ଜୁଲାଇ ୭ରୁ ଉତ୍କଳ ବିଶ୍ବବିଦ୍ୟାଳୟ ଷଷ୍ଠ ସେମିଷ୍ଟାର ପରୀକ୍ଷା; ଗହଳି କରିବେନି, ମାସ୍କ ପିନ୍ଧିବା ଜରୁରୀ
ଭୁବନେଶ୍ବର : ଉତ୍କଳ ବିଶ୍ବବିଦ୍ୟାଳୟର ‘ୟୁନିଭର୍ସିଟି ଏକ୍ଜାମିନେସନ-୨୦୨୦ ଷଷ୍ଠ ସେମିଷ୍ଟାର ପରୀକ୍ଷା (ରେଗୁଲାର ଓ ବ୍ୟାକ୍) ଜୁଲାଇ ୭ରୁ ଅନୁଷ୍ଠିତ ହେବ। ଉତ୍କଳ ବିଶ୍ବବିଦ୍ୟାଳୟରେ ୨୦୧୭ ବ୍ୟାଚ୍ରେ ସିବିଏସ୍ଇ ଢାଞ୍ଚାରେ ନାମ ଲେଖାଇଥିବା ଯୁକ୍ତ ତିନି କଳା, ବାଣିଜ୍ୟ ଓ ବିଜ୍ଞାନ(ପାସ୍ ଓ ଅନର୍ସ) ଛାତ୍ରଛାତ୍ରୀ ରେଗୁଲାର୍ ପରୀକ୍ଷା ଦେଇପାରିବେ। ସେହିପରି ୨୦୧୬ ବ୍ୟାଚ୍ରେ ନାମ ଲେଖାଇଥିବା ଛାତ୍ରଛାତ୍ରୀ ବ୍ୟାକ୍ପେପର୍ ପରୀକ୍ଷା ଦେଇପାରିବେ। ୭ରୁ ୧୩ ଜୁଲାଇ ମଧ୍ୟରେ ପ୍ରାକ୍ଟିକାଲ୍ ଏବଂ ୧୪ରୁ ୨୩ ଜୁଲାଇ ପର୍ଯ୍ୟନ୍ତ ଥିଓରୀ ପରୀକ୍ଷା କରାଯିବ। ୨୮ ଜୁଲାଇ ସୁଦ୍ଧା ଛାତ୍ରଛାତ୍ରୀମାନେ ପ୍ରୋଜେକ୍ଟ ପେପର୍(ଡିଏସ୍ଇ-୪) ଦାଖଲ କରିବାକୁ ପଡ଼ିବ। ଛାତ୍ରଛାତ୍ରୀମାନଙ୍କୁ ମାସ୍କ ପିନ୍ଧିବା ସାଙ୍ଗକୁ ହାତଧୋଇବା ଓ ସାନିଟାଇଜର୍ ବ୍ୟବହାର କରିବାକୁ ବାଧ୍ୟତାମୂଳକ କରାଯାଇଛି। ପ୍ରାକ୍ଟିକାଲ୍ ପରୀକ୍ଷା ସମୟରେ ଛାତ୍ରଛାତ୍ରୀ କିମ୍ବା ଶିକ୍ଷକ ଓ କର୍ମଚାରୀ ଗହଳି କରିବେ ନାହିଁ। ସମସ୍ତେ ସାମାଜିକ ଦୂରତା ପାଳନ କରିବା ଜରୁରୀ। କରେନା ସଂକ୍ରମଣକୁ ରୋକିବା ପାଇଁ ପରୀକ୍ଷା ପୂର୍ବରୁ ସମସ୍ତ ଲାବରେଟୋରୀ ଓ ପରୀକ୍ଷା ହଲ୍କୁ ସାନିଟାଇଜ୍ କରାଯିବାକୁ ନିର୍ଦେଶ ଦିଆଯାଇଛି। ପରୀକ୍ଷା କାର୍ଯ୍ୟସୂଚୀ ସମ୍ପର୍କରେ ଯଥେଷ୍ଟ ପୂର୍ବରୁ ଛାତ୍ରଛାତ୍ରୀଙ୍କୁ ଅବଗତ କରାଯିବ। ସରକାରଙ୍କ କୋଭିଡ୍-୧୯ ନିର୍ଦେଶନାମା ଅନୁପାଳନ ପୂର୍ବକ ଷଷ୍ଠ ସେମିଷ୍ଟାର ପରୀକ୍ଷା କରାଯିବା ନେଇ ନିଷ୍ପତ୍ତି ନିଆଯାଇଥିବା ଉତ୍କଳ ବିଶ୍ବବିଦ୍ୟାଳୟ କର୍ତ୍ତୃପକ୍ଷ ସୂଚନା ଦେଇଛନ୍ତି। ଏ ସଂକ୍ରାନ୍ତରେ ବିଶ୍ବବିଦ୍ୟାଳୟ ପକ୍ଷରୁ ଆଜି ବିଜ୍ଞପ୍ତି ପ୍ରକାଶ ପାଇଛି।
Comments are closed.