ଭାରତର ଆଶା ଆକାଂକ୍ଷା ପୂରଣ କରିବେ ଯୁବକ – ପ୍ରଧାନମନ୍ତ୍ରୀ

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି ନୂଆଦିଲ୍ଲୀଠାରେ ଜାତୀୟ ସମରଶିକ୍ଷାର୍ଥୀ ବାହିନୀ -ଏନସିସି ରାଲିରେ ଅଂଶଗ୍ରହଣ କରିଛନ୍ତି। ରାଲିରେ ପ୍ରଧାନମନ୍ତ୍ରୀଙ୍କୁ ଗାର୍ଡ ଅଫ ଅନର ଦିଆଯାଇଥିଲା ଏବଂ ସେ ଏନସିସିର ବିଭିନ୍ନ ଦଳ ଓ ବନ୍ଧୁ ତଥା ପଡୋଶୀ ରାଷ୍ଟ୍ରର କ୍ୟାଡେଟମାନଙ୍କ ପରେଡକୁ ନିରୀକ୍ଷଣ କରିଥିଲେ। ସାଂସ୍କୃତିକ ପ୍ରଦର୍ଶନ ସହିତ ଏନସିସି କ୍ୟାଡେଟମାନେ ପ୍ରଧାନମନ୍ତ୍ରୀଙ୍କ ସମ୍ମୁଖରେ ରୋମାଂଚକାରୀ ଖେଳ, ସଂଗୀତ ଓ ମଂଚ କଳା ଭଳି କ୍ଷେତ୍ରରେ ନିଜର କ୍ଷମତାକୁ ପ୍ରଦର୍ଶୀତ କରିଥିଲେ। ପ୍ରଧାନମନ୍ତ୍ରୀ ପ୍ରତିଭାବାନ ଏନସିସି କ୍ୟାଡେଟମାନଙ୍କୁ ପୁରସ୍କାର ପ୍ରଦାନ କରିଥିଲେ। ଏହି ଅବସରରେ ପ୍ରଧାନମନ୍ତ୍ରୀ କହିଥିଲେ ଯେ, ଏନସିସି ଦେଶର ଯୁବକମାନଙ୍କ ମଧ୍ୟରେ ଶୃଙ୍ଖଳା, ଦୃଢ଼ତା ଓ ସମର୍ପଣ ଭାବନା ମଜବୁତ କରିବା ଲାଗି ମଂଚ ପ୍ରଦାନ କରିଥାଏ। ସେ କହିଥିଲେ ଯେ, ଏହି ଆଦର୍ଶ ଫଳରେ ଦେଶର ବିକାଶରେ ସହାୟତା ମିଳିଥାଏ।

ଭାରତ ବିଶ୍ୱର ସବୁଠୁ ଯୁବ ଦେଶ କାରଣ ଏଠାରେ ୬୫ ପ୍ରତିଶତରୁ ଅଧିକ ଜନସଂଖ୍ୟାଙ୍କ ଆୟୁ ୩୫ ବର୍ଷରୁ କମ ବୋଲି କହିବା ସହ ମୋଦୀ ଏହି ବାସ୍ତବତାକୁ ନେଇ ଆମେ ଗର୍ବିତ, କିନ୍ତୁ ଯୁବ ସୁଲଭ ଭାବନାକୁ ନେଇ କାମ କରିବା ମଧ୍ୟ ଆମର ଦାୟିତ୍ୱ ବୋଲି କହିଥିଲେ। ସେ କହିଥିଲେ ଯେ, ଏହାର ଅର୍ଥ କୌଣସି ପ୍ରସଙ୍ଗକୁ ଟାଳି ନଦେଇ ତୁରନ୍ତ ତାର ସମାଧାନ କରିବା ଉଚିତ। ଯୁବମନ ଏହା ଚାହିଁଥାଏ ଏବଂ ଏହା ହିଁ ହେଉଛି ଯୁବ ଭାରତ।

ପ୍ରଧାନମନ୍ତ୍ରୀ କହିଥିଲେ ଯେ, ଅତୀତର ଆହ୍ୱାନଗୁଡିକୁ ମୁକାବିଲା କରିବା ସହ ବର୍ତ୍ତମାନର ଆବଶ୍ୟକତା ପ୍ରତି ଧ୍ୟାନ ଦେଇ ଆମେ ଭବିଷ୍ୟତର ଆକାଂକ୍ଷା ଲାଗି କାମ କରିବା ଜରୁରୀ। ସେ କହିଥିଲେ ଯେ, ଭାରତ ଆଜି ଯୁବ ଉତ୍ସାହ ଓ ମନୋଭାବ ସହିତ ଆଗକୁ ବଢ଼ୁଛି। ଆଜି ଭାରତ ନିକଟରେ ଯୁବସୁଲଭ ମାନସିକତା ଓ ମନୋଭାବ ରହିଛି। ଏହି କାରଣରୁ ଆଜି ଏହା ସର୍ଜିକାଲ ଷ୍ଟ୍ରାଇକ, ଏୟାର ଷ୍ଟ୍ରାଇକ ଓ ଆତଙ୍କବାଦୀ କ୍ୟାମ୍ପ ଉପରେ ସିଧାସଳଖ ଆକ୍ରମଣ କରିପାରୁଛି। ସେ କହିଥିଲେ ଯେ, ଯୁବସୁଲଭ ମନୋଭାବ ସମସ୍ତଙ୍କୁ ନେଇ ଆଗକୁ ବଢ଼ିବା ଲାଗି ଚାହିଁଥାଏ, ଏହା ମଧ୍ୟ ଚାହିଁଥାଏ ଯେ, କେହି ଯେପରି ପଛରେ ପଡି ନ ଯାଆନ୍ତି। ସେ କହିଥିଲେ, ଏହି ଭାବନା ସହିତ ଆମେ ବୋଡୋ ରାଜିନାମା ସ୍ୱାକ୍ଷର କଲୁ। ଏଥିରେ ସମସ୍ତ ଅଂଶୀଦାରଙ୍କ ସହିତ ବିଚାରବିମର୍ଶ କରାଗଲା ଓ ବୁଝାମଣା ସ୍ୱାକ୍ଷରିତ ହେଲା।

ଉତ୍ତର-ପୂର୍ବାଂଚଳର ବିକାଶ ବିଷୟରେ ଉଲ୍ଲେଖ କରି ପ୍ରଧାନମନ୍ତ୍ରୀ କହିଥିଲେ ଯେ, ଉତ୍ତର-ପୂର୍ବାଂଚଳର ବିକାଶ ଲକ୍ଷ୍ୟ ନେଇ ଖୋଲା ମନ ଓ ମସ୍ତିସ୍କରେ ସମସ୍ତ ଅଂଶୀଦାରଙ୍କ ସହିତ ଆଲୋଚନା ଆରମ୍ଭ କରାଗଲା। ଯାହାର ଫଳସ୍ୱରୂପ ଆଜି ବୋଡୋ ରାଜିନାମା ହୋଇପାରିଛି। ଯୁବ ଭାରତର ଚିନ୍ତାଧାରା ସମସ୍ତଙ୍କୁ ନେଇ ବିକାଶ ସହିତ ସଭିଙ୍କ ଭରସା ଜିତି ଦେଶକୁ ଆଗକୁ ନେଇଯାଉଛି ବୋଲି ସେ କହିଥିଲେ।

Comments
Loading...