ହାତରେ ୪ ବନ୍ଧୁକ ଧରି ନାଚିଥିବା ବିଧାୟକ ବିଜେପିରୁ ବହିଷ୍କୃତ

ଡେରାଡୁନ: ଏକ ପାର୍ଟି ଚାଲିଥିବାବେଳେ ହାତରେ ୪ଟି ବନ୍ଧୁକ ଧରି ନାଚିଥିବା ଉତ୍ତରାଖଣ୍ଡର ଖାନପୁର ବିଜେପି ବିଧାୟକ କନୱର ପ୍ରଣବ ସିଂହ ଓରଫ ଚାମ୍ପିୟନଙ୍କୁ ଦଳରୁ ବହିଷ୍କାର କରାଯାଇଛି। ବିଜେପି ତାଙ୍କୁ ୬ବର୍ଷ ପାଇଁ ବହିଷ୍କାର କରିଛି। ପୂର୍ବରୁ ଗତ ଜୁନରେ ଜଣେ ସାମ୍ବାଦିକଙ୍କୁ ଦୁର୍ବ୍ୟବହାର କରିବା ଏବଂ ଧମକ ଦେବା ନେଇ ଅଭିଯୋଗ ହେବା ପରେ ବିଜେପି ତାଙ୍କୁ ଦଳରୁ ନିଲମ୍ବନ କରିଥିଲା। ନିଲମ୍ବନ ସମୟରେ ବି ତାଙ୍କ ଆଚରଣରେ କୌଣସି ପରିବର୍ତ୍ତନ ଆସି ନ ଥିଲା। ବରଂ ସେ ଦିନକୁ ଦିନ ଅଧିକ ବିଶୃଙ୍ଖଳିତ ଆଚରଣ ଦେଖାଉଥିଲେ। ଗତ ସପ୍ତାହରେ ବିଧାୟକ ନିଜ ବାସଭବନରେ ଏକ ପାର୍ଟି ରଖିଥିଲେ। ଏଥିରେ ତାଙ୍କ ସମର୍ଥକମାନେ ଯୋଗଦେଇଥିଲେ। ଏହି ଅବସରରେ ସେ ନିଶାସକ୍ତ ଅବସ୍ଥାରେ ହାତରେ କାରବାଇନ ସହିତ ୪ଟି ବନ୍ଧୁକ ଧରି ନାଚିଥିଲେ, ଯାହାର ଏକ ଭିଡିଓ ସୋସିଆଲ ମିଡିଆରେ ଭାଇରାଲ ହୋଇଥିଲା। ଏପରି କି ସେ ଉତ୍ତରାଖଣ୍ଡର ଜଣେ ବିଧାୟକ ହୋଇ ବି ନିଜ ରାଜ୍ୟ ବିଷୟରେ ଅପଶବ୍ଦ ପ୍ରୟୋଗ କରି ଗାଳିଗୁଲଜ କରୁଥିବା ଭିଡିଓରେ ଦେଖାଯାଇଥିଲା। ଭିଡିଓ ଭାଇରାଲ ହେବା ପରେ ବିଜେପି ତାଙ୍କ ବିରୋଧରେ ଏପରି କାର୍ଯ୍ୟାନୁଷ୍ଠାନ ଗ୍ରହଣ କରିଛି। ଅନ୍ୟପଟେ ବିଧାୟକ କହିଛନ୍ତି, ଭିଡିଓଟି ୩ବର୍ଷ ତଳର। ସେ ଯେତେବେଳେ କଂଗ୍ରେସରେ ଥିଲେ ସେହି ସମୟରେ ଉକ୍ତ ଭିଡିଓଟି ଶୁଟ୍‍ ହୋଇଥିଲା।