ଡ୍ରପ ଆଣ୍ଡ ଗୋ ଲେନରେ ପାର୍କିଂ ନ କରିବାକୁ ସଚେତନତା

ସମ୍ବଲପୁର: ସମ୍ବଲପୁର ରେଳ ଷ୍ଟେସନ ଠାରେ ରେଳବାଇ ସୁରକ୍ଷା ବଳ (ଆରପିଏଫ) ପକ୍ଷରୁ ଯାନବାହନ ପାର୍କିଂକୁ ନେଇ ନୂତନ ସଚେନତା ଅଭିଯାନ ଶୁକ୍ରବାରରୁ ଆରମ୍ଭ କରାଯାଇଛି। ରେଳ ଷ୍ଟେସନକୁ ଆସୁଥିବା ଯାତ୍ରୀ ଭିଡକୁ ନିୟନ୍ତ୍ରଣ କରିବା ସହିତ ଶୃଙ୍ଖଳିତ ପାଇଁ ଷ୍ଟେସନ ସମ୍ମୁଖରେ ଥିବା ଡ୍ରପ ଆଣ୍ଡ ଗୋ ଲେନ ରେ ଯାନବାହାନ ପାର୍କିଂ ଉପରେ କଟକଣା ଜାରି କରାଯାଇଛି। ଏ ସର୍ମ୍ପକରେ ଆରପିଏଫ ଥାନାଧିକାରୀ ମୁନ୍ନା ଯାଦବ ଙ୍କ ସୂଚନାନୁଯାୟୀ, ରେଳ ଷ୍ଟେସନରେ ସମ୍ମୁଖରେ ଥିବା ଡ୍ରପ ଆଣ୍ଡ ଗୋ ଲେନରେ ଅନେକ ବ୍ୟକ୍ତି ନିୟମ ଭାଙ୍ଗି ସେଠାରେ ବେଆଇନ ଭାବରେ ପାର୍କିଂ କରୁଛନ୍ତି। ଫଳରେ ଯାତ୍ରୀ ମାନଙ୍କର ଯାତାୟାତରେ ଅସୁବିଧା ସୃଷ୍ଟି ହେଉଛି। ଏଥି ପାଇଁ ଆରପିଏଫ ପକ୍ଷରୁ ଆଜି ଠାରୁ ଡ୍ରପ ଆଣ୍ଡ ଗୋ ଲେନ ରେ ଯାନବାହନ ପାର୍କିଂ ନ କରିବାକୁ ସ୍ୱତନ୍ତ୍ର ଅଭିଯାନ ଆରମ୍ଭ କରାଯାଇଛି। ଏହି ଅଭିଯାନର ପ୍ରଥମ ଦିବସରେ ଆରପିଏଫ ଅଧିକାରୀ ଓ କର୍ମଚାରୀ ମାନେ ଏପରି ବେଆଇନ ପାର୍କିଂ ନ କରିବାକୁ ଜନତାଙ୍କୁ ସଚେତନ କରିଥିଲେ। ପ୍ରଥମ ଦିନରେ ୧୫ ଜଣ ବ୍ୟକ୍ତି ନିୟମ ଉଲ୍ଲଂଘନ କରିଥିବା ବେଳେ ସେମାନଙ୍କୁ ଆଗାମୀ ଦିନରେ ଏଭଳି ନ କରିବାକୁ ସଚେତନ କରାଯାଇଥିଲା। ଏବେ ସଚେତନ କରାଯାଉଥିବା ବେଳେ ଆଗାମୀ ଦିନରେ ନିୟମ ଉଲ୍ଲଂଘନକାରୀ ଙ୍କ ବିରୋଧରେ ଆଇନ ଅନୁଯାୟୀ କାର୍ଯ୍ୟାନୁଷ୍ଠାନ ଗ୍ରହଣ କରି ମାମଲା ରୁଜୁ କରାଯିବ ବୋଲି ଆରପିଏଫ ଅଧିକାରୀ ମନ୍ନା ଯାଦବ ସୂଚନା ଦେଇଛନ୍ତି। ଅପରପକ୍ଷରେ ଆରପିଏଫ ପକ୍ଷରୁ ନିୟମ ଉଲ୍ଲଂଘନକାରୀ ମାନଙ୍କୁ ଧରିବା ପାଇଁ ଅଜବ ନୀତି ଆପଣେଇ ଗାଡି ଗୁଡିକୁ ରଶିରେ ବାନ୍ଧି ରଖି ଦିଆଯାଉଛି। ପୂର୍ବରୁ ଡିସେମ୍ବର ୨୩ ୨୦୨୨ ତାରିଖରେ ଏଭଳି ଅଭିଯାନ ଆରମ୍ଭ କରାଯାଇଥିଲା। ତେବେ ପରବର୍ତ୍ତୀ ସମୟରେ ତାକୁ ସ୍ଥଗିତ ରଖାଯାଇଥିଲା।