ଭୁବନେଶ୍ବର : ଭାରତକୁ ୨୦୨୩ ପଞ୍ଚଦଶତମ ପୁରୁଷ ହକି ବିଶ୍ବକପ ଆୟୋଜନ ନେଇ ଅଧିକାର ମିଳିଛି। ଲଗାତାର ଭାରତ ଦ୍ବିତୀୟ ଥର ପାଇଁ ହକି ବିଶ୍ବକପ ଆୟୋଜନ କରିବ। ୨୦୧୮ ହକି ବିଶ୍ବକପରେ ପୋଡ଼ିୟମ ଶୀର୍ଷ ସ୍ଥାନ ହାସଲ ନେଇ ଆମ ନିକଟେର ସୁଯୋଗ ରହିଥିଲେ ମଧ୍ୟ ପ୍ରଦର୍ଶନ ନୈରାଶ୍ୟଜନକ ରହିଥିଲା। ଜାତୀୟ କ୍ରୀଡ଼ା ହକି ବିଶ୍ବକପକୁ ଆମେ ପୁନର୍ବାର ଘରୋଇ ପଡ଼ିଆରେ ଖେଳିବାର ସୁଯୋଗ ପାଇବୁ। ୧୯୭୫ ପରେ ଆଉ ଥରେ ପୋଡିୟମର ଶୀର୍ଷ ସ୍ଥାନରେ ଛିଡ଼ା ହେବା ନେଇ ଆମ ନିକଟରେ ଆଉ ଏକ ସୁଯୋଗ ଆସିଛି ବୋଲି କହିଛନ୍ତି ଭାରତୀୟ ହକି ଦଳର ଅଧିନାୟକ ମନପ୍ରୀତ ସିଂହ।
କଳିଙ୍ଗ ଷ୍ଟାଡ଼ିୟମରେ ୨୦୧୮ରେ ଖେଳାଯାଇଥିବା ହକି ବିଶ୍ବକପରେ ଆମେ ଆଶା ଅନୁଯାୟୀ ପ୍ରଦର୍ଶନ କରିପାରିନଥିଲୁ । ଘରୋଇ ପଡ଼ିଆରେ ବିଶ୍ବକପ ଜିତିବା ନେଇ ଆମ ନିକଟରେ ସୁଯୋଗ ରହିଥିଲେ ମଧ୍ୟ କ୍ବାର୍ଟର ଫାଇନାଲରେ ନେଦରଲାଣ୍ଡ୍ସ ନିକଟରୁ ପରାଜିତ ହୋଇଥିଲୁ। ଯାହା ଏବେ ବି ଆମକୁ ଆନ୍ଦୋଳିତ କରୁଛି। ୨୦୨୩ ବିଶ୍ବକପ ଆଉ ୩ ବର୍ଷରୁ ଅଧିକ ସମୟ ରହିଛି। ଦଳରେ ବର୍ତ୍ତମାନ ଏକାଧିକ ଯୁବ ଖେଳାଳି ରହିଛନ୍ତି। ଯୁବ ଖେଳାଳିମାନେ ୩ ବର୍ଷ ମଧ୍ୟରେ ନିଜକୁ ଦକ୍ଷ ଓ ପରିପକ୍ବ କରିବାରେ ସକ୍ଷମ ହୋଇପାରିଥିବେ। ବିଶ୍ବକପ ପୂର୍ବରୁ ଆମକୁ ଏବେ ପ୍ରୋ-ହକି ଲିଗ୍ ଓ ୨୦୨୦ ଟୋକିଓ ଅଲିମ୍ପିକ୍ସ ଓ ଏସିଆନ୍ ଚମ୍ପିଆନ୍ସ ଟ୍ରଫି ହକି ପ୍ରଦର୍ଶନ ଉପରେ ନଜର ଦେଇଛୁ। ପ୍ରୋ- ହକି ଲିଗ୍ ଅଲିମ୍ପିକ୍ସ ପ୍ରସ୍ତୁତିରେ ସହାୟକ ହେବ। ଅଲିମ୍ପିକ୍ସର ପ୍ରଦର୍ଶନ ବିଶ୍ବକପର ମନୋବଳକୁ ବୃଦ୍ଧି କରିବ। ଏଥିନେଇ ଆମକୁ ଏହି ଦୁଇ ତିନି ବର୍ଷ ଭଲ ହକି ଖେଳିବାର ସମୟ ଆସିଛି ବୋଲି ମନପ୍ରୀତ କହିଛନ୍ତି। ଓଡ଼ିଶା ସରକାରଙ୍କ ହକି ପ୍ରତି ଉତ୍ସାହ ଓ ଉନ୍ନତମାନର ହକି ଭିତ୍ତିଭୂମି ସହ ୨୦୧୮ ହକି ବିଶ୍ବକପକୁ ଶ୍ରେଷ୍ଠ ଆୟୋଜନରେ ପରିଣତ କରିବାରେ ସଫଳ ହୋଇଥିଲା। ଉକ୍ତ ସଫଳତା ପାଇଁ ଭାରତକୁ ୨୦୨୩ ବିଶ୍ବକପ ଅଧିକାର ମିଳିଛି। ୨୦୨୩ ବିଶ୍ବକପ ଲାଗି ଭାରତ ଆୟୋଜକ ଦଳ ଭାବେ ଯୋଗ୍ୟତା ହାସଲ କରିବ। ଏହା ପୂର୍ବରୁ ଏସିଆ କପ୍ରେ ମଧ୍ୟ ଯୋଗ୍ୟତା ହାସଲ ନେଇ ସୁଯୋଗ ରହିବ। ଏେବ ଆମକୁ ସଠିକ୍ ରାସ୍ତାରେ ପ୍ରସ୍ତୁତ ହେବାକୁ ପଡ଼ିବ ବୋଲି ମନପ୍ରୀତ କହିଛନ୍ତି।
Comments are closed.