ନ୍ୟୁୟର୍କ : ଗ୍ରାଣ୍ଡସ୍ଲାମ ଟେନିସ୍ ଟୁର୍ଣ୍ଣାମେଣ୍ଟ ୟୁଏସ୍ ଓପନ୍ର ୧୪୦ତମ ସଂସ୍କରଣ ସୋମବାରଠାରୁ ଆରମ୍ଭ ହେଉଛି। ଏହି ଗ୍ରାଣ୍ଡସ୍ଲାମ୍ର ୧୪୦ ବର୍ଷ ଇତିହାସରେ ପ୍ରଥମଥର ଏହା ବିନା ଦର୍ଶକରେ ଆୟୋଜନ ହେବାକୁ ଯାଉଛି। ଆମେରିକାରେ କରୋନା ସଂକ୍ରମଣ ଏବେ ଶିଖରରେ ଥିବା ବେଳେ ଆୟୋଜକ ସବୁ ଆଶଙ୍କାକୁ ଏଡ଼ାଇଯାଇ ଟୁର୍ଣ୍ଣାମେଣ୍ଟ ଆୟୋଜନ କରିବାକୁ ଯାଉଛନ୍ତି। ୨ ସପ୍ତାହ ଧରି ଖେଳାଯିବାକୁ ଥିବା ୟୁଏସ୍ ଓପନ୍ ହାର୍ଡ କୋର୍ଟରେ ଖେଳାଯିବ। ୟୁଏସ୍ ଓପନ୍ ବର୍ଷର ୪ର୍ଥ ତଥା ଅନ୍ତିମ ଗ୍ରାଣ୍ଡସ୍ଲାମ୍ ଟୁର୍ଣ୍ଣାମେଣ୍ଟ ହୋଇଥିଲେ ହେଁ କରୋନା ପ୍ରଭାବରୁ ଫ୍ରେଞ୍ଚ୍ ଓପନ୍ ଓ ୱିମ୍ବଲଡନ୍ ଖେଳା ଯାଇନାହିଁ। ତେଣୁ ଅଷ୍ଟ୍ରେଲିଆନ୍ ଓପନ୍ ପରେ ୟୁଏସ୍ ଓପନ୍ ଚଳିତବର୍ଷ ୨ୟ ଗ୍ରାଣ୍ଡସ୍ଲାମ୍। ଅବଶ୍ୟ ୟୁଏସ୍ ଓପନ୍ ପରେ ଫ୍ରେଞ୍ଚ୍ ଓପନ୍ ଖେଳାଯିବ ବୋଲି ଏହାର ଆୟୋଜକ ଘୋଷଣା କରିଛନ୍ତି।
କରୋନା ସଂକ୍ରମଣ ଭୟରେ ଚଳିତବର୍ଷ ୟୁଏସ୍ ଓପନ୍ରୁ ବିଶ୍ୱର ବହୁ ପ୍ରମୁଖ ଖେଳାଳି ଓହରି ଯାଇଛନ୍ତି। ପୁରୁଷ ସିଙ୍ଗଲ୍ସରେ ମିଳିତ ଭାବେ ୩୯ଟି ଗ୍ରାଣ୍ଡସ୍ଲାମ୍ ସିଙ୍ଗଲ୍ସ ଟାଇଟଲ ଜିତିଥିବା ସ୍ୱିଜରଲାଣ୍ଡର ରଜର ଫେଡେରର ଓ ସ୍ପେନ୍ର ରାଫେଲ ନାଦାଲ ୟୁଏସ୍ ଓପନ୍ରୁ ଓହରି ଯାଇଥିବାରୁ ଏହା ସାମାନ୍ୟ ଚମକହୀନ ହୋଇଯାଇଛି। ନାଦାଲ ଗତବର୍ଷର ଚମ୍ପିଆନ୍ ହୋଇଥିବା ବେଳେ ବିଶ୍ୱର ୧ନଂ ମହିଳା ଖେଳାଳି ଅଷ୍ଟ୍ରେଲିଆର ଆସ୍ଲେ ବାର୍ଟି ମଧ୍ୟ ଏହି ଗ୍ରାଣ୍ଡସ୍ଲାମରୁ ଓହରି ଯାଇଛନ୍ତି। ବିଶ୍ୱର ୨ନଂ ମହିଳା ଖେଳାଳି ରୋମାନିଆର ସିମୋନା ହାଲେପ୍, ଗତବର୍ଷର ଚମ୍ପିଆନ୍ ଆଣ୍ଡ୍ରୁସ୍କ୍ୟୁ, ଏଲିନା ଶ୍ୱିତୋଲିନା, କିକି ବର୍ଟେନ୍ସ ଓ ବେଲିଣ୍ଡା ବେନ୍ସିଚ୍ଙ୍କ ପରି ଖେଳାଳି ମଧ୍ୟ ଓହରି ଯାଇଛନ୍ତି। ତେବେ ପୁରୁଷ ସିଙ୍ଗଲ୍ସରେ ବିଶ୍ୱର ୧ନଂ ଖେଳାଳି ସର୍ବିୟାର ନୋଭାକ୍ ଜୋକୋଭିକ୍ ଏହି ଟୁର୍ଣ୍ଣାମେଣ୍ଟ ଖେଳିବାକୁ ଯାଉଛନ୍ତି।
Comments are closed.