ଗଛ କଟା ବିରୋଧକୁ ନେଇ ଅତାବିରା ଥାନା ଘେରିଲେ ଗ୍ରାମବାସୀ

ରେଙ୍ଗାଲିକ୍ୟାମ୍ପ : ବରଗଡ଼ ଜିଲ୍ଲା ଅତାବିରା ବ୍ଲକ ହିର୍ଲିପାଲି ପଞ୍ଚାୟତର ଭୁଏଟିକ୍ରା ଗ୍ରାମର ଗ୍ରାମବାସୀମାନେ ହନୁମାନ ମନ୍ଦିରରୁ କେନାଲକୁ ଯାଇଥିବା ରାସ୍ତାର ପୁନଃ ନିର୍ମାଣ ପାଇଁ ଦୀର୍ଘ ବର୍ଷ ଧରି ଯୋଜନା କରି ଆସୁଥିଲେ। ଗତ ଦୁଇ ମାସ ଧରି ସେମାନେ ଅଣ୍ଟା ଭିଡିଛନ୍ତି। ଏହି ରାସ୍ତାର ପୁନଃ ନିର୍ମାଣ କରିବେ ଓ ଆବଶ୍ୟକସ୍ଥଳେ ରାସ୍ତାକୁ ଅବରୋଧ କରୁଥିବା ଗଛ ଗୁଡିକୁ ମଧ୍ୟ କଟିବାର ନିଷ୍ପତ୍ତି ନେଇଥିଲେ। କିନ୍ତୁ ଜନୈକ ବ୍ୟକ୍ତି ବିଶେଷ ଏହାର ବିରୋଧ କରି ଗ୍ରାମବାସୀଙ୍କୁ ଅଶ୍ଳୀଳ ଭାଷାରେ ଗାଳି ଗୁଲଜ କରିବା ସହ ଗଛ କାଟିବାକୁ ମନା କରୁଥିଲେ। ଏନେଇ ଗ୍ରାମବାସୀଙ୍କ ପକ୍ଷରୁ ଥାନାରେ ବାରମ୍ବାର ଅଭିଯୋଗ ହୋଇଥିଲା। ଗତ ଜାନୁଆରୀ ୫ତାରିଖରେ ଏକ ରାଜିନାମା କରାଯାଇ ଉଭୟ ପକ୍ଷରୁ ଥାନାରେ ଏହାର  ବୁଝାମଣା ହୋଇଥିଲେ ସୁଦ୍ଧା ଉକ୍ତ ବ୍ୟକ୍ତି ବିରୋଧରୁ ଓହରି ନଥିଲେ । ପ୍ରଶାସନ ପକ୍ଷରୁ ମଧ୍ୟ କୌଣସି ପ୍ରକାର ଠୋସ ପଦକ୍ଷେପ ନିଆ ଯାଇ ନଥିବା ନେଇ ଗ୍ରାମବାସୀ ଅସନ୍ତୋଷ ପ୍ରକାଶ କରିଛନ୍ତି। ଗ୍ରାମବାସୀ ଉକ୍ତ ବ୍ୟକ୍ତିଙ୍କ ବିରୋଧରେ ଅଭିଯୋଗ କରିବା କଥା ହେଲେ ଓଲଟି ଗ୍ରାମବାସୀଙ୍କ ନାମରେ ଥାନାରେ ଅଭିଯୋଗ କରି ବ୍ୟକ୍ତି ଜଣକ ହଇରାଣ ହରକତ କରି ଆସୁଥିବାକୁ ନେଇ ଆଜି ଗ୍ରାମବାସୀଙ୍କ ପକ୍ଷରୁ ଶତାଧିକ ମହିଳା ଓ ପୁରୁଷ ଥାନା ଘେରି ତୁରନ୍ତ ଏହାର ସମାଧାନ କରିବା ପାଇଁ ଦାବି କରିବା ସହ ଆଗାମୀ ଦିନରେ ଏହାର ପଦକ୍ଷେପ ନିଆ ନ ଗଲେ ଜିଲ୍ଲା ଆରକ୍ଷୀ ଅଧିକାରୀ ଓ ଜିଲ୍ଲାପାଳ ଦ୍ୱାରସ୍ଥ ହେବେ ବୋଲି ଚେତାବନୀ ଦେଇଛନ୍ତି। ତେବେ ଦେଖାଯାଉ ଗ୍ରାମବାସୀଙ୍କ ପାଇଁ ପ୍ରଶାସନର ପଦକ୍ଷେପ କଣ ରହୁଛି।

Comments
Loading...