଘର ସମେତ ଅନ୍ୟ କିଛି ଗ୍ରାମରେ ବ୍ୟାପକ କ୍ଷୟକ୍ଷତି ହୋଇଛି। ମୃତକଙ୍କ ପୋଷ୍ଟମର୍ଟମ ପରେ ସେମାନଙ୍କ ପରିବାରକୁ ସରକାରୀ ସହାୟତା ପ୍ରଦାନ କରାଯିବ ବୋଲି ଏସ୍ଆରସି ସୂଚନା ଦେଇଛନ୍ତି।
