ଠାକୁରମୁଣ୍ଡା : କିଛି ଦିନ ବ୍ୟବଧାନ ପରେ ପୁଣି ଠାକୁରମୁଣ୍ଡାରେ ବାଘ ଆତଙ୍କ ସୃଷ୍ଟି ହୋଇଛି। ମୟୁରଭଞ୍ଜ ଜିଲ୍ଲା ଠାକୁରମୁଣ୍ଡା ବ୍ଲକ ଚମ୍ପାଝର ପଞ୍ଚାୟତ ଡଙ୍ଗାଡିହା ଗ୍ରାମ ନକଟବର୍ତ୍ତୀ ଗ୍ରାମ ଗୁଡିକରେ ବାଘ ଆକ୍ରମଣରେ ଗୃହପାଳିତ ପଶୁମାନେ ମୃତାହତ ହୋଇଥିବା ଜଣାପଡିଛି। ଏକ ବାଘ ଆକ୍ରମଣରେ ଗୋଟିଏ ବାଛୁରୀ ଗୁରୁତର ଆହତ ହୋଇଛି। ଡଙ୍ଗାଡିହା ଗ୍ରାମ ନିକଟ ଶାଗୁଆନ ବଗିଚା ନିକଟରେ କେତେକ ଗାଈ ଓ ବଳଦ ଚରୁଥିବା ବେଳେ ସେଥିମଧ୍ୟରୁ ଏକ ଅଣ୍ଡିରା ବାଛୁରୀ କୁ ବାଘ ଆକ୍ରମଣ କରିଥିଲା। ବାଘ ବାଛୁରୀର ମୁହଁକୁ କାମୁଡି ଦେବାରୁ ସାଙ୍ଗରେ ଚରୁଥିବା ଅନ୍ୟ ଗାଈ-ବଳଦ ଗୁଡିକ ଭୟବୀତ ହୋଇ ଏଣେ ତେଣେ ଦୌଡ଼ି ଆସିଥିଲେ। ପରେ ଗ୍ରାମବାସୀମାନେ ଏହା ଦେଖି ଶାଗୁଆନ ବଗିଚାକୁ ଯାଇ ଆହତ ଅବସ୍ଥାରେ ପଡିରହିଥିବା ବାଛୁରୀକୁ ଉଦ୍ଧାର କରିଥିଲେ। ଏହା କଲରାପତାରିଆ ବାଘ ଆକ୍ରମଣ କରିଥାଇପାରେ ବୋଲି ପଶୁ ଚିକିତ୍ସକ କହିଛନ୍ତି।
ଏଠାରେ ସୂଚନା ଥାଉକି, ଏହି ଦେଢ଼ ମାସ ମଧ୍ୟରେ ଡ଼ଙ୍ଗାଡ଼ିହା ଗ୍ରାମ ନିକଟସ୍ଥ ଗ୍ରାମ ଗୁଡିକରେ ବାଘ ଆତଙ୍କ ଦେଖିବାକୁ ମିଳିଥିଲା। ପତ୍ରପୋଡ଼ା ଡଙ୍ଗାଡିହା, ଭେଜଡିହା ଗ୍ରାମରେ ଗୃହପାଳିତ ପଶୁ ମାନଙ୍କୁ ବାଘ ଆକ୍ରମଣ ଘଟଣା ସାମ୍ନାକୁ ଆସିଥିଲା। ପତ୍ରପୋଡ଼ା ଗ୍ରାମର ଡମ୍ବରୁଧର ପିଙ୍ଗୁଆ ଓ ଡଙ୍ଗାଡିହା ଗ୍ରାମର ଲକ୍ଷଣ ମୁର୍ମୁଙ୍କ ଗୋଟିଏ ଲେଖାଏଁ ଗାଈକୁ ମାସେ ଆଗରୁ ବାଘ ମାରି ଖାଇ ଦେଇଥିଲା। ଡଙ୍ଗାଡିହା ଗ୍ରାମର ଲକ୍ଷ୍ମଣ ହୋଙ୍କ ଏକ ମଇଁଷିକୁ ଭେଜିଡିହା ନିକଟ ଠାକୁରମୁଣ୍ଡା-ଶରତ ମୁଖ୍ୟ ରାସ୍ତା ଉପରେ ବାଘ ଆକ୍ରମଣ କରି ଆହତ କରିଥିଲା ଓ ପରେ ମଇଁଷିର ମୃତ୍ୟୁ ହୋଇଥିଲା। ଏସମସ୍ତ ଆକ୍ରମଣ ସ୍ଥଳରେ ପଡିଥିବା ବାଘର ପଦ ଚିହ୍ନରୁ ମହାବଳ ବା କଲରପତାରିଆ ବାଘ ଆକ୍ରମଣ କରୁଥିବା ନେଇ ସ୍ଥାନୀୟ ଲୋକମାନେ ସନ୍ଦେହ କରୁଛନ୍ତି। ନିଜର ଓ ଗୃହପାଳିତ ପଶୁମାନଙ୍କ ପ୍ରତି ବିପଦ ଆଶଙ୍କା କରି ଲୋକେ ଭୟବୀତ ଆବସ୍ଥାରେ ରହିଛନ୍ତି।
Comments are closed.