ଗୌହାଟୀରେ ରାହୁଲଙ୍କ ସିଏଏ ବିରୋଧୀ ରାଲି ପୂର୍ବରୁ କଂଗ୍ରେସ ଉପରେ ବର୍ଷିଲେ ସୋନୱାଲ୍
ଜାଗିର ରୋଡ୍(ଆସାମ) : ଗୌହାଟୀଠାରେ କଂଗ୍ରେସ ପକ୍ଷରୁ ଶନିବାର ନାଗରିକତା ସଂଶୋଧନ ଆଇନ୍ ବିରୋଧୀ ରାଲିର ଆୟୋଜନ କରାଯାଇଛି । ରାହୁଲ ଗାନ୍ଧୀ ଏଥିରେ ଯୋଗଦେବାର କାର୍ଯ୍ୟକ୍ରମ ରହିଛି । ତେବେ ଏହା ପୂର୍ବରୁ ଶୁକ୍ରବାର ବିଜେପି ପକ୍ଷରୁ ଏକ ସମାବେଶରେ କଂଗ୍ରେସ ଓ ବାମ ଦଳଗୁଡ଼ିକ ଉପରେ ବର୍ଷିଛନ୍ତି ଆସାମ ମୁଖ୍ୟମନ୍ତ୍ରୀ ସର୍ବାନନ୍ଦ ସୋନୱାଲ୍। ନାଗରିକତା ସଂଶୋଧନ ଆଇନ୍ କୁ ନେଇ କଂଗ୍ରେସ ଓ ବାମ ଦଳଗୁଡ଼ିକ ଜନସାଧାରଣଙ୍କୁ ବିଭ୍ରାନ୍ତ କରିବାକୁ ଚେଷ୍ଟା କରୁଛନ୍ତି ବୋଲି ସେ କହିଛନ୍ତି । କଂଗ୍ରେସ ଦଳ ଲୋକଙ୍କୁ ଭ୍ରମିତ କରି ଦେଶରେ ଅଶାନ୍ତ ବାତାବରଣ ସୃଷ୍ଟି କରୁଛି ବୋଲି ସେ ଅଭିଯୋଗ କରିଛନ୍ତି।
ନାଗରିକତା ସଂଶୋଧନ ଆଇନ୍ ରାଜ୍ୟ ଓ ରାଜ୍ୟବାସୀଙ୍କ ସ୍ୱାର୍ଥହାନୀ କରିବ ବୋଲି ବିରୋଧୀ ଦଳ ପକ୍ଷରୁ କରାଯାଉଥିବା ଦାବିକୁ ସେ ଖଣ୍ଡନ କରିଛନ୍ତି । ଶୁକ୍ରବାର ଜାଗିର ରୋଡ୍ଠାରେ ଆୟୋଜିତ ଏକ ସମାବେଶରେ ଉଦ୍ବୋଧନ ଦେଇ ଶ୍ରୀ ସୋନୱାଲ୍ ପୁଣି କହିଛନ୍ତି, ଆସାମର ମୂଳବାସିନ୍ଦାଙ୍କ ଭାଷା, ଭୂ-ଅଧିକାର ଓ ସଂସ୍କୃତିକୁ ସୁରକ୍ଷିତ ରଖିବା ପାଇଁ ରାଜ୍ୟ ସରକାର ପ୍ରତିଶ୍ରୁତିବଦ୍ଧ । କଂଗ୍ରେସ ଓ ବାମ ଦଳଗୁଡ଼ିକ ଜନସାଧାରଣଙ୍କୁ ବିଭ୍ରାନ୍ତ କରିବାକୁ ଚେଷ୍ଟା କରୁଛନ୍ତି ବୋଲି ମୁଖ୍ୟମନ୍ତ୍ରୀ କହିଛନ୍ତି ।
ଏଥିରେ ଉଦବୋଧନ ଦେଇ ଆସାମ ଅର୍ଥମନ୍ତ୍ରୀ ହିମନ୍ତ ବିଶ୍ୱଶର୍ମା କହିଛନ୍ତି, ବିଜେପି ନେତୃତ୍ୱାଧୀନ ସରକାର ରାଜ୍ୟର ସଂସ୍କୃତି ଓ ଐତିହ୍ୟକୁ ସୁରକ୍ଷିତ ରଖିବା ପାଇଁ ବଦ୍ଧପରିକର । ବିଜେପିର ବହୁ ବରିଷ୍ଠ ନେତା, ଆସାମ ଗଣପରିଷଦ ଏବଂ ବିପିଏଫ୍ ପକ୍ଷରୁ ମଧ୍ୟ ଆଜି ଜାଗିର ରୋଡରେ ଶାନ୍ତି ଶୋଭାଯାତ୍ରା ବାହାର କରାଯାଇଥିଲା । ହଜାର ହଜାର ଲୋକ ଏହି ରାଲିରେ ଭାଗ ନେଇଥିଲେ ।
Comments are closed.