ପଏଣ୍ଟ ଖାତା ଖୋଲିଲା ଉରୁଗୁଏ
କ୍ୟୁଏବା : କୋପା ଆମେରିକା ଫୁଟବଲ ଟୁର୍ଣ୍ଣାମେଣ୍ଟରେ ୧୫ଥର ଚମ୍ପିଆନ ଉରୁଗୁଏର ଚଳିତ ଟୁର୍ଣ୍ଣାମେଣ୍ଟରେ ଖରାପ ପ୍ରଦର୍ଶନ ଜାରିରହିଛି। ମଙ୍ଗଳବାର ଗ୍ରୁପ୍ ‘ଏ’ରେ ଚିଲି ଓ ଉରୁଗୁଏ ମଧ୍ୟରେ ଖେଳା ଯାଇଥିବା ମ୍ୟାଚ ୧-୧ ଗୋଲ୍ରେ ଅମୀମାଂସିତ ରହିଛି। ଆତ୍ମଘାତୀ ଗୋଲ ଚିଲିକୁ ବିଜୟରୁ ବଞ୍ଚିତ କରିଥିବା ବେଳେ ଉରୁଗୁଏ ପଏଣ୍ଟ ଖାତା ଖୋଲିବାରେ ସକ୍ଷମ ହୋଇଛି।
ପ୍ରଥମ ମ୍ୟାଚରେ ଆର୍ଜେଣ୍ଟିନାଠାରୁ ୧-୦ ଗୋଲରେ ପରାସ୍ତ ହୋଇଥିବା ଉରୁଗୁଏ ଉପରେ ଚିଲି ପ୍ରାରମ୍ଭରୁ ପ୍ରାଧାନ୍ୟ ବିସ୍ତାର କରିଥିଲା। ୨୮ ମିନିଟ୍ରେ ଚିଲି ଗୋଲ୍ ସ୍କୋର୍ କରିବାରେ ସଫଳ ହୋଇଥିଲା। ବେନ୍ ବ୍ରେରେଟନଙ୍କ ପାସ୍କୁ ଏଡୁଆର୍ଡୋ ଭାର୍ଗାସ ଗୋଲରେ ପରିଣତ କରି ଚିଲିକୁ ୧-୦ରେ ଆଗୁଆ କରିଥିଲେ। ଗୋଟିଏ ଗୋଲ ପଛରେ ରହିବା ପରେ ଉରୁଗୁଏ ମ୍ୟାଚକୁ ଫେରିବା ନେଇ ଉଦ୍ୟମ କରିଥିଲା। ପ୍ରଥମାର୍ଦ୍ଧରେ ଚିିଲି ୧-୦ ଗୋଲରେ ଆଗୁଆ ରହିଥିଲା। ୬୮ ମିନିଟ୍ରେ ଉରୁଗୁଏକୁ ଭାଗ୍ୟ ସହାୟକ ହୋଇଥିଲା। ଚିଲିର ମିଡ୍ଫିଲ୍ଡର ଆର୍ଟ୍ୟୁରୋ ଭିଡାଲ୍ଙ୍କ ଆତ୍ମଘାତୀ ଗୋଲ ମ୍ୟାଚକୁ ୧-୧ କରିବାରେ ସକ୍ଷମ ହୋଇଥିଲା। ପରେ ଉଭୟ ଦଳ ଅନ୍ତିମ ସମୟ ପର୍ଯ୍ୟନ୍ତ ଗୋଲ ଦେବା ନେଇ ଉଦ୍ୟମ କରିଥିଲେ ମଧ୍ୟ ସଫଳ ହୋଇନଥିଲେ। ଚିଲି ୩ଟି ମ୍ୟାଚରୁ ଗୋଟିଏ ବିଜୟ ଓ ୨ଟି ଡ୍ର ସହ ୫ ପଏଣ୍ଟ ପାଇ ଗ୍ରୁପ ୨ୟ ସ୍ଥାନରେ ରହି କ୍ବାର୍ଟରଫାଇନାଲରେ ନିକଟତର ହୋଇଛି। ଚିଲି ଅନ୍ତିମ ଲିଗ୍ ମ୍ୟାଚ ୨୪ରେ ପାରାଗୁଏ ସହ ଖେଳିବ। ଉରୁଗୁଏ ୨ଟି ମ୍ୟାଚରୁ ଗୋଟିଏ ଡ୍ର ଓ ଗୋଟିଏ ପରାଜୟ ସହ ୧ ପଏଣ୍ଟ ପାଇ ୪ର୍ଥ ସ୍ଥାନରେ ରହିଛି। ଏହା ୩ୟ ଲିଗ୍ ମ୍ୟାଚ ୨୪ରେ ବଲିଭିଆ ସହ ଖେଳିବ।
Comments are closed.