ମହାରାଷ୍ଟ୍ର ବିଧାନସଭା ନିର୍ବାଚନ : ପରିବାର ସହ ଆସି ମତଦାନ କଲେ ସଚିନ

ମୁମ୍ବଇ : ମହାରାଷ୍ଟ୍ରରେ ୨୮୮ବିଧାନସଭା ଆସନ ପାଇଁ ସୋମବାର ମତଦାନ ଚାଲିଛି। ସକାଳ ୭ଟାରୁ ମହାରାଷ୍ଟ୍ରରେ ମତଦାନ ଆରମ୍ଭ ହୋଇଥିବାବେଳେ ଅପରାହ୍ନ ୫ଟା ପର୍ୟ୍ୟନ୍ତ ଏହା ଚାଲିବ। ଲୋକତନ୍ତ୍ରର ଏହି ମହାନ ପର୍ବରେ ଭାରତର ପୂର୍ବତନ କ୍ରିକେଟର ତଥା ମାଷ୍ଟର ବ୍ଲାଷ୍ଟର ସଚିନ ତେନ୍ଦୁଲକର ସାମିଲ ହୋଇଛନ୍ତି। ସଚିନ ନିଜ ପରିବାର ସହ ମତଦାନ କେନ୍ଦ୍ରରେ ପହଞ୍ଚି ମତଦାନ କରିଥିବା ଜଣାପଡ଼ିଛି। ସେ ତାଙ୍କ ପତ୍ନୀ ଅଞ୍ଜଳି ତେନ୍ଦୁଲକର ଓ ପୁଅ ଅର୍ଜୁନ ତେନ୍ଦୁଲକରଙ୍କ ସହ ମହାରାଷ୍ଟ୍ରର ବାନ୍ଦ୍ରା ମତଦାନ କେନ୍ଦ୍ରକୁ ଆସି ଭୋଟ ଦେଇଥିଲେ।


ମହାରାଷ୍ଟ୍ରରେ ମୋଟ ୩୨୩୭ ପ୍ରାର୍ଥୀ ନିର୍ବାଚନ ମଇଦାନକୁ ଓହ୍ଲାଇଛନ୍ତି। ସେମାନଙ୍କ ମଧ୍ୟରେ ୨୩୫ ଜଣ ମହିଳା ପ୍ରାର୍ଥୀ ରହିଛନ୍ତି। ୬୬ ହଜାର ୬୬୧ ବୁଥରେ ରାଜ୍ୟର ପ୍ରାୟ ୮କୋଟି ୯୦ ଲକ୍ଷ ଭୋଟର ଏମାନଙ୍କ ଭାଗ୍ୟ ନିର୍ଦ୍ଧାରଣ କରିବେ। ଏହାର ଫଳାଫଳ ଆକ୍ଟୋବର ୨୪ତାରିଖରେ ଜଣାପଡିବ।