ଆର୍ଥିକ ଅଭିବୃଦ୍ଧିକୁ ତ୍ୱରାନ୍ୱିତ କରିବା ପାଇଁ ନିରବଚ୍ଛିନ୍ନ ତଥା କ୍ରମାଗତ ଉଦ୍ୟମର ଆବଶ୍ୟକତା ରହିଛି : ମନ୍ତ୍ରୀ

ଭୁବନେଶ୍ୱର: ଆଜି ୧୬୩ତମ ରାଜ୍ୟସ୍ତରୀୟ ବ୍ୟାଙ୍କର୍ସ କମିଟି (ଏସ୍‌ଏଲ୍‌ବିସି) ବୈଠକ ଅନୁଷ୍ଠିତ ହୋଇଯାଇଛି। ଦେଶରେ ତଥା ରାଜ୍ୟର ଆର୍ଥିକ ବିକାଶ କ୍ଷେତ୍ରରେ ବ୍ୟାଙ୍କଗୁଡ଼ିକ ସର୍ବଦା ଅତି ଗୁରୁତ୍ୱପୂର୍ଣ୍ଣ ଭୂମିକା ନିର୍ବାହ କରିଥାନ୍ତି। କୋଭିଡ୍‌-୧୯ ସଂକ୍ରମଣର ଦ୍ୱିତୀୟ ଲହର ଜନସାଧାରଣଙ୍କ ଜୀବନ ଓ ଜୀବିକା କ୍ଷେତ୍ରରେ ନକାରାତ୍ମକ ପ୍ରଭାବ ପକାଇଛି। ଆର୍ଥିକ ଅଭିବୃଦ୍ଧିକୁ ତ୍ୱରାନ୍ୱିତ କରିବା ପାଇଁ ନିରବଚ୍ଛିନ୍ନ ତଥା କ୍ରମାଗତ ଉଦ୍ୟମର ଆବଶ୍ୟକତା ରହିଛି ବୋଲି ଆଜି ଅନୁଷ୍ଠିତ ଭର୍ଚୁଆଲ ବୈଠକରେ ଯୋଗଦେଇ ଅର୍ଥମନ୍ତ୍ରୀ ନିରଞ୍ଜନ ପୂଜାରୀ ମତବ୍ୟକ୍ତ କରିଛନ୍ତି। ଆର୍ଥିକ କ୍ଷେତ୍ରକୁ ମଜବୁତ କରିବା ପାଇଁ ରାଜ୍ୟ ସରକାର ୨୦୨୦-୨୧ ବର୍ଷ ତୁଳନାରେ ୨୦୨୧-
୨୨ ବର୍ଷର ଶତକଡ଼ା ୨୨.୫ ପ୍ରତିଶତ ଅଧିକା ଋଣ ପ୍ରଦାନ କରିଛନ୍ତି ଏବଂ ଏ କ୍ଷେତ୍ରର ବ୍ୟାଙ୍କଗୁଡ଼ିକ ଲକ୍ଷ୍ୟ ହାସଲ କରିବାକୁ ସକ୍ଷମ ହେବେ ବୋଲି ମନ୍ତ୍ରୀ ଶ୍ରୀ ପୂଜାରୀ ଆଶା ପ୍ରକାଶ କରିଥିଲେ। ଅଣୁ, କ୍ଷୁଦ୍ର ଓ ମଧ୍ୟମ ଉଦ୍ୟୋଗ କ୍ଷେତ୍ରଗୁଡ଼ିକ ବାର୍ଷିକ ଋଣ ଯୋଜନାରେ ଶତପ୍ରତିଶତ ଲକ୍ଷ୍ୟ ହାସଲ କରି ପାରିଥିବାରୁ ଆଞ୍ଚଳିକ ଗ୍ରାମ୍ୟ ବ୍ୟାଙ୍କମାନଙ୍କର ଉତ୍ତମ ପରିଚାଳନାକୁ ମନ୍ତ୍ରୀ ଶ୍ରୀ ପୂଜାରୀ ପ୍ରଶଂସା କରିଥିଲେ। ପବ୍ଲିକ୍‌ ସେକ୍ଟର ବ୍ୟାଙ୍କଗୁଡ଼ିକ ଚଳିତ ଆର୍ଥିକ ବର୍ଷରେ ବାର୍ଷିକ ଋଣ ଯୋଜନା ଲକ୍ଷ୍ୟ ହାସଲ ପାଇଁ ଅଧିକ ଉଦ୍ୟମର ଆବଶ୍ୟକତା ରହିଛି ବୋଲି ସେ କହିଥିଲେ। ସ୍ୱୟଂ ସହାୟକ ଗୋଷ୍ଠୀଗୁଡ଼ିକୁ ବ୍ୟାଙ୍କଗୁଡ଼ିକ ଋଣ ପ୍ରଦାନ କ୍ଷେତ୍ରରେ ଅଗ୍ରାଧିକାର ଦେଇଥିବାରୁ ଚଳିତ ବର୍ଷ ୬୦୦୨ କୋଟି ଟଙ୍କାର ଲକ୍ଷ୍ୟ ହାସଲ କରିପାରିଛନ୍ତି। ନଗଦ ଜମା ଅନୁପାତ ଅର୍ଥନୀତିର ଏକ ମହତ୍ତ୍ୱପୂର୍ଣ୍ଣ ଅଂଶ ହୋଇଥିବାବେଳେ ଏ ଦିଗରେ ଲକ୍ଷ୍ୟ ହାସଲ କ୍ରମାଗତ ଭାବେ ହ୍ରାସ ପାଇଛି। ରାଜ୍ୟରେ ଏହି ଅନୁପାତ ୫୬ ପ୍ରତିଶତ ରହିଛି, ଯାହାକି ରିଜର୍ଭ ବ୍ୟାଙ୍କ ଅଫ୍‌ ଇଣ୍ଡିଆ ଦ୍ୱାରା ନିର୍ଦ୍ଧାରିତ ୬୦ ପ୍ରତିଶତ ମାନଦଣ୍ଡଠାରୁ କମ୍‌। ଏ ପରିପ୍ରେକ୍ଷୀରେ ଏସ୍‌ଏଲ୍‌ବିସି ସେମାନଙ୍କ ନିୟନ୍ତ୍ରିତ ବ୍ୟାଙ୍କମାନଙ୍କ ସହ ଆଲୋଚନା କରି ପଦକ୍ଷେପ ଦେବାର ଆବଶ୍ୟକତା ରହିଛି। କିନ୍ତୁ କୃଷି କ୍ଷେତ୍ରରେ ବାର୍ଷିକ ଋଣ ଯୋଗାଣ ଗତବର୍ଷଠାରୁ ଭଲ ରହିଛି ବୋଲି ମନ୍ତ୍ରୀ ଶ୍ରୀ ପୂଜାରୀ କହିଛନ୍ତି।
ଉନ୍ନୟନ କମିଶନର ପ୍ରଦୀପ ଜେନା କହିଥିଲେ ମହାମାରୀ କରୋନା ଯୋଗୁଁ ଆର୍ଥିକ ଅଭିବୃଦ୍ଧି ହ୍ରାସ ପାଇଥିବାବେଳେ ବ୍ୟାଙ୍କଗୁଡ଼ିକ ଲକ୍‌ଡାଉନ୍‌ ଏବଂ ସଟ୍‌ଡାଉନ୍‌ବେଳେ ନିରବଚ୍ଛିନ୍ନ ସେବା ଦେଇ ଆସିଛନ୍ତି। କୃଷି ଓ ଆନୁଷଙ୍ଗ କି କ୍ଷେତ୍ର, ଅଣୁ, କ୍ଷୁଦ୍ର ଓ ମଧ୍ୟମ ଉଦ୍ୟୋଗ ଏବଂ ସ୍ୱୟଂ ସହାୟକ ଗୋଷ୍ଠୀଗୁଡ଼ିକ କ୍ଷେତ୍ରର ବ୍ୟାଙ୍କମାନେ ବାର୍ଷିକ ଋଣ ପ୍ରଦାନରେ ଉତ୍ସାହଜନକ ଲକ୍ଷ୍ୟ ହାସଲ କରିପାରିଛନ୍ତି। ରାଜ୍ୟର ପ୍ରତି ଗ୍ରାମପଞ୍ଚାୟତରେ ସ୍ଥାୟୀ ବ୍ୟାଙ୍କ ନଥିବାରୁ ଆର୍ଥିକ ଅନ୍ତର୍ଭୁକ୍ତିକରଣ କାର୍ଯ୍ୟ ବାଧାପ୍ରାପ୍ତ ହେଉଛି। ଏ ଦିଗରେ ମୁଖ୍ୟ ଶାଖା ବ୍ୟାଙ୍କଗୁଡ଼ିକ ତୁରନ୍ତ ପଦକ୍ଷେପ ନେବା ପାଇଁ ସେ ପରାମର୍ଶ ଦେଇଥିଲେ। ନଗଦ ଜମା ଅନୁପାତରେ ବୃଦ୍ଧି କରିବା ଦିଗରେ ସଂପୃକ୍ତ ବ୍ୟାଙ୍କମାନେ ଉଦ୍ୟମ କରିବା ପାଇଁ ଉନ୍ନୟନ କମିଶନର କହିଥିଲେ। ଚଳିତ ବର୍ଷ କୃଷକ, ଉଦ୍ୟୋଗୀ ଏବଂ ସ୍ୱୟଂ ସହାୟକ ଗୋଷ୍ଠୀମାନଙ୍କୁ ବ୍ୟାଙ୍କ ସେବା ପ୍ରଦାନ କ୍ଷେତ୍ରରେ ଚମ୍ପିଅାନ୍‌ ବ୍ୟାଙ୍କ ମାନ ଙ୍କୁ ମୁଖ୍ୟମନ୍ତ୍ରୀଙ୍କ ପୁରସ୍କାର ପ୍ରଦାନ କରାଯିବ। କୃଷି ଉତ୍ପାଦନ କମିଶନର ରାଜକୁମାର ଶର୍ମା ଗ୍ରାମୀଣ କ୍ଷେତ୍ରରେ ବ୍ୟାଙ୍କମାନେ କୃଷି ଓ ଆନୁଷଙ୍ଗିକ କ୍ଷେତ୍ରକୁ ଅଧିକ ଗୁରୁତ୍ୱ ଦେଲେ ସାମଗି୍ରକ ଉନ୍ନତି ହୋଇପାରିବ ବୋଲି କହିଥିଲେ। କୃଷି ଏବଂ କୃଷକ ସଶକ୍ତିକରଣ ବିଭାଗ ସଚିବ ସୁରେଶ କୁମାର ବଶିଷ୍ଠ ପ୍ରଧାନମନ୍ତ୍ରୀ ଫସଲ ବୀମା ଯୋଜନା ଏବଂ ବଳରାମ ଯୋଜନାରେ ତୁରନ୍ତ ଋଣ ପ୍ରଦାନ ପାଇଁ ବ୍ୟାଙ୍କମାନଙ୍କୁ ପରାମର୍ଶ ଦେଇଥିଲେ। ଅଣୁ, କ୍ଷୁଦ୍ର ଓ ମଧ୍ୟମ ଉଦ୍ୟୋଗ ବିଭାଗ ପ୍ରମୁଖ ଶାସନ ସଚିବ ସତ୍ୟବ୍ରତ ସାହୁ କହିଥିଲେ ଯେ ଏମ୍‌ଏସ୍‌ଏମ୍‌ଇ କ୍ଷେତ୍ରରେ ରାଜ୍ୟ ଶତପ୍ରତିଶତ ଲକ୍ଷ୍ୟ ହାସଲ କରିଛି। ଆଗାମୀ ଦିନରେ ମଧ୍ୟ ଏହା ଉତ୍ସାହପ୍ରଦ ଲକ୍ଷ୍ୟ ହାସଲ କରିବ ବୋଲି ସେ ଆଶାପ୍ରକାଶ କରିଥିଲେ।

ଆଜି ଏହି ବୈଠକରେ ଯୋଗଦେଇ ଅର୍ଥ ବିଭାଗ ପ୍ରମୁଖ ଶାସନ ସଚିବ ଏ.କେ. ମୀନା ନଗଦ ଜମା ଅନୁପାତ ହ୍ରାସ ହେଉଥିବା ବିଷୟକୁ ଅଧିକ ଗୁରୁତ୍ୱ ଦେଇଥିଲେ। ସେ କହିଥିଲେ ଯେ ଆନ୍ଧ୍ରପ୍ରଦେଶ, ମଧ୍ୟପ୍ରଦେଶ, ପଶ୍ଚିମବଙ୍ଗ ଏବଂ ଛତିଶଗଡ଼ର ନଗଦ ଜମା ଅନୁପାତ ୬୦ ପ୍ରତିଶତରୁ ଅଧିକ ରହିଥିବାବେଳେ ଓଡ଼ିଶାରେ ରିଜର୍ଭ ବ୍ୟାଙ୍କ ଅଫ୍‌ ଇଣ୍ଡିଆର ଦ୍ୱାରା ନିର୍ଦ୍ଧାରିତ ନଗଦ ଜମା ଅନୁପାତ କମ ରହିଛି। ଆଗାମୀ ଦିନରେ ବ୍ୟାଙ୍କଗୁଡ଼ିକ ଏକ ସଫଫେୱୟାର ବ୍ୟବସ୍ଥା ମାଧ୍ୟମରେ ଏସ୍‌ଏଲ୍‌ବିସିକୁ ତଥ୍ୟ ଉପଲବ୍ଧ କରାଗଲେ ପରିଚାଳନା କାର୍ଯ୍ୟ ଠିକ୍‌ ଭାବରେ ହୋଇପାରିବ ବୋଲି ଶ୍ରୀ ମୀନା କହିଥିଲେ। ମିଶନ ଶକ୍ତି ସଚିବ ସୁଜାତା କାର୍ତ୍ତିକେୟନ ବୈଠକରେ ଉପସ୍ଥିତ ରହି କହିଥିଲେ ଗ୍ରାମ୍ୟ ଅର୍ଥନୀତିର ବିକାଶର ସ୍ୱୟଂ ସହାୟକ ଗୋଷ୍ଠୀ ମହିଳାମାନଙ୍କ ସକି୍ରୟ କାର୍ଯ୍ୟ କରିଆସୁଛନ୍ତି। ଚଳିତ ବର୍ଷ ସ୍ୱୟଂ ସହାୟକ ଗୋଷ୍ଠୀ ଲକ୍ଷ୍ୟ ହାସଲ କ୍ଷେତ୍ରରେ ଆଗୁଆ ରହିଛି ବୋଲି ସେ କହିଥିଲେ। ମତ୍ସ୍ୟ ଓ ପ୍ରାଣୀସଂପଦ ବିକାଶ ବିଭାଗର ଶାସନ ସଚିବ ଆର୍‌. ରଘୁପ୍ରସାଦ ବାର୍ଷିକ ଋଣ ଯୋଜନା ଅର୍ଥ ଠିକ୍‌ ଭାବେ ବିତରଣ ଏବଂ ହିତାଧିକାରୀମାନଙ୍କୁ ଋଣ ଯୋଗାଣ କ୍ଷେତ୍ରରେ ବ୍ୟାଙ୍କମାନେ ଅଗ୍ରାଧିକାର ଦେବା ଆବଶ୍ୟକ ବୋଲି କହିଥିଲେ। ଅନ୍ୟମାନଙ୍କ ମଧ୍ୟରେ ଭାରତ ସରକାରଙ୍କ ଅର୍ଥ ସେବା ବିଭାଗର ନିର୍ଦେଶକ ଏ.କେ. ଡେଗ୍ରା, ଏସଏଲ୍‌ବିସି ଅଧ୍ୟକ୍ଷ ତଥା ୟୁକୋ ବ୍ୟାଙ୍କର ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ଏ.କେ. ଗୋୟଲ, ରିଜର୍ଭ ବ୍ୟାଙ୍କ ଅଫ୍‌ ଇଣ୍ଡିଆର ଆଞ୍ଚଳିକ ନିର୍ଦେଶକ ଏଚ୍‌ଏନ୍‌ ପଣ୍ଡା, ନାବାର୍ଡର ସିଜିଏମ୍‌ ଉଦୟ ଭାସ୍କର, ଏସ୍‌ବିଆଇର ସିଜିଏମ୍‌ ରୁମା ଦେ, ନିର୍ଦେଶକ, ଇନ୍‌ଷ୍ଟିଚୁ୍ୟସନାଲ ଫାଇନାନ୍ସ ଡ. ପ୍ରଜ୍ଞାସ୍ମିତା ସାହୁ ଏବଂ ଅନ୍ୟ ବିଭାଗୀୟ ଅଧିକାରୀମାନେ ଉପସ୍ଥିତ ଥିଲେ।