ରାସ୍ତାକଡ଼ ଗଛରେ ପିଟି ଯୁବକ ମୃତ, ଜଣେ ଗୁରୁତର

ଠାକୁରମୁଣ୍ଡା: ମୟୂରଭଞ୍ଜ ଜିଲା ମହୁଲଡିହା ଥାନା ଅନ୍ତର୍ଗତ ଠାକୁରମୁଣ୍ଡା – ଆନନ୍ଦପୁର ରାସ୍ତାର ମହୁଲଡ଼ିହା ନିକଟରେ ମଙ୍ଗଳବାର ଅପରାହ୍ଣ ପ୍ରାୟ ୩ ଟା ସମୟରେ ଏକ ବାଇକ ରାସ୍ତା କଡ ଗଛରେ ପିଟି ହୋଇ ଯିବାରୁ ଘଟଣାସ୍ଥଳରେ ବାଇକ ଚାଳାଉଥିବା ଯୁବକ ମୃତ୍ୟୁ ଘଟିଥିବା ବେଳେ ବାଇକ ପଛରେ ବସିଥିବା ଅନ୍ୟ ଜଣେ ଯୁବକ ଗୁରୁତର ହୋଇଛନ୍ତି। ଦୁର୍ଘଟଣା ପରେ ଉଭୟଙ୍କୁ ଉଦ୍ଧାର କରାଯାଇ ଆମ୍ବୁଲାନ୍ସ ଯୋଗେ ଆଣି ଠାକୁରମୁଣ୍ଡା ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରାଯାଇଥିଲା। ସେଠାରେ ଡାକ୍ତର ଜଣଙ୍କୁ ମୃତ ଘୋଷଣା କରିଥିଲେ। ଅପରପକ୍ଷରେ ଅନ୍ୟ ଗୁରୁତରଙ୍କୁ ସେଠାରେ ଜରୁରୀକାଳୀନ ଚିକିତ୍ସା ପ୍ରଦାନ କରାଯାଉଛି। ଦୁର୍ଘଟଣାରେ ମୃତ ବାଇକ ଚାଳକ ଜଣକ ହେଉଛନ୍ତି ଚନ୍ଦ୍ରକାନ୍ତ ନାୟକ (୩୦) ଏବଂ ଘର କରଞ୍ଜିଆ ବ୍ଲକ ଅନ୍ତର୍ଗତ ସିଙ୍ଗିଡା ନିକଟ କପିଳେଶ୍ୱର ସାହିରେ ହୋଇଥିବାବେଳେ ଗୁରୁତର ଥିବା ଯୁବକ ଜଣକ ହେଉଛନ୍ତି ପାଣ୍ଡୁ ନାୟକ (୩୨) ଘର – କରଞ୍ଜିଆ ନିକଟ ଝୁମୁକାକୁଦର ଗ୍ରାମରେ ବୋଲି ଜଣାଯାଇଛି ।ସେମାନେ ଏକ ବାଇକ ନମ୍ବର ଓଡ଼ି ୧୧ ଟି ୮୬୧୭ ଯୋଗେ ଠାକୁରମୁଣ୍ଡା ନିକଟ ବଡ଼ବାଲି ପୋଷି ଗ୍ରାମକୁ ଆସି ପରେ ସେଠାରୁ ସାତକୋଶିଆ ଅଞ୍ଚଳକୁ ଯାଉଥିବା ସମୟରେ ବାଇକ ଭାରସାମ୍ୟ ହରାଇ ରାସ୍ତା ପାର୍ଶ୍ବରେ ଥିବା ଏକ ଗଛରେ ସେମାନଙ୍କ ବାଇକ ପିଟି ହୋଇ ଯାଇଥିଲା। ଖବର ପାଇ ମହୁଲଡ଼ିହା ଥାନା ପୁଲିସ ପହଞ୍ଚି ଦୁର୍ଘଟଣାଗ୍ରସ୍ତ ବାଇକକୁ ଜବତ କରିବା ସହ ଅଧିକ ତଦନ୍ତ ଜାରି ରଖିଛି।

Comments are closed.