ଚର୍ଚ୍ଚାରେ ଟ୍ରକ୍ଟର ଚୋରୀ, ପୁଲିସ ପାଖରେ ଖବର ନାହିଁ

ଲୋଇସିଂହା : ଗତ ୧୧ ତାରିଖ ରାତିରେ ସ୍ଥାନୀୟ ଦୁର୍ଗା ମଣ୍ଡପ ନିକଟରେ ଥିବା ଏକ ଟ୍ରାକ୍ଟରକୁ କେହି ଚୋରୀ କରି ନିକଟସ୍ଥ ୨୬ ନମ୍ବର ଜାତୀୟ ରାଜପଥ କଡ ରପ୍ଟା ପୋଲ ନାଳରେ ଛାଡି ଚାଲି ଯାଇଥିବା ଚର୍ଚ୍ଚା ହେଉଛି। ଗାଡି ମାଲିକଙ୍କ ସୂଚନା ଅନୁସାରେ, ପ୍ରାୟ ୨/୩ ମାସ ହେଲା କୌଣସି କାମ ହେଉ ନଥିବାରୁ ଟ୍ରାକ୍ଟରଟି ସ୍ଥାନୀୟ ଦୁର୍ଗା ମଣ୍ଡପ ନିକଟରେ ରଖା ଯାଇଥିଲା। ମାତ୍ର ଗତ ୧୨ ତାରିଖ ସକାଳେ ଏଠାରେ ଟ୍ରାକ୍ଟର ନଥିବାରୁ ଖୋଜାଖୋଜି କଲା ପରେ ଏନ୍ଏଚ୍-୨୬ର ରପଟା ପୋଲ ନିକଟରେ ଟ୍ରଲି ସହ ପଡିଥିବା ଦେଖା ଯାଇଛି। ଟ୍ରାକ୍ଟରଟି ମିଳି ଯାଇ ଥିବାରୁ ପୁଲିସରେ ଅଭିଯୋଗ କରାଯାଇ ନାହିଁ ବୋଲି ଗାଡି ମାଲିକ ବିରେନ୍ଦ୍ର ପଧାନ କହିଛନ୍ତି। ମାତ୍ର ଲୋଇସିଂହାରେ ଆଇନ ଶୃଙ୍ଖଳା ପରିସ୍ଥିତି ବିପଯ୍ୟସ୍ତ ହେବା ସହ ଏଭଳି ଗାଡି ଚୋରୀ ହେବା ଘଟଣାକୁ ପୁଲିସର କାର୍ଯ୍ୟ ଦକ୍ଷତା ପ୍ରତି ଅଙ୍ଗୁଳି ଉଠିଛି। ଗାଡି ମାଲିକ ନିଜ ଗାଡି ଚୋରୀ ହୋଇଥିବା ସଂପର୍କରେ ଅଭିଯୋଗ କରି ନଥିବାରୁ ଲୋଇସିଂହା ଆଇଆଇସି ଲଳିତା ଲାକ୍ରା ଆମେ ଜାଣି ନାହଁ ବୋଲି ସଫେଇ ଦେଇଛନ୍ତି। ସୂଚନାଯୋଗ୍ୟ ଯେ, ଲୋଇସିଂହା ଅଞ୍ଚଳରେ ଖୋଲାଖୋଲି ଭାବରେ ଦୋକାନ ବଜାରରେ ଦେଶୀ ବିଦେଶୀ ମଦ ବିକ୍ରୀ ହେବା ସହ ଆଇନ ଶୃଙ୍ଖଳା ପରିସ୍ଥିତି ସୃଷ୍ଟି ହେଉଥିବା, ବସ୍ଷ୍ଟାଣ୍ଡ, ବ୍ୟାଙ୍କ ଛକ, ବ୍ଲକ ଛକ ନିକଟରେ ଟ୍ରାଫିକ ସମସ୍ୟା ସୃଷ୍ଟି ହେଉଥିବା, କୋଭିଡ ନିୟମ ଉଲଂଘନ କରାଯାଇ ସ୍ୱେଚ୍ଚାସେବୀ ଅନୁଷ୍ଠାନ ୱାର୍ଲଡ ଭିଜନ ପକ୍ଷରୁ ବିଭିନ୍ନ କାର୍ଯ୍ୟକ୍ରମ ସହ ସଭା ସମିିତି ହେଉଥିବା ଯୋଗୁଁ ଜନ ଜୀବନ ଅସ୍ତବ୍ୟସ୍ତ। ସମସ୍ୟାର ସମାଧାନ ପ୍ରତି ସ୍ଥାନୀୟ ପୁଲିସର ଦକ୍ଷତାକୁ ନେଇ ଲୋକେ ପ୍ରଶ୍ନ କରୁଛନ୍ତି।

Comments
Loading...