ଖାର୍ଟୁମ: ସୁଦାନର ରାଷ୍ଟ୍ରପତି ଓମାର ଅଲ ବାସିରଙ୍କୁ ଗୁରୁବାର ସେନା କ୍ଷମତାଚ୍ୟୁତ କରିବା ସହ ଗିରଫ କରିଛି। ରାଷ୍ଟପତି ଓମାରଙ୍କ ଗିରଫ ସମ୍ପର୍କରେ ପ୍ରତିରକ୍ଷା ମନ୍ତ୍ରୀ ଅୱାଦ ଇନୌଫ ଟେଲିଭିଜନରେ ଘୋଷଣା କରିଛନ୍ତି। ପ୍ରତିରକ୍ଷା ମନ୍ତ୍ରୀ କହିବା ଅନୁଯାୟୀ ଗିରଫ ପରେ ଓମାରଙ୍କୁ ଏକ ସୁରକ୍ଷିତ ସ୍ଥାନରେ ରଖାଯାଇଛି। ସରକାର ପରିଚାଳନା ପାଇଁ ଏକ ମିଲିଟାରୀ ପରିଷଦ ଗଠନ କରାଯାଇଛି। ଏହି ମିଲିଟାରୀ ପରିଷଦ ଦୁଇବର୍ଷ ପାଇଁ କାର୍ୟ୍ୟ କରିବ ବୋଲି ଇନୌଫ କହିଛନ୍ତି। ଏହି ଘଟଣାକୁ ନେଇ ଦେଶର ସୀମା ଓ ବାୟୁସୀମାକୁ ବନ୍ଦ କରିଦିଆଯାଇଛି। ଗୃହବନ୍ଦୀ ଦେଶର ସମସ୍ତ ରାଜନେତାଙ୍କୁ ମୁକ୍ତ କରାଯିବ ବୋଲି ସେନା ଘୋଷଣା କରିଛି।
ଓମାରଙ୍କ ୩୦ବର୍ଷର ଶାସନକୁ ବିରୋଧ କରି ସେନା ପକ୍ଷରୁ ମାସାଧିକ କାଳ ବିକ୍ଷୋଭ ଜାରି ରହିଥିଲା। ଏହା ସହିତ ଯୁଦ୍ଧ ଅପରାଧ ଓ ଗଣହତ୍ୟା ଭଳି ଅଭିଯୋଗ ପାଇଁ ଆନ୍ତର୍ଜାତିକ ଫୌଜଦାରୀ କୋର୍ଟ ତାଙ୍କୁ ଗିରଫ ଲାଗି ନିର୍ଦେଶ ଦେଇଥିଲା। ଗୁରୁବାର ସକାେଳ ବହୁସଂଖ୍ୟକ ଲୋକ ଖାର୍ଟୁମରେ ଏକତ୍ରିତ ହୋଇଥିଲେ। ସେମାନେ ରାଷ୍ଟ୍ରପତିଙ୍କ ବିରୋଧରେ ସ୍ଲୋଗାନ ଦେଇଥିଲେ। ୧୯୮୯ରେ ଓମାର କ୍ଷମତା ଦଖଲ କରିଥିଲେ। ସେବେଠାରୁ ସେ କ୍ଷମତାରେ ରହିଆସିଛନ୍ତି। ଆଫ୍ରିକା ମହାଦେଶର ଏହି ରାଷ୍ଟ୍ରରେ ସର୍ବାଧିକ କାଳ କ୍ଷମତାରେ ରହିବାର ସେ ରେକର୍ଡ କରିଛନ୍ତି। ଗତବର୍ଷ ଡିସେମ୍ବରରେ ଓମାରଙ୍କ ସରକାର ପାଉଁରୁଟି ମୂଲ୍ୟ ତିନିଗୁଣା ବୃଦ୍ଧି କରିଥଲେ। ଏହି ନିଷ୍ପତ୍ତି ରାଷ୍ଟ୍ରପତିଙ୍କ ପାଇଁ କାଳ ହୋଇଥିଲା। ଏଥିପାଇଁ ଓମାରଙ୍କ ବିରୋଧରେ ଦେଶବ୍ୟାପୀ ବିକ୍ଷୋଭ ଚାଲିଥିଲା। ଆମେରିକା, ବ୍ରିଟେନ ଓ ନରୱେ ଏହି ବିକ୍ଷୋଭକୁ ସମର୍ଥନ ଜଣାଇଥିଲେ।
Comments are closed.