ଚୀନରେ ପୁଣି ଏକ ଭୂତାଣୁ ସଂକ୍ରମଣ: ୭ ମୃତ

ବେଜିଂ : ଚୀନ୍‌ରେ ପୁଣି ଏକ ଭୂତାଣୁ ସଂକ୍ରମଣ ସାମ୍ନାକୁ ଆସିଛି। ଟିକ୍‌ ବା ଜୀବଜନ୍ତୁଙ୍କ ଶରୀରରୁ ରକ୍ତ ଶୋଷୁଥିବା ଏକପ୍ରକାର କୀଟଜନିତ ଏହି ପାଥୋଜେନ୍‌ ଭୂତାଣୁ (ଟିବିଭି) ସଂକ୍ରମଣରେ ୭ଜଣଙ୍କ ପ୍ରାଣହାନି ଘଟିଥିବାବେଳେ ୬୦ ଅସୁସ୍ଥ ଥିବା ସୂଚନା ମିଳିଛି। ଚୀନର ପୂର୍ବାଞ୍ଚଳ ଜିଆଂସୁ ଓ ଅନହୁନି ପ୍ରଦେଶରେ ଏହି ଭୂତାଣୁ ସଂକ୍ରମଣ ବ୍ୟାପିଛି। ଏହାକୁ ନଭେଲ ବୁନିଆାଇରସ୍‌ ବୋଲି କୁହାଯାଉଛି। ଏହାକୁ ସିଭିୟର ଫିଭର ୱିଥ୍‌ ଥ୍ରୋମ୍ବୋସିଟୋଫେନିଆ ସିଣ୍ଡ୍ରମ୍‌ ବା ଏସ୍‌ଏଫ୍‌ଟିଏସ୍‌ ବୋଲି ମଧ୍ୟ କୁହାଯାଉଛି। ଏହାଦ୍ବାରା ଆକ୍ରାନ୍ତ ପ୍ରବଳ କମ୍ପ ସହିତ ଜ୍ବର, ଯନ୍ତ୍ରଣାର ଶିକାର ହେଉଛନ୍ତି। ଆକ୍ରାନ୍ତ ପକ୍ଷାଘାତର ଶିକାର ମଧ୍ୟ ହୋଇଥାଆନ୍ତି। ଟିକ୍ସ ପ୍ରାୟ ୮୩ଟି ଭୂତାଣୁକୁ ପରିବାହିତ କରିଥାଏ। ଡେଙ୍ଗୁ ଭଳି ଏହି ଭୂତାଣୁ ମଶା କାମୁଡ଼ାରେ ବ୍ୟାପିଥାଏ ଏବଂ ମଣିଷ ଶରୀରରୁ ମଣିଷକୁ ମଧ୍ୟ ବ୍ୟାପିବାର ଅଧିକ ଆଶଙ୍କା ରହିଛି। ବୁଢ଼ିଆଣି ପରି ଏହି ଆଠଗୋଡ଼ିଆ କୀଟ ଘାସ ଓ ବୁଦୁବୁଦିଆ ଜଙ୍ଗଲରେ ଦେଖାଯାଏ। ଏଗୁଡ଼ିକ ଗ୍ରୀଷ୍ମ ଋତୁରେ ଅଧିକ ସକ୍ରିୟ ହୋଇଥାଆନ୍ତି। ବିନା ଖାଦ୍ୟରେ ଏହା ଦୀର୍ଘ କାଳ ବଞ୍ଚିବାର ଦେଖାଯାଏ। ୨୦୦୯ରେ ଏହି କୀଟଜନିତ ଭୂତାଣୁ ସଂକ୍ରମଣ ପ୍ରଥମେ ଚୀନର ହେନାନ ଓ ଅନହୁନି ପ୍ରଦେଶରେ ଠାବ କରାଯାଇଥିଲା। ଏ ନେଇ ବିଶ୍ବ ସ୍ବାସ୍ଥ୍ୟ ସଂଗଠନ ପକ୍ଷରୁ ବିଶ୍ବବାସୀଙ୍କୁ ଚେତାଇ ଦିଆଯାଇଥିଲା। ୨୦୧୧ରୁ ୨୦୧୬ ମଧ୍ୟରେ ‘ନେଚର’ ପତ୍ରିକାରେ ଏ ନେଇ ଗବେଷଣାଲବ୍ଧ ବିସ୍ତୃତ ତଥ୍ୟ ପ୍ରକାଶ ପାଇଥିଲା। ଏହି ପାଞ୍ଚ ବର୍ଷ ମଧ୍ୟରେ ପ୍ରାୟ ୧୬୭ଟି ଦେଶରେ ଜନତା ସଂକ୍ରମିତ ହୋଇଥିଲେ ଓ ଆକ୍ରାନ୍ତଙ୍କ ମଧ୍ୟରୁ ୩୦ ପ୍ରତିଶତଙ୍କର ମୃତ୍ୟୁ ହୋଇଥିଲା। ୫୩୬୦ ଲାବୋରେଟୋରୀରେ ପରୀକ୍ଷା ପରେ ଚୀନରେ ଏହି ଭୂତାଣୁ ରହିଥିବା ପ୍ରମାଣିତ ହୋଇଥିଲା। ଏହାର ଟିକା ଉଦ୍‌ଭାବନ ହୋଇ ନାହିଁ।

Comments
Loading...