ଷଷ୍ଠ ଅନ୍ତର୍ଜାତୀୟ ଯୋଗ ଦିବସ ସମାରୋହର ଏକ ଅଂଶ ଭାବରେ, ଭାରତ ବାହାରେ ବିଶ୍ୱର ପ୍ରଥମ ଯୋଗ ବିଶ୍ୱବିଦ୍ୟାଳୟ ଲସ୍ ଆଞ୍ଜେଲସରେ ଆରମ୍ଭ ହୋଇଛି। ସେହି ବିଶ୍ୱବିଦ୍ୟାଳୟରେ ପ୍ରାଚୀନ ଭାରତୀୟ ଯୋଗ ସହ ବୈଜ୍ଞାନିକ ସିଦ୍ଧାନ୍ତ ଏବଂ ଆଧୁନିକ ଗବେଷଣା ପଦ୍ଧତି ସମ୍ପର୍କିତ ଶିକ୍ଷା ପ୍ରଦାନ କରାଯାଉଛି।
ନ୍ୟୁୟର୍କର କନସୁଲେଟ୍ ଜେନେରାଲଠାରେ ଅନୁଷ୍ଠିତ ଏକ ଭର୍ଚୁଆଲ୍ କାର୍ଯ୍ୟକ୍ରମରେ ବୈଦେଶିକ ବ୍ୟାପାର ରାଷ୍ଟ୍ରମନ୍ତ୍ରୀ ଭି ମୁରଲୀଧରନ୍ ଏବଂ ବୈଦେଶିକ ବ୍ୟାପାର ଷ୍ଟାଣ୍ଡିଂ କମିଟି ଅଧ୍ୟକ୍ଷ ପି. ପି. ଚୌଧୁରୀ ମିଳିତ ଭାବେ ଏହି ବିଶ୍ୱବିଦ୍ୟାଳୟର ଶୁଭାରମ୍ଭ କରିଛନ୍ତି ଯାହାର ନାମ ବିବେକାନନ୍ଦ ଯୋଗ ବିଶ୍ୱବିଦ୍ୟାଳୟ (VaYU) ରଖାଯାଇଛି। ବିଶିଷ୍ଟ ଭାରତୀୟ ଯୋଗ ଗୁରୁ ତଥା ସ୍ୱାମୀ ବିବେକାନନ୍ଦ ସଂସ୍ଥାନର କୁଳପତି ଡକ୍ଟର ଏଚ୍. ଆର. ନାଗେନ୍ଦ୍ର ଏହି ଯୋଗ ବିଶ୍ୱବିଦ୍ୟାଳୟର ପ୍ରଥମ ଅଧ୍ୟକ୍ଷ ଭାବେ ଦାୟିତ୍ୱ ଗ୍ରହଣ କରିଛନ୍ତି।
ଭର୍ଚୁଆଲ୍ ମାଧ୍ୟମରେ ଏହାର ଉଦଘାଟନ ଉତ୍ସବକୁ ସମ୍ବୋଧିତ କରି ମୁରଲୀଧରନ୍ କହିଛନ୍ତି ଯେ ସ୍ୱାମୀ ବିବେକାନନ୍ଦ ଆମେରିକାରୁ ଭାଇଚାରାର ବାର୍ତ୍ତା ଦେଇଥିଲେ ଏବଂ ପୁଣି ଠାରେ ଭାରତ ବାହାରେ ପ୍ରଥମ ଯୋଗ ବିଶ୍ୱବିଦ୍ୟାଳୟ ମାଧ୍ୟମରେ ଯୋଗର ବାର୍ତ୍ତା ଆମେରିକାରୁ ବିଶ୍ୱକୁ ପ୍ରସାରିତ ହେବ।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଯୋଗ ପରାମର୍ଶଦାତା ଭାବରେ ଜଣାଶୁଣା ନାଗେନ୍ଦ୍ର ତାଙ୍କ ବାର୍ତ୍ତାରେ କହିଛନ୍ତି ଯେ ସ୍ୱାମୀ ବିବେକାନନ୍ଦ ୧୮୯୩ ମସିହାରେ ଚିକାଗୋରେ ବିଶ୍ୱକୁ ଯୋଗର ମହାନତା ବିଷୟ ଜଣାଇଥିଲେ।
Comments are closed.