ବାରବାଙ୍କି: ଏକ ଦୁର୍ଭାଗ୍ୟଜନକ ଘଟଣାରେ ଉତ୍ତର ପ୍ରଦେଶରେ ରାସ୍ତା କଡରେ ଶୋଇଥିବା ଶ୍ରମିକଙ୍କ ଉପରେ ଦ୍ରୁତଗାମୀ ଟ୍ରକ ମାଡିଯିବାରୁ ୧୮ ଜଣ ଶ୍ରମିକଙ୍କର ମୃତ୍ୟୁ ଘଟିଛି । ଏହି ଦୁର୍ଘଟଣାରେ ୨୦ରୁ ଅଧିକ ଆହତ ହୋଇଛନ୍ତି । ଆହତଙ୍କୁ ଚିକିତ୍ସା ପାଇଁ ହାସପାତାଳରେ ଭର୍ତ୍ତି କରାଯାଇଛି । ଉତ୍ତରପ୍ରଦେଶ ବାରବାଙ୍କି ଜିଲାରେ ଲଖ୍ନଉ-ଅଯୋଧ୍ୟା ଜାତୀୟ ରାଜପଥରେ ଏହି ମର୍ମନ୍ତୁଦ ଦୁର୍ଘଟଣା ଘଟିଛି ।
ପ୍ରାପ୍ତ ସୂଚନାରୁ ଜଣାଯାଇଛି ଯେ ବିହାର ବାସିନ୍ଦା କିଛି ଶ୍ରମିକ ଏକ ବସଯୋଗେ ହରିଆଣାରୁ ମଙ୍ଗଳବାର ରାତିରେ ନିଜ ରାଜ୍ୟକୁ ଫେରୁଥିଲେ । ତେବେ ବସରେ ଯାନ୍ତ୍ରିକ ସମସ୍ୟା ଦେଖାଦେବାରୁ ବସ ଡ୍ରାଇଭର ବସକୁ ରାସ୍ତା କଡରେ ଛିଡା କରାଇଥିଲେ । ସେହି ସମୟରେ ବସରେ ଥିବା ଶ୍ରମିକମାନେ ତଳକୁ ଓହ୍ଲାଇ ବସ ପଛପଟେ ଶୋଇ ବିଶ୍ରାମ ନେଉଥିଳେ । ସେହି ସମୟରେ ଦ୍ରୁତଗତିରେ ଆସୁଥିବା ଏକ ଟ୍ରକ ଶ୍ରମିକଙ୍କ ଉପରେ ମାଡିଯାଇଥିଲା । ଦୁର୍ଘଟଣା ସମ୍ପର୍କରେ ଖବର ପାଇ ତୁରନ୍ତ ସେଠାରେ ପୁଲିସ ଓ ସ୍ୱାସ୍ଥ୍ୟ ବିଭାଗର ଅଧିକାରୀମାନେ ପହଞ୍ଚିଥିଲେ । ସମସ୍ତ ଆହତଙ୍କୁ ନିକଟସ୍ଥ ହାସପାତାଳକୁ ଚିକିତ୍ସା ପାଇଁ ପଠାଯାଇଥିଲା । ଇତିମଧ୍ୟରେ ମୃତ ଶ୍ରମିକମାନଙ୍କ ପରିଚୟ ଜାଣିବାକୁ ସ୍ଥାନୀୟ ପ୍ରଶାସନ ଉଦ୍ୟମ କରୁଛି ବୋଲି ଜୋନ ଏଡିଜି ସତ୍ୟ ନାରାୟଣ ସାବତ କହିଛନ୍ତି ।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ବାରବାଙ୍କି ଦୁର୍ଘଟଣାରେ ଗଭୀର ଶୋକ ପ୍ରକାଶ କରିବା ସହିତ ପ୍ରାଣ ହରାଇଥିବା ପ୍ରତି ମୃତକଙ୍କ ପରିବାରକୁ ୨ ଲକ୍ଷ ଟଙ୍କା ଏବଂ ପ୍ରତି ଆହତଙ୍କ ପାଇଁ ୫୦ ହଜାର ଟଙ୍କା ଲେଖାଏଁ ଅନୁକମ୍ପାମୂଳକ ସହାୟତା ରାଶି ଘୋଷଣା କରିଛନ୍ତି।
Comments are closed.