ରାଜ୍ୟ ଜନଜାତି ସଂଗ୍ରହାଳୟକୁ ଭର୍ଚୁଆଲ୍ ଟୁର୍, କୁଟିଆ କନ୍ଧ ଜନଜାତିଙ୍କ ସ୍ୱଦେଶୀ ଜ୍ଞାନ କୌଶଳରେ ପ୍ରସ୍ତୁତ ପାରମ୍ପରିକ ଔଷଧ
ଭୁବନେଶ୍ୱର: ଅନୁସୂଚିତ ଜନଜାତି ଓ ଅନୁସୂଚିତ ଜାତି ଉନ୍ନୟନ ବିଭାଗ ପକ୍ଷରୁ ପ୍ରତ୍ୟେକ ରବିବାର ଦିନ ଓଡ଼ିଶା ରାଜ୍ୟ ଜନଜାତି ସଂଗ୍ରହାଳୟକୁ ଭର୍ଚୁଆଲ୍ ଟୁର୍ର ବ୍ୟବସ୍ଥା କରାଯାଇଛି। ଦର୍ଶକମାନେ ସେପ୍ଟେମ୍ବର ୨୬ରେଫେସ୍ବୁକ୍ ଓ ଟୁଇଟର ପେଜ୍ @stscdev, @scstrti ଖୋଲି କୁଟିଆ କନ୍ଧ ଜନଜାତିଙ୍କ ସ୍ୱଦେଶୀ ଜ୍ଞାନକୌଶଳରେ ପ୍ରସ୍ତୁତ ପାରମ୍ପରିକ ଔଷଧ ବ୍ୟବହାର ସଂପର୍କରେ ଜାଣିପାରିବେ ବୋଲି ଏସ୍ସିଏସ୍ଟିଆର୍ଟିଆଇର ନିର୍ଦ୍ଦେଶକ ପ୍ରଫେସର ଅଖିଳ ବିହାରୀ ଓତା ପ୍ରକାଶ କରିଛନ୍ତି।
ଓଡ଼ିଶାର କଳାହାଣ୍ଡି ଓ କନ୍ଧମାଳ ଜିଲ୍ଲାରେ ମୁଖ୍ୟତଃ କୁଟିଆ କନ୍ଧ ଜନଜାତି ବସବାସ କରିଥାନ୍ତି। ଝାଡ଼ୁ ତିଆରି, ମ୍ୟାଟ୍ ପ୍ରସ୍ତୁତି ଆଦି ସେମାନଙ୍କର ମୁଖ୍ୟ ପେଶା। ଏହି ଜନଜାତି ମୁଖ୍ୟତଃ ପରିବେଶ ଓ ଅତି ପ୍ରାକୃତିକ ଶକ୍ତି ସହିତ ସଂପୃକ୍ତ। ଶରୀରର ରୋଗ ଉଭୟ ଶରୀର ଓ ଆତ୍ମାକୁ ପ୍ରଭାବିତ କରିଥାଏ ବୋଲି ସେମାନଙ୍କ ଧାରଣା। ଅଲୌକିକ ଶକ୍ତି ଓ ପରିବେଶ କାରଣରୁ ଶରୀରରେ ବାଧା ସୃଷ୍ଟି ହୁଏ ଓ ମନୁଷ୍ୟ ଅସୁସ୍ଥ ହୋଇଥାଏ। ରୋଗ ଉପଶମ କରିବା ପାଇଁ କୁଟିଆ କନ୍ଧ ଜନଜାତି ଦୈବୀଶକ୍ତିର ନିର୍ଦ୍ଦେଶରେ ବୈଦ୍ୟ ଉଦ୍ଭିଦ, ପ୍ରାଣୀ ଓ ଖଣିଜ ସଂପଦରୁ ମିଳୁଥିବା ଔଷଧ ଦେଇଥାନ୍ତି।
କୁଟିଆ କନ୍ଧ ଜନଜାତିଙ୍କର ବୈଦ୍ୟ କିପରି ଔଷଧ ସଂଗ୍ରହ, ପ୍ରକ୍ରିୟାକରଣ ଓ ପାରମ୍ପରିକ ଔଷଧ ଦେବା ପାଇଁ ପରାମର୍ଶ ଦେଇଥାନ୍ତି, ତାହା ଏହି ଚଳଚ୍ଚିତ୍ରରେ ଦର୍ଶକ ଜାଣିପାରିବେ। ଏଥିରୁ ସ୍ପଷ୍ଟ ଅନୁମେୟ ଯେ କୁଟିଆ କନ୍ଧ ଜନଜାତି ଶାରୀରିକ ଅସୁସ୍ଥତାର ମୁଖ୍ୟ କାରଣ ଓ ରୋଗ ଉପଶମ ନିମନ୍ତେ ପ୍ରାକୃତିକ ଉପଚାର ଉପରେ ଗୁରୁତ୍ୱ ପ୍ରଦାନ କରିଥାନ୍ତି।
Comments are closed.