ସ୍ବାସ୍ଥ୍ୟପ୍ରଦ ଭୋଜନ: ହଳଦି ତରକାରି

ଶରୀରର ରୋଗପ୍ରତିରୋଧକ ଶକ୍ତି ବଢ଼ାଇବା ନିମନ୍ତେ ଶୁଦ୍ଧ ହଳଦି ଖୁବ୍ ହିତକାରୀ। ଖଣ୍ଡ ହଳଦିକୁ ଗୁଣ୍ଡ କରି ଉଷୁମ ଖିରରେ ପିଇଲେ ତାହା ବିଭିନ୍ନ ସଂକ୍ରମଣଜନିତ ରୋଗରୁ ରକ୍ଷା କରେ। ଖଣ୍ଡ ହଳଦିକୁ ଉପଯୋଗ କରି ଆପଣ ତରକାରି ଭାବେ ଖାଇବା ମଧ୍ୟ ଭଲ।

ଆବଶ୍ୟକ ସାମଗ୍ରୀ: ଖଣ୍ଡ ହଳଦି ୧ କପ୍, ଅଧ କପ୍ ମଟର, ପିଆଜ ଚୂନାଚୂନା କଟା ୨ବଡ଼ ଚାମଚ, ଧନିଆ ଗୁଣ୍ଡ ୧ଛୋଟ ଚାମଚ, ଲାଲ ଲଙ୍କା ଗୁଣ୍ଡ ୧ଛୋଟ ଚାମଚ, ଟମାଟୋ କଟା ୨ ବଡ଼ ଚାମଚ, ଅଧ କପ୍ ଦହି, ସ୍ବାଦାନୁସାରେ ଲୁଣ, ଗୋଲମରିଚ ଗୁଣ୍ଡ ଅଧ ଚାମଚ, ଡାଲଚିନି ଗୋଟିଏ ଖଣ୍ଡ, ତେଜପତ୍ର ୨ଟି, ଅଦା ଚୂନାଚୂନା କଟା ଅଧ କପ୍

ପ୍ରସ୍ତୁତି: ଅଦା ଓ ହଳଦିକୁ ଭଲଭାବେ ପରିଷ୍କାର କରି ଅଲଗା ରଖନ୍ତୁ। ହଳଦିକୁ ଛୋଟ ଆକାରରେ କାଟି ରଖିବେ। କଡେଇକୁ ଚୂଲାରେ ବସାଇ ଗରମ କରିବା ପରେ ଘିଅ ପକାନ୍ତୁ। ପରେ ତେଜପତ୍ର, ଡାଲଚିନି ଓ ଗୋଲମରିଚ ଗୁଣ୍ଡ ପକାଇ ୫-୬ ସେକେଣ୍ଡ ଅପେକ୍ଷା କରିବେ। ଏସବୁ ମସଲାର ବାସ୍ନା ଆସିବା ପରେ କଟା ହଳଦି ଓ ଅଦା ପକାଇ ଦିଅନ୍ତୁ। ୨ ମିନିଟ୍ ପର୍ୟ୍ୟନ୍ତ ମସଲାରେ ମିଶାଇ ରଖିବା ପରେ ମଟର ଓ ଟମାଟୋ ପକାଇବେ। ଏହା ପରେ ଦହି ଓ ଧନିଆ ଗୁଣ୍ଡ, ଲଙ୍କା ଗୁଣ୍ଡ ପକାନ୍ତୁ। ସବୁ ଭଲରେ ମିଶିବା ପରେ କଟା ପିଆଜକୁ ପକାଇ ଚୂଲା ବନ୍ଦ କରିନେବେ। ପାଟିକୁ ସୁଆଦିଆ ନ ଲାଗିଲେ ମଧ୍ୟ ଏହା ସ୍ବାସ୍ଥ୍ୟ ଉପରେ ଉତ୍ତମ ପ୍ରଭାବ ପକାଇଥାଏ। ରୁଟି କିମ୍ବା ଭାତ ସହ ଗରମଗରମ ଏଇ ତରକାରି ଖାଇ ନିଅନ୍ତୁ।