ରାଜ୍ୟ ସରକାରଙ୍କ ପକ୍ଷରୁ ସହରାଞ୍ଚଳ ହୋମ୍‌ କ୍ବାରେଣ୍ଟାଇନ୍‌ ମାର୍ଗଦର୍ଶିକା ଜାରି

ଭୁବନେଶ୍ବର: ସହରାଞ୍ଚଳ ହୋମ୍‌ କ୍ୱାରାଣ୍ଟାଇନ୍‌ ସଂପର୍କିତ ମାର୍ଗଦର୍ଶିକା ରାଜ୍ୟ ସରକାରଙ୍କ ପକ୍ଷରୁ ଜାରି କରାଯାଇଛି।  ବିମାନ ଓ ରେଳରେ ଆସୁଥିବା ପ୍ରବାସୀ ଓଡ଼ିଆ ଘରେ ସ୍ୱତନ୍ତ୍ର ଶୌଚାଳୟ ସଲଗ୍ନ ଥିବା କକ୍ଷ ଥିଲେ ହିଁ ହୋମ୍‌ କ୍ୱାରାଣ୍ଟାଇନ୍‌ରେ ରହିପାରି​‌​‌ବେ। ସଂପୃକ୍ତ ବ୍ୟକ୍ତିଙ୍କ ସହ ତାଙ୍କର ସଂପୂର୍ଣ୍ଣ ପରିବାର ମଧ୍ୟ ଏହି ଅବଧି ପାଇଁ କ୍ୱାରାଣ୍ଟାଇନ୍‌ରେ ରହିବେ। ସମ୍ପୃକ୍ତ ବ୍ୟକ୍ତିଙ୍କ ଗୃହ ସମ୍ମୁଖରେ କ୍ୱାରାଣ୍ଟାଇନ୍‌ ଷ୍ଟିକର ଲଗାଯିବ। ପଡ଼ୋଶୀମାନଙ୍କୁ ମଧ୍ୟ ଅବଗତ କରାଯିବ।  ସେମାନେ ଉକ୍ତ ଗୃହର ବାସିନ୍ଦାମାନଙ୍କ ଉପରେ ନଜର ରଖିବେ। ଯଦି ଏହି କ୍ୱାରାଣ୍ଟାଇନ୍‌ ପରିବାର ସରକାରଙ୍କ ପ୍ରୋଟୋକଲ୍‌ ଅନୁପାଳନ ନକରନ୍ତି, ତେବେ ସ୍ଥାନୀୟ ପଡ଼ୋଶୀମାନେ ତୁରନ୍ତ ସ୍ଥାନୀୟ ୱାର୍ଡ ଅଫିସର/ପୋଲିସ୍‌କୁ ସୂଚନା ଦେବେ ବୋଲି ରାଜ୍ୟ ସରକାରଙ୍କ ସହରାଞ୍ଚଳ ହୋମ୍‌ କ୍ବାରେଣ୍ଟାଇନ୍‌ ମାର୍ଗଦର୍ଶିକାରେ ଦର୍ଶାଯାଇଛି। ରାଜ୍ୟ ସରକାରଙ୍କ ଦ୍ୱାରା ହୋମ୍‌ କ୍ୱାରାଣ୍ଟାଇନ୍‌ ଅବଧିକୁ ୧୪ରୁ ୨୮ ଦିନକୁ ବୃଦ୍ଧି କରାଯାଇଛି।  ଯେଉଁମାନେ ବିମାନ ଓ ରେଳ ଏବଂ ଅନ୍ୟାନ୍ୟ ମାଧ୍ୟମରେ ଓଡ଼ିଶାକୁ ଫେରୁଛନ୍ତି ସେମାନଙ୍କ ନିମନ୍ତେ ୨୮ ଦିନ ହୋମ୍‌ କ୍ୱାରାଣ୍ଟାଇନ୍‌ରେ ରହିବା ବାଧ୍ୟତାମୂଳକ କରାଯାଇଛି। ରୋଗ ନିରୀକ୍ଷଣ ଦଳ ପକ୍ଷରୁ ପ୍ରତ୍ୟେକ କ୍ୱାରାଣ୍ଟାଇନ୍‌ ପରିବାରର ସ୍ୱାସ୍ଥ୍ୟ ଉପରେ ଦୃଷ୍ଟି ରଖାଯିବ। ଯଦି ସଂପୃକ୍ତ ପରିବାର ପକ୍ଷରୁ ରାସନ୍‌, ଔଷଧ, ଅତ୍ୟାବଶ୍ୟକୀୟ ସାମଗ୍ରୀ ପାଇବାର ଅସୁବିଧା ସୃଷ୍ଟି ହୁଏ। ସେ କ୍ଷେତ୍ରରେ ପଡ଼ୋଶୀମାନେ ସହାୟତା କରିବେ। କ୍ୱାରାଣ୍ଟାଇନ୍‌ ପରିବାର ଅନ୍‌ଲାଇନ୍‌ରେ ମଧ୍ୟ ଆବଶ୍ୟକୀୟ ସାମଗ୍ରୀ ମଗାଇ ପାରିବେ ବୋଲି ବୋଲି ସ୍ୱାସ୍ଥ୍ୟ ଓ ପରିବାର କଲ୍ୟାଣ ବିଭାଗ ଅତିରିକ୍ତ ମୁଖ୍ୟ ଶାସନ ସଚିବ ପ୍ରଦୀପ୍ତ କୁମାର ମହାପାତ୍ର ଏବଂ ସୂଚନା ଓ ଲୋକସଂପର୍କ ବିଭାଗର କମିଶନର ତଥା ଶାସନ ସଚିବ ସଞ୍ଜୟ କୁମାର ସିଂ ସୂଚନା ଦେଇଛନ୍ତି।

Comments
Loading...