ୱିକଲିକ୍ସ ପ୍ରତିଷ୍ଠାତା ଜୁଲିଆନ ଆସାଞ୍ଜେ ବ୍ରିଟେନରେ ଗିରଫ

ଲଣ୍ଡନ : ୱିକ୍‍ଲିକ୍ସ ପ୍ରତିଷ୍ଠାତା ଜୁଲିଆନ ଆସାଞ୍ଜେଙ୍କୁ ବ୍ରିଟେନ୍‍ ପୁଲିସ୍‍ ଗୁରୁବାର ଗିରଫ କରିଛି। ସେ ଗତ କିଛି ବର୍ଷ ହେବ ଲଣ୍ଡନସ୍ଥିତ ଇକ୍ୱାଡୋର ଦୂତାବାସରେ ଶରଣ ନେଇଥିଲେ। ଗୁରୁବାର ଇକ୍ୱାଡୋର ତାଙ୍କୁ ଦୂତାବାସରୁ ବାହାର କରିଦେଇଥିଲା। ଏହାପରେ ଲଣ୍ଡନର ମେଟ୍ରୋପୋଲିଟନ ପୁଲିସ୍‍ ତାଙ୍କୁ ହେପାଜତକୁ ନେଇଛି। ତାଙ୍କୁ ୱେଷ୍ଟମିନିଷ୍ଟର ମାଜିଷ୍ଟ୍ରେଟ୍‍ କୋର୍ଟରେ ହାଜର କରାଯିବ ବୋଲି ସୂଚନା ମିଳିଛି।
ପ୍ରକାଶ ଯେ ଜୁଲିଆନ ଆସାଞ୍ଜେ ଗତ ୭ ବର୍ଷ ହେବ ଇକ୍ୱାଡୋର ଦୂତାବାସରେ ଶରଣ ନେଇଥିଲେ। ତାଙ୍କ ଦ୍ୱାରା ପ୍ରକାଶିତ କେତେକ ଗୁପ୍ତ ନଥିପତ୍ର ଯୋଗୁଁ ଆମେରିକା ବିଶ୍ୱସ୍ତରରେ ସମାଲୋଚିତ ହୋଇଥିଲା। ୨୦୧୦ରେ ସେ ବହୁ ସଂଖ୍ୟାରେ ଆମେରିକାର ଗୋପନୀୟ ନଥିପତ୍ର ୱିକଲିକ୍ସ ୱେବସାଇଟରେ ପ୍ରକାଶ କରିଥିଲେ।
ଏକ ଯୌନ ଉତ୍ପୀଡ଼ନ ମାମଲାରେ ସ୍ୱିଡେନ ଜୁଲିଆନ ଆସେଞ୍ଜଙ୍କ ପ୍ରତ୍ୟର୍ପଣ ପାଇଁ ଚେଷ୍ଟା କରିଥିଲା। ଏଥିରୁ ବଞ୍ଚିବା ପାଇଁ ସେ ୨୦୧୨ରେ ଇକ୍ୱାଡୋର ଦୂତାବାସରେ ଶରଣ ନେଇଥିଲେ। ପରେ ସ୍ୱିଡେନ ତାଙ୍କ ବିରୋଧରେ ଥିବା ଯୌନ ଉତ୍ପୀଡ଼ନ ମାମଲାକୁ ଖାରଜ କରିଦେଇଥିଲା। ଜାମିନ ଆବେଦନ ଖାରଜ ହୋଇଯାଇଥିବାରୁ ବ୍ରିଟେନରେ ତାଙ୍କର ଗିରଫ ହେବାର ଆଶଙ୍କା ଥିଲା। ତେଣୁ ସେ ଇକ୍ୱାଡୋର ଦୂତାବାସକୁ ନିଜ ଠିକଣା କରିଦେଇଥିଲେ। ଗତ ବର୍ଷ ଡିସେମ୍ବର ୧୨ରେ ତାଙ୍କୁ ଇକ୍ୱାଡୋର ନାଗରିକତା ମିଳିଥିଲା।

Comments
Loading...