ସୋନୁ ସୁଦ୍‍ଙ୍କ ନାମରେ ଆରମ୍ଭ ହେଲା ଆମ୍ବୁଲାନ୍ସ ସେବା, ନିଜେ ଉଦ୍‍ଘାଟନ କଲେ ଅଭିନେତା

ନୂଆଦିଲ୍ଲୀ: କରୋନା ମହାମାରୀ ପାଇଁ ସାରା ଦେଶରେ ହୋଇଥିବା ଲକ୍‍ଡାଉନଠାରୁ ଆରମ୍ଭ କରି ଏପର୍ଯ୍ୟନ୍ତ ଅସହାୟ ଲୋକଙ୍କୁ ବିଭିନ୍ନ ପ୍ରକାର ସାହାଯ୍ୟ କରିଆସୁଛନ୍ତି ଅଭିନେତା ସୋନୁ ସୁଦ୍‍। ତାଙ୍କର ଏହି ମହାନତା ଆଜି ତାଙ୍କୁ ସାରା ଦେଶରେ ଏକ ଭିନ୍ନ ପରିଚୟ ଦେଇଛି। କେହି ତାଙ୍କୁ ଭଗବାନ ବୋଲି କହି ପୂଜା କରୁଛି ତ ଆଉ କିଏ ନିଜ ଦୋକାନର ନାମକରଣ ତାଙ୍କ ନାମରେ କରୁଛି। ସେହିପରି ଏବେ ସୋନୁଙ୍କ ନାମରେ ଆରମ୍ଭ ହୋଇଛି ଆମ୍ବୁଲାନ୍ସ ସେବା, ଯାହାକୁ ସେ ନିଜ ହାତରେ ଉଦ୍‍ଘାଟନ କରିଛନ୍ତି।

ସୂଚନା ଅନୁସାରେ, ହାଇଦ୍ରାବାଦରେ ସୋନୁ ସୁଦ୍‍ଙ୍କ ନାମରେ ଏକ ଆମ୍ବୁଲାନ୍ସ ସେବା ଆରମ୍ଭ ହୋଇଛି। ଏହାର ନାମ ‘ସୋନୁ ସୁଦ୍‍ ଆମ୍ବୁଲାନ୍ସ ସେବା’ ରଖାଯାଇଛି। ମିଳିଥିବା ଖବର ମୁତାବକ, ହାଇଦ୍ରାବାଦର ଶିବା ନାମକ ଜଣେ ବ୍ୟକ୍ତି ଏକ ଆମ୍ବୁଲାନ୍ସ କିଣିଛନ୍ତି ଏବଂ ସେ ସୋନୁଙ୍କ ମହାନପଣିଆ ଦ୍ୱାରା ଏତେ ଅନୁପ୍ରେରିତ ଯେ ନିଜ ଆମ୍ବୁଲାନ୍ସର ନାଁ ତାଙ୍କରି ନାମ ଅନୁସାରେ ରଖିଛନ୍ତି। ସୋନୁ ନିଜେ ଏହାକୁ ଉଦ୍ଘାଟନ କରିବା ପାଇଁ ସେଠାରେ ପହଞ୍ଚିଥିଲେ ଏବଂ ଏନେଇ ବହୁତ ଗର୍ବ ଅନୁଭବ କରିଥିଲେ।

ସୂଚନାଯୋଗ୍ୟ, ଶିବା ମଧ୍ୟ ଲୋକଙ୍କୁ ନିଃସ୍ୱାର୍ଥ ସେବା ଦେବାରେ ହାଇଦ୍ରାବାଦରେ ବେଶ୍ ଜଣାଶୁଣା। ସେ ପେସାରେ ଜଣେ ସନ୍ତରଣକାରୀ। ଏ ପର୍ୟ୍ୟନ୍ତ ପାଣିରେ ବୁଡ଼ି ଆତ୍ମହତ୍ୟା ଉଦ୍ୟମ କରିଥିବା ୧୦୦ରୁ ଅଧିକ ଲୋକଙ୍କର ସେ ଜୀବନ ବଞ୍ଚାଇ ସାରିଛନ୍ତି।

Comments
Loading...