ବଜାର ଭିତରୁ ବୋଲେରୋ ପିକ୍‌ଅପ୍‌ ଚୋରି, ସିସିଟିଭିରେ କଏଦ ଚୋରିର ଦୃଶ୍ୟ

କଳାପଥର(ବ୍ୟାଙ୍କୀ): ବୈଦ୍ୟେଶ୍ୱର ଥାନା ଅନ୍ତର୍ଗତ କଳାପଥର ମୁଖ୍ୟ ବଜାର ଭିତରୁ ବୋଲେରୋ ପିକ୍‌ଅପ୍‌ ଚୋରି ହୋଇଥିବା ଅଭିଯୋଗ ହୋଇଛି।

ସୂଚନା ଅନୁସାରେ, କଳାପଥର ଗ୍ରାମର ବିଶିଷ୍ଟ ବ୍ୟବସାୟୀ ପ୍ରଦୀପ୍ତ କୁମାର ସାହୁ ଓରଫ ବାପି ବାବୁଙ୍କର ବୋଲେରୋ ପିକ୍‍ଅପ୍‌ ନମ୍ବର -ଓଡି ୦୨ ଇ ୮୬୩୯ ଟି ସୋମବାର ମୁଖ୍ୟ ବଜାର ଭିତରେ ଥିବା କାନାରା ବ୍ୟାଙ୍କ ସମ୍ମୁଖରେ ରଖାଯାଇଥିବା ସମୟରେ କେହି ଦୁର୍ବୃତ୍ତ ତାକୁ ଚୋରାଇ ନେଇଛି। ଘଟଣା ସମ୍ପର୍କରେ ଲିଖିତ ଅଭିଯୋଗ ହେବା ପରେ ତଦନ୍ତ ଆରମ୍ଭ କରିଛି ବୈଦ୍ୟେଶ୍ୱର ପୁଲିସ। ତେବେ ଏପର୍ଯ୍ୟନ୍ତ ଚୋରୀ ବୋଲେରୋର ଟେର ପାଇ ପାରିନାହିଁ ପୁଲିସ।

ଅନ୍ୟ ପକ୍ଷରେ କଳାପଥର ମୁଖ୍ୟ ରାସ୍ତା ପାର୍ଶ୍ବରେ ଲାଗିଥିବା ଏକ ସିସିଟିଭି କ୍ୟାମେରାରେ ବିଳମ୍ବିତ ରାତ୍ରିରେ ଦୁର୍ବୃତ୍ତମାନେ ବୋଲେରୋ ଗାଡି ନେଇ ଯାଉଥିବାର ଦୃଶ୍ୟ କଏଦ ହୋଇଛି। କଳାପଥର ମୁଖ୍ୟ ବଜାର ଭିତରେ ଥିବା କାନାରା ବ୍ୟାଙ୍କ ସାମ୍ନା ସେହି ସ୍ଥାନଟି ବେଶ ପ୍ରଶସ୍ତ ହୋଇଥିବାରୁ ରାତ୍ରିରେ ବହୁ ମାଲବାହି ଏବଂ ଛୋଟ ଯାତ୍ରିବାହୀ ଗାଡି ସେଠାରେ ପାର୍କିଂ କରିଥାନ୍ତି। ଏପରିକି ବିଳମ୍ବିତ ରାତ୍ରି ପର୍ଯ୍ୟନ୍ତ ମଧ୍ୟ ସେହି ରାସ୍ତା ଦେଇ ଲୋକ ଓ ପନିପରିବା ବୋହୁଥିବା ଗାଡିର ଚାଳକମାନେ ଚଳପ୍ରଚଳ ହୋଇଥାନ୍ତି। ତେବେ ବ୍ୟାଙ୍କ ସମ୍ମୁଖରୁ ଏପରି ବୋଲେରୋ ଗାଡି ଚୋରୀ ଘଟଣା ଲୋକଙ୍କୁ ଆଶ୍ଚର୍ଯ୍ୟ କରିଥିବା ବେଳେ ଘଟଣା ପଛରେ ସ୍ଥାନୀୟ ଲୋକ କିମ୍ବା ଚାଳକ ସମ୍ପୃକ୍ତ ଥିବା କଥା ଆଲୋଚନା ହେଉଛି।

Comments
Loading...