ଟୋକିଓ ଅଲିମ୍ପିକ୍ସ ସ୍ଥଗିତ ରଖିବାକୁ ନିଷ୍ପତ୍ତି ହୋଇ ନାହିଁ : ଥୋମାସ୍ ବାଚ୍
ୱାଶିଂଟନ୍ : ଟୋକିଓ ଅଲିମ୍ପିକ୍ସକୁ ସ୍ଥଗିତ ରଖିବାକୁ ବର୍ତ୍ତମାନ ସୁଦ୍ଧା କୌଣସି ନିଷ୍ପତ୍ତି ହୋଇନଥିବା ଗଣମାଧ୍ୟମକୁ ସୂଚନା ଦେଇଛନ୍ତି ଅନ୍ତର୍ଜାତୀୟ ଅଲିମ୍ପିକ୍ କମିଟି ସଭାପତି ଥୋମାସ୍ ବାଚ୍। କରୋନା ଭାଇରସ୍ ସଂକ୍ରମଣ ଯୋଗୁଁ ସୃଷ୍ଟି ହୋଇଥିବା ପରିସ୍ଥିତିକୁ ଦୃଷ୍ଟିରେ ରଖି ଟୋକିଓ ଅଲିମ୍ପିକ୍ସକୁ ସ୍ଥଗିତ ରଖିବାକୁ ବିଭିନ୍ନ ମହଲରୁ ଦାବି ହୋଇ ଆସୁଛି।
ଏ ସଂପର୍କରେ ସାମ୍ବାଦିକଙ୍କ ସହ ଆଲୋଚନା କାଳରେ ବାଚ୍ କହିଛନ୍ତି ଟୋକିଓ ଅଲିମ୍ପିକ୍ସକୁ ସ୍ଥଗିତ ରଖିବାକୁ ବର୍ତ୍ତମାନ ସୁଦ୍ଧା କୌଣସି ନିଷ୍ପତ୍ତି ହୋଇ ନାହିଁ। ବର୍ତ୍ତମାନ ପରିସ୍ଥିତି ଜଟିଳ ରହିଛି ସତ ହେଲେ ଆଗାମୀ ଦିନରେ ଏଥିରେ ପରବର୍ତ୍ତନ ଆସିବାର ସମ୍ଭାବନା ରହିଛି। ପରସ୍ଥିତି ବଦଳିଲେ ଟୋକିଓ ଅଲିମ୍ପିକ୍ସ ନିର୍ଦ୍ଧାରିତ ସମୟରେ ଆୟୋଜିତ ହୋଇପାରିବ। ତେଣୁ ବର୍ତ୍ତମାନ ଟୋକିଓ ଅଲିମ୍ପିକ୍ସକୁ ସ୍ଥଗିତ ରଖିବା ଘୋଷଣା ଅପରିପକ୍ବ ହେବ। ଟୋକିଓ ଅଲିମ୍ପିକ୍ସ ଜୁଲାଇ ୨୪ରୁ ଆରମ୍ଭ ହେବାକୁ ପୂର୍ବରୁ ନିର୍ଦ୍ଧାରିତ ହୋଇଥିବା ବେଳେ ହାତରେ ବେଶ୍ କିଛି ସମୟ ରହିଛି। ସେତେବେଳକୁ ପରିସ୍ଥିତିରେ ଉନ୍ନତି ଆସିଥିବ ବୋଲି ବାଚ୍ ମତ ଦେଇଛନ୍ତି। କରୋନା ଭାଇରସ୍ ସଂକ୍ରମଣଜନିତ ପରିସ୍ଥିତି ଉପରେ ଅନ୍ତର୍ଜାତୀୟ ଅଲିମ୍ପିକ୍ କମିଟି ନିଜସ୍ବ ଟାସ୍କଫୋର୍ସ ଓ ବିଶ୍ବ ସ୍ବାସ୍ଥ୍ୟ ସଂଗଠନ ରିପୋର୍ଟକୁ ଲଗାତାର ଭାବେ ଅନୁଧ୍ୟାନ ଜାରି ରଖିଥିବା ବାଚ୍ ସ୍ପଷ୍ଟ କରି ଦେଇଛନ୍ତି। ଅନ୍ୟପକ୍ଷରେ ଟୋକିଓ ଅଲିମ୍ପିକ୍ସକୁ ସଂପୂର୍ଣ୍ଣ ରୂପେ ବାତିଲ କରିବାର ପ୍ରଶ୍ନ ଉଠୁ ନାହିଁ ବୋଲି ବାଚ୍ କହିଛନ୍ତି।
ସୂଚନାଥାଉକି କରୋନା ଭାଇରସ୍ ସଂକ୍ରମଣ ଯୋଗୁଁ ଯେପରି ପରିସ୍ଥିତି ସୃଷ୍ଟି ହୋଇଛି ସେଥିରେ ଟୋକିଓ ଅଲିମ୍ପିକ୍ସ ଆୟୋଜନ ନେଇ ବିଭିନ୍ନ ମହଲରୁ ଆଶଙ୍କା ପ୍ରକାଶ ପାଇଛି। ଅଲିମ୍ପିକ୍ସ ନିମନ୍ତେ ଅନେକ ଯୋଗ୍ୟତା ଅର୍ଜନ ଟୁର୍ଣ୍ଣାମେଣ୍ଟ ବାତିଲ ହୋଇଛି। ଫଳରେ ଅନେକ କ୍ରୀଡ଼ାବିତ୍ ଅଲିମ୍ପିକ୍ସ ନିମନ୍ତେ ଯୋଗ୍ୟତା ଅର୍ଜନ କରି ପାରିନାହାନ୍ତି। ତେବେ ଟୋକିଓ ଅଲିମ୍ପିକ୍ସକୁ ସ୍ଥଗିତ ରଖିବାକୁ ବର୍ତ୍ତମାନ ସୁଦ୍ଧା କୌଣସି ନିଷ୍ପତ୍ତି ହୋଇନଥିବା ବାଚ୍ ସ୍ପଷ୍ଟ କରି ଦେଇଛନ୍ତି। ଆସନ୍ତା କାଲି ପରିସ୍ଥିତିରେ କିପରି ପରବର୍ତ୍ତନ ଆସିବ ତାହା ବର୍ତ୍ତମାନ ଠାରୁ କେହି କହିପାରିବେ ନାହିଁ। ଟୋକିଓ ଅଲିମ୍ପିକ୍ସ ଆୟୋଜନ ପାଇଁ ହାତରେ ୪ ମାସ ସମୟ ରହିଥିବାରୁ ବର୍ତ୍ତମାନ ଠାରୁ ଏହାକୁ ସ୍ଥଗିତ ଘୋଷଣା କରିବା ପ୍ରଶ୍ନ ଉଠୁ ନାହିଁ ବୋଲି ବାଚ୍ ସ୍ପଷ୍ଟ କରି ଦେଇଛନ୍ତି।
Comments are closed.