ନୂଆଦିଲ୍ଲୀ: ଅଲିମ୍ପିକ୍ କ୍ରୀଡ଼ାରେ ୨ଟି ବ୍ୟକ୍ତିଗତ ପଦକ ଜିତିବାରେ ଏକମାତ୍ର ଭାରତୀୟ ହେଉଛନ୍ତି ମଲ୍ଲଯୋଦ୍ଧା ସୁଶୀଲ କୁମାର। ମଲ୍ଲଯୋଦ୍ଧା ସାଗର ଧନକଡ଼ଙ୍କ ଅପହରଣ ଓ ହତ୍ୟା ମାମଲାରେ ସୁଶୀଲଙ୍କୁ ପୁଲିସ୍ ମୁଖ୍ୟ ଅଭିଯୁକ୍ତ ଦର୍ଶାଇଛି। ଏବେ ପୁଲିସ ଜିମାରେ ଥିବା ସୁଶୀଲଙ୍କ ଜେରା ଚାଲିଛି। ପରେ ଦୀର୍ଘଦିନ ଧରି ବିଚାର ଚାଲିବ। ଏହାପରେ ଜଣାପଡ଼ିବ ଯେ ସୁଶୀଲ ଦୋଷୀ ନା ନିର୍ଦୋଷ। ହେଲେ ଏହା ପୂର୍ବରୁ ଗଣମାଧ୍ୟମରେ ସୁଶୀଲ କୁମାରଙ୍କୁ ଖଳନାୟକ ଭାବେ ଦର୍ଶାଇବାରେ ଲାଗିଛି ଗଣମାଧ୍ୟମ। ସୁଶୀଲଙ୍କୁ ନେଇ ବିଭ୍ରାନ୍ତିକର ଓ ସତ୍ୟତା ନଥିବାର କାହାଣୀ ଗଣମାଧ୍ୟମ ପ୍ରଚାର କରୁଛି। ସାରାବିଶ୍ୱରେ ଭାରତର ଗୌରବ ମଣ୍ଡନ କରିଥିବା ଜଣେ କ୍ରୀଡ଼ାବିତ୍ଙ୍କ ପ୍ରତି ଏପରି ବ୍ୟବହାର ଗ୍ରହଣୀୟ ନୁହେଁ।
ଏପରି ଖବର ପ୍ରସାରଣ ଯୋଗୁଁ ସୁଶୀଲଙ୍କ କୁସ୍ତି ଜୀବନ ଓ ତାଙ୍କ ଖ୍ୟାତି ବେଶ୍ କ୍ଷତିଗ୍ରସ୍ତ ହୋଇଛି। ଅଦାଲତରେ ବିଚାର ହେବା ଆଗରୁ ଗଣମାଧ୍ୟମରେ ସୁଶୀଲଙ୍କୁ ଦୋଷୀ ବୋଲି ଦର୍ଶାଇ ବିଚାର କରାଯାଉଛି। ଏହାକୁ ତୁରନ୍ତ ବନ୍ଦକରିବା ଲାଗି ଗଣମାଧ୍ୟମକୁ ନିର୍ଦେଶ ଦେବା ପାଇଁ ଦିଲ୍ଲୀ ହାଇକୋର୍ଟରେ ଆବେଦନ କରିଛନ୍ତି ଜଣେ ଆଇନ୍ ଛାତ୍ର। ଜଷ୍ଟିସ୍ ଡି.ଏନ୍. ପଟେଲ ଏହି ଆବେଦନକୁ ଗ୍ରହଣକରି ଆଜି ଶୁଣାଣି ପାଇଁ ଦିନ ଧାର୍ଯ୍ୟ କରିଛନ୍ତି। ଛତ୍ରସାଲ ଷ୍ଟାଡିୟମ୍ ଗଣ୍ଡଗୋଳ ମାମଲାରେ ସାଗର ଧନକଡ଼ଙ୍କ କିପରି ମୃତ୍ୟୁ ଘଟିଲା; ତାହା କେହି ଜାଣିନାହାନ୍ତି। ହେଲେ ଗଣମାଧ୍ୟମରେ ସୁଶୀଲଙ୍କୁ ଖଳନାୟକ ଦର୍ଶାଯାଉଛି ଏବଂ କୁଖ୍ୟାତ ଅପରାଧୀଙ୍କ ସହ ତାଙ୍କୁ ତୁଳନା କରାଯାଉଛି।
Comments are closed.