ଏଣିକି ୧୪ ଦିନ ନୁହେଁ, ୨୮ ଦିନକୁ ବଢ଼ିଲା ସଙ୍ଗରୋଧ ଅବଧି

ସରକାରୀ ସଙ୍ଗରୋଧ କେନ୍ଦ୍ରରେ ୨୧ ଦିନ ଓ ଘରେ ସଙ୍ଗରୋଧ ରହିବେ ୭ ଦିନ

ଭୁବନେଶ୍ଵର : ରାଜ୍ୟରେ କ୍ବାରେଣ୍ଟିନ (ସଙ୍ଗରୋଧ) ଅବଧିକୁ ୧୪ ଦିନରୁ ୨୮ ଦିନକୁ ବୃଦ୍ଧି କରିଛନ୍ତି ରାଜ୍ୟ ସରକାର । ୨୮ ଦିନ ମଧ୍ୟରୁ ୨୧ ଦିନ ସରକାରୀ ସଙ୍ଗରୋଧ କେନ୍ଦ୍ରରେ ରହିବେ ଓ ଅବଶିଷ୍ଟ ୭ ଦିନ ଘରେ ସଙ୍ଗରୋଧ ରହିବା ନିଷ୍ପତ୍ତି ହୋଇଛି ।  ଶୁକ୍ରବାର ରାଜ୍ୟ ସରକାରଙ୍କ କୋଭିଡ଼-୧୯ ମୁଖପାତ୍ର ସୁବତ୍ର ବାଗଚୀ ସାମ୍ବାଦିକ ସମ୍ପିଳନୀରେ ସୂଚନା ଦେଇଛନ୍ତି।
ବାଗଚୀ କହିଛନ୍ତି ଯେ, ଏବେଠାରୁ କ୍ୱାରେଣ୍ଟିନ୍ ଅବଧି ମୋଟ୍ ୨୮ ଦିନ ରହିବ । କ୍ୱାରେଣ୍ଟିନ୍ ସେଣ୍ଟରରେ ୨୧ ଦିନ ଏବଂ ଏହା ପରେ ଆଉ ୭ ଦିନ ନିଜ ଘରେ ଆାଇସୋଲେସନ୍‌ରେ ରହିବେ । ଏହିପରି ଭାବରେ କ୍ବାରେଣ୍ଟିନ୍ ମୋଟ୍ ୨୮ ଦିନକୁ ବଢ଼ାଇ ଦିଆଯାଇଛି । ପୂର୍ବରୁ କେବଳ ପଜେଟିଭ୍‌ ରୋଗୀଙ୍କ ସ୍ୱାସ୍ଥ୍ୟାବସ୍ଥାକୁ ଦେଖି ଏହି ୨୮ ଦିନିଆ ନିୟମ ଲାଗୁ କରାଯାଇଥିଲା। ମାତ୍ର ଏବେ ସମସ୍ତ ପ୍ରବାସୀଙ୍କ କ୍ଷେତ୍ରରେ ଏହି ନିୟମ ଲାଗୁ କରାଯିବ ବୋଲି ଶ୍ରୀ ବାଗଚୀ କହିଛନ୍ତି ।

ସେପଟେ ସଙ୍ଗରୋଧ କେନ୍ଦ୍ରରେ ଏଣିକି ଅଧିକ କଟକଣା ରହିବ  ବାହାର ଓ ଭିତର ଲୋକଙ୍କ ଯାଆସ ଜାଣିବାକୁ ସିସିଟିଭି ଲାଗିବ । ସଙ୍ଗରୋଧ କେନ୍ଦ୍ରରେ ସାମାଜିକ ଦୂରତାକୁ କଡାକଡି ପାଳନ କରାଯିବ ଓ  ବ୍ୟକ୍ତିଗତ ପରିଚ୍ଛନ୍ନତା ଉପରେ ଅଧିକ ଗୁରୁତ୍ୱ ଦିଆଯିବ । ଏପରିକି  ସଙ୍ଗରୋଧ କେନ୍ଦ୍ର ଆଖପାଖରେ ବାହାର ଲୋକଙ୍କ ଯିବା ଆସିବା ଉପରେ କଟକଣା ଲଗାଇବାକୁ ୧୪୪ ଜାରି ହେବ ବୋଲି ସୁବ୍ରତ ବାଗଚୀ କହିଛନ୍ତି ।

Comments
Loading...