ସାବଧାନ ! କଟିବ ଚାଲାଣ; ରଦ୍ଦ ହେବ ଲାଇସେନ୍ସ
ରାଜ୍ୟର ଦୁର୍ଘଟଣାଜନିତ ମୃତ୍ୟୁହାର ଉଦ୍ବେଗଜନକ। ସୁପ୍ରିମକୋର୍ଟଙ୍କ ଦ୍ବାରା ଗଠିତ କମିଟି ନିର୍ଦେଶକ୍ରମେ ମୁଖ୍ୟ ଶାସନ ସଚିବ ପରିବହନ କମିସନର ଓ ଏସ୍ପିଙ୍କୁ ସଡ଼କ ନିରାପତ୍ତା ନିୟମ କଡ଼ାକଡ଼ି ପାଳନ ସହିତ ଏନେଇ କଠୋର ପଦକ୍ଷେପ ନେବାକୁ ଚିଠି ଲେଖିଥିଲେ। ସଡ଼କ ନିରାପତ୍ତା ନେଇ ଯେଉଁସବୁ କଟକଣା ରହିଥିଲା ସେଥିରେ ଆସନ୍ତା ଜାନୁଆରୀରୁ ବାଇକ୍ ପଛରେ ବସିଥିବା ଯାତ୍ରୀଙ୍କ ପାଇଁ ମଧ୍ୟ ହେଲମେଟ ପିନ୍ଧିବା ନିୟମକୁ ଯୋଡ଼ି ଦିଆଯାଇଛି। ସାମାନ୍ୟ ନିୟମ ଉଲ୍ଲଘଂନ କଲେ କଟିବ ଚାଲାଣ। ତା’ ସହିତ ଲାଇସେନ୍ସ ରଦ୍ଦ ହେବ। ବର୍ତ୍ତମାନ ସୁଦ୍ଧା ଡିସେମ୍ବର ମାସରେ ରାଜଧାନୀରେ ପ୍ରାୟ ୪୦୦ ଗାଡ଼ି ଚାଳକଙ୍କ ଟ୍ରାଫିକ୍ ନିୟମ ଓ ସଡ଼କ ନିରାପତ୍ତା ନିୟମ ଉଲ୍ଲଘଂନ ଯୋଗୁଁ ଲାଇସେନ୍ସ ବାତିଲ୍ ହୋଇସାରିଛି।
ବାଇକ୍ରେ ତିନି ଜଣିଆ ଯାତ୍ରୀ, ରଙ୍ଗ୍ ସାଇଡ୍ ଡ୍ରାଇଭିଂ, ଗାଡ଼ି ଚଳାଇବା ବେଳେ ମୋବାଇଲ ଫୋନ୍ରେ କଥା ହେବା, ହେଲମେଟ ବା ସିଟ୍ବେଲ୍ଟ ନ ପିନ୍ଧିବା ଓ ନିଶାସକ୍ତ ଅବସ୍ଥାରେ ଗାଡ଼ି ଚାଳନା ଆଦିକୁ ସଡ଼କ ନିରାପତ୍ତା କ୍ଷେତ୍ରରେ ଅଧିକ କଡ଼ାକଡ଼ି ଲାଗୁ କରାଯିବ। ଉଲ୍ଲଘଂନକାରୀଙ୍କ ଲାଇସେନ୍ସ ବାତିଲ୍ କରାଯିବ। ବାଇକ୍ ପଛରେ ବସିଥିବା ଚାଳକ ହେଲମେଟ ନ ପିନ୍ଧିଥିଲେ ଚାଲାଣ କଟିବ ଏବଂ ଚାଳକଙ୍କ ଲାଇସେନ୍ସ ବାତିଲ୍ ହେବ ବୋଲି ନିୟମ ରହିଛି। ଏଭଳି କଠୋର ନିୟମକୁ ନେଇ ଏବେଠାରୁ ଗାଡ଼ି ଚାଳକଙ୍କ ମଧ୍ୟରେ ଛନକା ପଶିଛି।
Comments are closed.